நடிகர் விஜய்யின் அரசியல் கட்சி அறிவிப்பு, தமிழ்நாட்டு அரசியலில் மட்டுமல்லாமல், அண்டை மாநிலமான ஆந்திர பிரதேசத்திலும் எதிரொலித்து வருகிறது. ஆந்திர அரசியலில் அசைக்க முடியாத சக்தியாக உருவெடுத்துள்ள நடிகர் மற்றும் அரசியல்வாதியான பவன் கல்யாண், தற்போது விஜய்க்கு அளித்துள்ள ஆலோசனைகள், விஜய்யின் எதிர்கால முடிவுகள் குறித்து பெரும் விவாதத்தை எழுப்பியுள்ளது. ஒருபுறம் ஆந்திராவின் துணை முதல்வரான பவன் கல்யாண் அழைப்பு விடுக்க, மறுபுறம் தமிழகத்தின் எதிர்க்கட்சி தலைவரான எடப்பாடி பழனிசாமியும் ஆதரவுக்கரம் நீட்ட, விஜய்யின் இறுதி முடிவு என்னவாக இருக்கும் என்ற கேள்விகள் எழுந்துள்ளன.
சமீபத்தில் ஆந்திர பிரதேசத் துணை முதல்வராக பதவி ஏற்றிருக்கும் நடிகர் பவன் கல்யாண், விஜய்க்கு தீபாவளி வாழ்த்து தெரிவித்து அதன்பின் அளித்திருக்கும் அறிவுரை மற்றும் அழைப்பு, முக்கியத்துவம் வாய்ந்ததாக கருதப்படுகிறது. ஏனெனில், பவன் கல்யாண் தனிக்கட்சியை தொடங்கி, ஆரம்பத்தில் பல தோல்விகளை கடந்து, இப்போது ஒரு பெரிய கூட்டணி மூலம் ஆட்சியில் முக்கிய பதவியைப் பிடித்துள்ளார்.
பவன் கல்யாண், விஜய் அரசியலில் தனித்துப்போராட முயற்சிப்பதை குறித்து எச்சரிக்கை விடுப்பதாக தெரிகிறது. அவர் முன்வைக்கும் வாதங்கள்:
தமிழ்நாட்டில் ஆழமாக வேரூன்றியிருக்கும் திராவிட கட்சிகள் மற்றும் தேசிய கட்சிகளை தனி ஒருவராக எதிர்கொள்வது சாத்தியமற்றது. மக்கள் ஆதரவு இருந்தாலும், அரசியல் கட்டமைப்பையும், பண பலத்தையும் சமாளிக்க கூட்டணி அவசியம். பவன் கல்யாண், தனது ஜனசேனா கட்சியை ஆந்திராவில் தேசிய ஜனநாயக கூட்டணியில் இணைத்து, துணை முதல்வர் பதவியை பெற்றுள்ளார். இது, ஒரு நடிகருக்கு அரசியலில் பெரிய அங்கீகாரத்தை விரைவாக பெற்றுத் தரும் உத்தி.
“நீங்கள் என்னை ஃபாலோ செய்து, தேசிய அளவில் உள்ள வலுவான கூட்டணியான அதிமுக தலைமையிலான தேசிய ஜனநாயக கூட்டணியில் இணையும்பட்சத்தில், ஆந்திராவில் எனக்கு கிடைத்தது போல், தமிழ்நாட்டிலும் உங்களுக்கு துணை முதல்வர் பதவி நிச்சயம் கிடைக்கும். இல்லையெனில், உங்கள் அரசியல் பயணத்தின் ஆரம்பக்கட்டமே வீணாகிவிடும்” என்ற தொனியில் பவன் கல்யாண் ஆலோசனை வழங்குவதாக தெரிகிறது.
விஜய் தனித்துப் போட்டியிட்டால் என்ன நடக்கும் என்பதற்கான எச்சரிக்கையாக, பவன் கல்யாண் தனது அண்ணன் சிரஞ்சீவியின் அரசியல் முடிவை குறிப்பிடுவதாக அரசியல் நோக்கர்கள் கருதுகின்றனர். நடிகர் சிரஞ்சீவி 2008-ஆம் ஆண்டு பிரஜா ராஜ்ஜியம் என்ற கட்சியை தொடங்கி பெரிய எழுச்சியை ஏற்படுத்தினார். ஆனால், தனியாளாக போட்டியிட்டு சில தொகுதிகளில் மட்டுமே வெல்ல முடிந்தது. இறுதியாக, கட்சியை அவர் காங்கிரஸுடன் இணைத்து, தனது அரசியல் பயணத்தை தோல்வியிலேயே முடித்தார்.
