சமீபகாலமாக தமிழக அரசியல் களத்தில், நடிகர் விஜய்யை சுற்றியுள்ள கூட்டம், வெடிகுண்டு மிரட்டல்கள், மற்றும் கூட்டணி கட்சிகளுக்குள்ளான மோதல்கள் எனப் பல வினோதமான போக்குகள் நிலவி வருகின்றன. குறிப்பாக, கரூர் துயர சம்பவத்தின் பின்னணியில் விஜய் பாதிக்கப்பட்டவர்களைச் சந்திக்க செல்வதில் உள்ள சிக்கல்களும், பிற அரசியல் தலைவர்களின் கருத்துகளும் விவாதத்தை ஏற்படுத்தியுள்ளன.
விஜய், எங்கு சென்றாலும் கட்டுக்கடங்காத கூட்டம் கூடுகிறது. இந்த கூட்டம் யாருடைய கட்டுப்பாட்டிலும் இருப்பதில்லை. பிற எதிர்க்கட்சி தலைவர்களான எடப்பாடி பழனிசாமி, அண்ணாமலை, நயினார் நாகேந்திரன், அன்புமணி ராமதாஸ் ஆகியோர் நினைத்த இடத்துக்கு செல்ல முடியும் நிலையில், விஜய்யால் அவ்வாறு உடனடியாக செல்ல முடியவில்லை. “எங்க போனாலும் பேய் கூட்டம் வருது” என்ற நிலை உருவாகியுள்ளதால், சட்டம்-ஒழுங்கு பிரச்சனைகளை தவிர்க்க அவர் அனுமதி பெற்றுத்தான் செல்ல வேண்டியுள்ளது.
நடிகராக மட்டும் இருந்தபோது பாதிக்கப்பட்டவர்களை ரகசியமாக சந்திக்கும் பழக்கம் விஜய்க்கு இருந்தபோதிலும், இப்போது அவர் அரசியல் கட்சித் தலைவராக உருவெடுத்துள்ள நிலையில், அவரது வருகை குறித்த தகவல் பரவுவதால் கட்டுக்கடங்காத கூட்டம் கூடுகிறது. இது “தானாக வந்த, யாருக்கும் கட்டுப்படாத கூட்டம்” என்பதால், இதை சமாளிப்பதில் சிக்கல் ஏற்படுகிறது.
தமிழகத்தில் பொதுவாக அரசியல் கட்சிகளின் கூட்டங்களில் கூட்ட நெரிசல் ஏற்பட்டது கிடையாது. ஏனெனில் அங்கு இரண்டாம் கட்ட தலைவர்கள் சொன்னால் கேட்பார்கள், மேலும் பணம் கொடுத்து வரவழைக்கப்படும் கூட்டம் கட்டுப்பாட்டுடன் இருக்கும். ஆனால், விஜய்யின் கூட்டமோ, பஸ், மரம், டிரான்ஸ்ஃபார்மர், லைட் என எல்லாவற்றின் மீதும் ஏறும் அளவுக்கு கட்டுப்பாட்டை மீறுவதுதான் சிக்கலுக்கு காரணம்.
கரூர் துயர சம்பவத்தில் பாதிக்கப்பட்டவர்களை விஜய் இரண்டு வாரம் கழித்து சந்திக்க செல்லும் நிலையில், பல விதிமுறைகள் விதிக்கப்பட்டுள்ளன. ரசிகர்கள், பொதுமக்கள் அனுமதியின்றி, மண்டபத்தில் மட்டுமே சந்திப்பது, வீடியோ காட்சிகளை பகிராமல் இருப்பது போன்ற கட்டுப்பாடுகளுடன் அவர் பயணிக்கிறார்.
அண்ணாமலை, “யார் வேண்டுமானாலும் எங்கு வேண்டுமானாலும் போகலாம். இது ஒரு புதிய கலாச்சாரமாக இருக்க வேண்டாம்” என்று பொதுவாக கூறியது சரியானதே. ஆனால், விஜய்யின் பிரத்யேக சூழலை கருத்தில் கொண்டால், அவரது வருகையால் மறுபடியும் ஒரு பிரச்சனை வந்தால் யார் பொறுப்பு என்ற கேள்வி எழுகிறது. எனவே, அண்ணாமலை சொல்வது பொதுவான சூழ்நிலைக்கு சரியே, ஆனால் விஜய்யின் விவகாரத்தில் நடைமுறை சிக்கல்கள் அதிகம்.
மற்ற அரசியல் தலைவர்களுக்கு வருவது போன்ற கூட்டம் விஜய்க்கு வருவது இல்லை, கட்டுக்கடங்காத, கட்டுப்பாடற்ற கூட்டமாக இருப்பதால், அது விஜய்க்கும் அரசுக்கும் பெரும் சவாலாக இருக்கும். எப்படியோ இன்னொரு கரூர் சம்பவம் நடக்காதவாறு பார்த்து கொள்ள வேண்டிய பொறுப்பு விஜய்க்கும், அரசுக்கும் ஏன் மக்களுக்கும் உண்டு என்பதை மறந்துவிட வேண்டாம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
