விஜய், தனது தமிழக வெற்றிக் கழகத்தை தொடங்கி, 2026 சட்டமன்றத் தேர்தலை எதிர்கொள்ள தயாராகி வரும் நிலையில், தமிழக அரசியல் களம் இதுவரை கண்டிராத குழப்பமான நிலையை அடைந்துள்ளது. பாரம்பரியமாக இரு திராவிட கட்சிகளின் ஆதிக்கத்தில் இருந்த தேர்தல் முடிவுகளை, விஜய்யின் வருகை முற்றிலும் புரட்டி போட்டுள்ளது. தேர்தல் வல்லுநர்களும் அரசியல் ஆய்வாளர்களும் இந்தத் தேர்தலின் முடிவை ஊகித்து கூற முடியாமல் திணறி வருகின்றனர்.
2021 தேர்தல் வரை ஒன்று திமுக ஜெயிக்கும், அல்லது அதிமுக ஜெயிக்கும் என எளிதில் கணித்த கருத்துக்கணிப்பு நிபுணர்கள் தற்போதுள்ள அரசியல் சூழலில், த.வெ.க. தலைவர் விஜய்க்கு மக்கள் மத்தியில் எந்தளவுக்கு ஆதரவு இருக்கிறது என்பதை சரியாக மதிப்பிட முடியவில்லை என்பதே நிபுணர்களின் கருத்தாக உள்ளது.
விஜய் தனித்து போட்டியிடுவதால், அவருடைய செல்வாக்கு திரைப்பட ரசிகர்கள் மற்றும் இளைஞர்கள் மத்தியில் மட்டுமே குறுகியதாக இருந்து, இறுதியாக அவர் 10% வாக்குகளை மட்டுமே பெற்று, வெறும் வாக்குகளை பிரிக்கும் சக்தியாக மட்டுமே முடிவடையலாம்.
நடிகர் ரஜினிகாந்தின் அரசியல் வருகை நிகழாத நிலையில், விஜய்யின் இந்த திடீர் அரசியல் பிரவேசம், திராவிட கட்சிகளின் மீது சலிப்படைந்திருக்கும் வாக்காளர்களின் ஒட்டுமொத்த ஆதரவை பெற்று, ஒரு அசுர வெற்றியை பதிவு செய்து, அறுதி பெரும்பான்மையுடன் ஆட்சி அமைக்கும் வாய்ப்பும் உள்ளது.
இந்த இரண்டு உச்சக்கட்ட வாய்ப்புகளுக்கு இடைப்பட்ட எந்தவொரு முடிவையும் உறுதியாக கூற முடியவில்லை. அவருடைய ஒவ்வொரு பொதுக்கூட்டத்தின் திரளும், இளைஞர்கள் மத்தியில் நிலவும் உற்சாகமும் இந்த எதிர்பார்ப்பை மேலும் அதிகமாக்கியுள்ளன.
தமிழக அரசியல் வரலாற்றில், திராவிட கட்சிகள் ஒன்றுக்கொன்று மாறி மாறி முழு பெரும்பான்மையுடன் ஆட்சி அமைப்பதே வழக்கமாக இருந்து வந்தது. ஆனால், 2026 தேர்தலில் விஜய்யின் வருகை இந்த சமநிலையை உடைக்கும் அபாயத்தை உருவாக்கியுள்ளது.
தி.மு.க. மற்றும் அ.தி.மு.க. ஆகிய இரு கட்சிகளின் வாக்குகளையும் த.வெ.க. பிரிக்கும்போது, எந்தவொரு கட்சிக்கும் தெளிவான பெரும்பான்மை கிடைக்காமல் போகலாம். எந்த கூட்டணிக்கும் 118 இடங்கள் கிடைக்காத பட்சத்தில், தமிழகத்தில் முதல் முறையாக தொங்கு சட்டமன்றம் உருவாகும் நிலை ஏற்படலாம். இந்த சூழ்நிலையில், த.வெ.க. ஒரு ‘கிங்மேக்கர்’ ஆக மாறவும், சிறு கட்சிகளுடன் கூட்டணி அமைத்து ஆட்சி அமைக்கவும் வாய்ப்புள்ளது.
தேர்தல் நிபுணர்களுக்கு 2026 தேர்தல் ஒரு பெரும் குழப்பத்தை ஏற்படுத்தியுள்ளது. “விஜய்யின் தாக்கம் எந்தளவுக்கு இருக்கும் என்பதை எந்தவொரு பழைய தேர்தல் சூத்திரத்தின் மூலம் கணிக்க முடியவில்லை. இது ஒரு ‘x’ காரணி,” என பல ஆய்வாளர்கள் ஒப்புக்கொள்கிறார்கள்.
இந்த தேர்தல் கள நிலவரம் குறித்து நிபுணர்கள் குழப்பத்தில் இருந்தாலும், சாதாரண மக்கள் மத்தியில் எந்த குழப்பமும் இல்லை என்று பிரசாந்த் கிஷோரை போன்ற அரசியல் வியூக நிபுணர்கள் கருதுகின்றனர். நீண்ட காலமாக ஊழல் மற்றும் குடும்ப அரசியலில் சிக்கியுள்ளதாக கருதப்படும் இரு பிரதான திராவிட கட்சிகளில் இருந்து ஒரு மாற்று அரசியல் தலைமையை மக்கள் தேடுகின்றனர். மக்கள் தங்கள் மனதை தெளிவாக முடிவு செய்துள்ளனர். தற்போதைய கட்சிகள் தொடர வேண்டுமா அல்லது ஒரு புதிய மாற்றத்தை உருவாக்க விஜய்க்கு வாய்ப்பளிக்க வேண்டுமா என்பதில் அவர்களுக்குத் தெளிவு உள்ளது.
தேர்தல் வல்லுநர்களாலும் ஊடகங்களாலும் கணிக்க முடியாத ஒரு அமைதியான புரட்சியை வாக்காளர்கள் மனதில் விதைத்திருப்பதாகவே கள நிலவரங்கள் தெரிவிக்கின்றன. மக்களின் இந்த தெளிவான மனநிலையால், 2026 தமிழக சட்டமன்ற தேர்தல் முடிவு, இந்திய அரசியலுக்கே ஒரு புதிய திருப்புமுனையாக அமையும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
