நடிகர் விஜய்யின் அரசியல் பிரவேசம், தமிழக வெற்றிக் கழகம் என்ற பெயரில் அடியெடுத்து வைத்த பிறகு, தமிழக அரசியல் களம் எதிர்பாராத திருப்பங்களை சந்தித்து வருகிறது. சமீபத்தில் கரூரில் நடந்த துயர சம்பவமும், அதனை தொடர்ந்து விஜய் பாதிக்கப்பட்ட மக்களை சந்திக்க செல்ல திட்டமிட்டுள்ள நிகழ்வும், தவெக-வின் எதிர்கால வியூகங்களை வெளிப்படுத்தும் ‘மாஸ்டர் பிளான்’ ஆக பார்க்கப்படுகிறது.
“விஜய்யை இனிமேல் ஓட வைக்கவும் முடியாது… ஒளிய வைக்கவும் முடியாது” என்ற அரசியல் விமர்சகர்களின் கருத்து, கரூர் சம்பவத்திற்கு முன்பாவது அவரை அரசியலில் இருந்து வெளியேற்ற ஒரு வாய்ப்பு இருந்தது. ஆனால் இனிமேல் அது நடக்கவே நடக்காது என்கின்றனர். விஜய் இனிமேல் மக்கள் மத்தியில் நிற்பதும், வெளிப்படையான அரசியல் செய்வதும் தவிர்க்க முடியாதது. கரூரில் அவர் சந்தித்த சவால், ஒரு அரசியல் தலைவராக அவர் இனி சந்திக்கும் சவால்களின் தொடக்கமே.
கரூரில் நடைபெற்ற துயர சம்பவத்தில் பாதிக்கப்பட்ட மக்களை சந்திக்க விஜய் இன்னும் செல்லாதது விமர்சனத்தை ஏற்படுத்தினாலும், அந்த சந்திப்பிற்காக தவெக நிர்வாகம் தீவிர முயற்சி எடுத்து வருகிறது. விஜய் எங்கெங்கு செல்கிறாரோ, அங்கெல்லாம் திரளும் கட்டுக்கடங்காத மக்கள் வெள்ளம், அவரது அரசியல் பயணத்தில் மிகப்பெரிய சவாலாக உருவெடுத்துள்ளது. சட்டம்-ஒழுங்கு பிரச்சனைகளை தவிர்க்க, அவர் அனுமதி பெற்று செல்ல வேண்டிய நிர்பந்தம் ஏற்பட்டுள்ளது.
இந்த நிலையில் கரூர் துயர சம்பவத்தில், மொத்தமாக 41 குடும்பங்கள் பாதிக்கப்பட்ட நிலையில் தவெக நிர்வாகம் ஒரு அதிரடி திட்டத்தை வகுத்து வருவதாக அரசியல் வட்டாரங்களில் பேசப்படுகிறது. அது தவெக-வின் அடிப்படை அரசியல் தத்துவம், “நேர்மையான, மக்கள் மத்தியில் உள்ள ஒரு சாமானியர்” அரசியலுக்கு வர வேண்டும் என்பதாகும். இதை நிரூபிக்கும் வகையில், 2026 சட்டமன்ற தேர்தலில், பாதிக்கப்பட்ட அந்த 41 குடும்பங்களில் இருந்து ஒருவரை கரூரின் சட்டமன்ற வேட்பாளராக நிறுத்த தவெக நிர்வாகம் பரிசீலித்து வருவதாக தகவல் வெளியாகியுள்ளது.
பாதிக்கப்பட்ட குடும்பத்தை சேர்ந்த ஒருவரை வேட்பாளராக நிறுத்தினால், அது மக்களுடன் தவெக-விற்கு ஒரு ஆழமான உணர்ச்சிபூர்வமான பிணைப்பை ஏற்படுத்தும் என்றும், விஜய்யின் முதல் பொது நிகழ்வுகளில் ஒன்றான இந்த துயர சம்பவம், கரூரில் தவெக-வின் அரசியல் அஸ்திவாரமாக மாறும் என்றும் கூறப்பட்டு வருகிறது.
