தீபாவளி விற்பனையில் சாதனை: $68.7 பில்லியன் செலவு! இந்தியப் பொருளாதாரத்தின் புதிய ஒளி!
தீபாவளி பண்டிகை என்றாலே, இந்திய நகரங்கள், கிராமங்கள் மற்றும் வணிக வளாகங்களில் ஒளியும் கொண்டாட்டமும் களைகட்டும். இது நம்பிக்கை, வெற்றி மற்றும் மகிழ்ச்சியின் திருவிழா. ஆனால் இந்த ஆண்டு, நம் வீடுகள் மட்டுமின்றி, இந்திய பொருளாதாரமும் பிரகாசமாக ஜொலிக்கிறது. இதற்கு முழு காரணம் இந்திய நுகர்வோர்கள்!
தீபாவளியில் ரூ.6.05 லட்சம் கோடி விற்பனை சாதனை
அனைத்து இந்திய வர்த்தகர்களின் கூட்டமைப்பான தரவுகளின்படி, இந்த தீபாவளியின் போது இந்தியாவில் பதிவான மொத்த விற்பனை மதிப்பு ரூ.6.05 லட்சம் கோடி ஆகும். இது இந்திய வர்த்தக வரலாற்றில் ஒரு புதிய சாதனையாகும்.
ரூ.6.05 லட்சம் கோடி வர்த்தகத்தில் ஆடைகள், எலெக்ட்ரானிக்ஸ், காலணிகள், நகைகள் இந்திய நுகர்வோரால் வாங்கப்பட்டுள்ளது.
கடந்த 2024 ஆம் ஆண்டின் தீபாவளி விற்பனையுடன் ஒப்பிடுகையில், இந்த ஆண்டு நுகர்வோர் செலவு சுமார் 27% அதிகரித்துள்ளது. கடந்த ஆண்டு ரூ.4.25 லட்சம் கோடியாக இருந்த விற்பனை, இந்த ஆண்டு மிக அதிகமாக உயர்ந்துள்ளது. இது இந்திய பொருளாதாரத்திற்கு மிகச்சிறந்த செய்தி.
இந்த ஆண்டு தீபாவளி விற்பனையில் “மேட் இன் இந்தியா” பொருட்களுக்கு முதலிடம் கிடைத்துள்ளது. பிரதமரின் பிரச்சாரத்தின் விளைவாக, 87% இந்தியர்கள் வெளிநாட்டு பொருட்களை விட இந்திய பொருட்களையே அதிகம் தேர்ந்தெடுத்தனர். உள்நாட்டில் தயாரிக்கப்பட்ட பொருட்களின் விற்பனை 25% வளர்ச்சி அடைந்துள்ளது.
உணவகங்கள், திரையரங்குகள் போன்ற சேவை துறைகளும் வளர்ச்சி அடைந்துள்ளன. உணவகங்களில் உணவு உண்ணும் போக்கு கடந்த ஆண்டை விட 8% முதல் 20% வரை அதிகரித்துள்ளதாக பதிவாகியுள்ளது. ஆன்லைன் விற்பனையில் பெருநகரங்கள் மட்டுமின்றி, Tier-3 நகரங்களின் பங்களிப்பு 50%-க்கும் அதிகமாக இருந்தது.
நுகர்வோர் செலவினங்கள் இந்தியாவின் பொருளாதார வளர்ச்சிக்கு மிகவும் முக்கியம். இந்தியாவின் மொத்த உள்நாட்டு உற்பத்தியில் 61% வரை நுகர்வோர் செலவினங்களே பங்களிக்கின்றன. மக்கள் செலவு செய்தால், இந்தியா வேகமாக வளரும்.
இந்த ஆண்டு பருவமழை நன்றாக இருந்ததால், உணவு பொருட்களின் விலைகள் கட்டுப்பாட்டில் இருந்தன. செப்டம்பர் மாதத்தில் இந்தியாவின் பணவீக்கம் 1.54% ஆக குறைந்தது, இது கடந்த 8 ஆண்டுகளில் இல்லாத அளவு குறைவான நிலையாகும்.
மத்திய பட்ஜெட்டில் ரூ.12 லட்சம் வரை வருமான வரி விலக்கு அளிக்கப்பட்டதும், ஜிஎஸ்டி வரி விதிப்புகளில் செய்யப்பட்ட மாற்றங்களும் பொருட்கள் மலிவாவதற்கு காரணமாக அமைந்தன. இந்த வரி சலுகைகள் மக்களின் கைகளில் அதிக பணத்தை விட்டு, செலவினத்தை ஊக்கப்படுத்தியுள்ளன. இந்தச் சாதகமான சூழலை கருத்தில் கொண்டு, சர்வதேச நாணய நிதியம் சமீபத்தில் இந்தியாவின் வளர்ச்சி கணிப்பை 6.6% ஆக உயர்த்தியுள்ளது.
குறுகிய காலத்தில் வரிச் சலுகைகள் செலவினங்களை அதிகரித்தாலும், இந்த வளர்ச்சியை தக்கவைப்பதுதான் இந்தியாவின் முக்கிய சவால். இந்த வளர்ச்சியை தொடர, பலர் இந்திய ரிசர்வ் வங்கியின் வட்டி விகிதக் குறைப்பை எதிர்பார்க்கின்றனர். வட்டி விகிதங்கள் குறைக்கப்பட்டால், கடன்கள் மலிவாகி, நுகர்வோர் செலவு மேலும் அதிகரிக்கும்.
வெளிநாட்டு சவால்களில், டொனால்ட் டிரம்ப் இந்திய பொருட்கள் மீது விதித்துள்ள 50% கூடுதல் வரித் தடைகள் பெரும் தலைவலியாக உள்ளது. இந்த வரி தடைகளால் செப்டம்பர் மாதம் அமெரிக்காவிற்கான இந்திய ஏற்றுமதி சுமார் 12% குறைந்துள்ளது. எனினும், பிற சந்தைகளுக்கான ஏற்றுமதி 11% அதிகரித்துள்ளது.
மொத்தத்தில், பணவீக்கம் கட்டுக்குள், செலவினம் உயர்வு, வளர்ச்சி வேகம் அதிகரிப்பு என இந்திய பொருளாதாரம் ஒரு நல்ல நிலையில் உள்ளது. இந்தக் கணிசமான வளர்ச்சியை தொடர்ந்து நிலைநிறுத்துவதே இப்போதைய முக்கிய நோக்கம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