“மக்கள் மத்தியில் பெரிய மாஸ் இருந்தால் மட்டும் போதாது. அதை சரியான கூட்டணி பலத்தால் பதவியாக மாற்ற வேண்டும். இல்லையெனில், சிரஞ்சீவியின் அரசியல் பயணம்போல், மக்கள் ஆதரவு இருந்தும் பலன் இல்லாமல் போய்விடும்” என்பதே பவன் கல்யாண் விஜய் முன்வைக்கும் வாதத்தின் சுருக்கமாகும்.
ஆந்திராவில் இருந்து பவன் கல்யாண் அழைப்பு விடுக்க, தமிழ்நாட்டில் எதிர்க்கட்சி தலைவரும் அ.தி.மு.க.வின் பொதுச் செயலாளருமான எடப்பாடி பழனிசாமியும் விஜய்க்கு நேரடியாக அழைப்பு விடுத்துள்ளார் என்று தகவல் வெளியாகியுள்ளது. திராவிட கட்சிகளில் வலுவான சக்தியாக திகழும் அ.தி.மு.க., தி.மு.க.வை எதிர்க்கும் பொதுவான நோக்கத்தில், விஜய்யின் ‘தமிழக வெற்றிக் கழகத்தை’ ஒரு முக்கிய சக்தியாக பார்க்கிறது.
தமிழகத்தில் தி.மு.க.வின் ஆட்சிக்கு எதிராக போராட, அனைத்து எதிர்க்கட்சிகளும் ஒன்று சேர வேண்டும். தனித்து போட்டியிடுவதால் வாக்குகள் சிதறுமே தவிர, வெற்றி சாத்தியமாகாது” என்று எடப்பாடி பழனிசாமி தெரிவித்துள்ள கருத்துகள், விஜய்யை அ.தி.மு.க. கூட்டணியில் இணைத்துக்கொள்ளும் விருப்பத்தின் வெளிப்பாடாக பார்க்கப்படுகிறது.
பவன் கல்யாண் விடுத்த அழைப்பு பா.ஜ.க. கூட்டணியில் சேர வேண்டும் என்று மறைமுகமாக கூறியது. அ.தி.மு.க.வும், பா.ஜ.க.வுடன் தேர்தல் காலத்தில் கூட்டணி வைக்கும் நிலை ஏற்பட்டால், அக்கூட்டணியில் விஜய்க்கு முக்கிய இடம் அளிக்கப்படும் என்ற எதிர்பார்ப்பு நிலவுகிறது.
பவன் கல்யாணின் வெளிப்படையான அழைப்பு, எடப்பாடி பழனிசாமியின் மறைமுக அழைப்பு என சவால்கள் நிறைந்திருக்கும் சூழலில், நடிகர் விஜய்யின் முடிவு என்னவாக இருக்கும் என்பதே மில்லியன் டாலர் கேள்வியாகும். தற்போது வரை விஜய், திராவிட கட்சிகளுடனும், பா.ஜ.க.வுடனும் கூட்டணி இல்லை என்ற முடிவில் உறுதியாக இருப்பதாகவே தெரிகிறது. தனித்து போட்டியிடுவதே அவரது முதல் விருப்பமாக உள்ளது.
பவன் கல்யாண் காட்டிய துணை முதல்வர் பதவிக்கான பாதையும், சிரஞ்சீவியின் அரசியல் முடிவுக்கு பின்னால் இருக்கும் படிப்பினையும் விஜய்யை ஒருசேர யோசிக்க வைக்கும என்பதை பொறுத்திருந்து தான் பார்க்க வேண்டும். இருப்பினும், தமிழ்நாட்டின் அரசியல் கட்டமைப்பு ஆந்திராவில் இருந்து வேறுபட்டது. மக்கள் மத்தியில் உள்ள மாஸ், அரசியல் அனுபவத்தை வெல்லுமா? அல்லது பவன் கல்யாண் எச்சரித்ததுபோல், கூட்டணி பலமின்றி சிரஞ்சீவி நிலைமை ஏற்படுமா? 2026 சட்டமன்ற தேர்தலுக்கு முன் விஜய்யின் அதிரடி முடிவு, தமிழக அரசியலின் திசையை தீர்மானிக்கும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