பணம், அதிகாரம் இல்லாமல், துயரத்தில் இருந்து அரசியல் தளத்திற்கு வரும் ஒரு வேட்பாளர், ‘சாமானியர்களுக்கான அரசியல்’ என்ற விஜய்யின் முழக்கத்தை வலுப்படுத்தும். இந்த திட்டம் உண்மையாக நடந்தால், அது 2026 சட்டமன்றத் தேர்தலில் ஒரு மிகப்பெரிய திருப்புமுனையாக இருக்கும்.
தவெக-வின் ஆரம்பகட்ட நகர்வுகள், 2026 சட்டமன்ற தேர்தல் பல எதிர்பாராத திருப்பங்களை கொண்டிருக்கும் என்பதையே காட்டுகின்றன. விஜய்யின் வருகை, தமிழகத்தின் பிரதான திராவிடக் கட்சிகள் மற்றும் பாஜக-வுடனான கூட்டணி அரசியலில் பெரும் தாக்கத்தை ஏற்படுத்தும். ராகுல் காந்தி விஜய்யுடன் பேசியது, விஜய்யை பாஜக பக்கம் செல்லாமல் தடுப்பது மற்றும் திமுகவிடம் அதிக சீட்டுகள் பெறுவதற்கான காங்கிரஸ் கட்சியின் ‘பேரம் பேசும் அஸ்திரமாக பார்க்கப்பட்டது. தவெக வலுப்பெற்றால், திமுக மற்றும் அதிமுகவின் வாக்கு வங்கியில் பெரும் சிதைவு ஏற்படும்.
தற்போதைய நிலையில், 2026 தேர்தலில் தவெக தனித்து போட்டியிடவே அதிக வாய்ப்புகள் உள்ளன. இந்த கூட்டணி அரசியலை மீறி, மக்கள் சக்தியுடன் தனித்து நிற்கும் பிம்பத்தை விஜய் உருவாக்கினால், அது தமிழக அரசியலில் ஒரு புதிய பாய்ச்சலாக இருக்கும்.
தவெக நிர்வாகம், போராட்டங்கள் மற்றும் மக்களின் குரலை ஒலிப்பதில் ஆக்கப்பூர்வமாக செயல்படத் தொடங்கினால் மட்டுமே, ‘சினிமா புகழ் போதை’ அரசியல் என்ற விமர்சனத்தை விஜய் கடந்து செல்ல முடியும். விஜய் ஒரு முழுநேர அரசியல் கட்சி தலைவராக உருவெடுத்துள்ள நிலையில், இனிமேல் அவர் மக்களை கண்டு “ஓடவும் முடியாது, ஒளியவும் முடியாது”. அவர் தன்னுடைய கட்சியின் கொள்கைகள் மற்றும் செயல்பாடுகளை மிகவும் வெளிப்படையாக, வீரியமாக மக்கள் மத்தியில் எடுத்து செல்ல வேண்டும்.
கரூர் துயரச் சம்பவம், தவெக-வின் முதல் அக்னிப் பரீட்சை. இந்த சம்பவத்தை வெறும் ஆறுதல் கூறும் நிகழ்வாக இல்லாமல், பாதிக்கப்பட்ட குடும்பத்தில் இருந்து ஒருவரை வேட்பாளராக நிறுத்தும் ‘மாஸ்டர் பிளான்’ உண்மையானால், அது 2026 சட்டமன்ற தேர்தலில் ஒரு ‘கேம் சேஞ்சர்’ ஆக இருக்கும் என்பதில் சந்தேகமில்லை. தமிழக அரசியல், அடுத்த இரண்டு ஆண்டுகளில் ட்விஸ்ட் மேல் ட்விஸ்ட் நிறைந்த ஒரு திரைப்படத்தை போல இருக்கப்போவது உறுதி.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
