பிக் பாஸ் தமிழ் சீசன் 9 நிகழ்ச்சி குறித்து பத்திரிகையாளர் உமாபதி அளித்த ஒரு பேட்டி தற்போது சமூக வலைதளங்களில் பரபரப்பாக விவாதிக்கப்படுகிறது. இந்த நேர்காணலில் அவர் பிக் பாஸ் நிகழ்ச்சி மீதான தனது விமர்சனங்களையும், போட்டியாளர்களின் பின்னணி மற்றும் சம்பள கணக்குகள் குறித்தும் ஆணித்தரமாக கருத்துகளை பதிவு செய்துள்ளார்.
சமீபத்தில் பிக் பாஸ் வீட்டில் திவாகர் மற்றும் பார்வதி இடையே நடந்த மோதல் குறித்து உமாபதி தன் கருத்தைப் பதிவு செய்தார். இந்த சண்டை முற்றிலும் பிக் பாஸ் ஸ்கிரிப்ட் செய்தது போல இருப்பதாக அவர் கூறுகிறார். டி.ஆர்.பி-க்காக வேண்டுமென்றே உணர்ச்சிவசப்பட்ட காட்சிகளை உருவாக்குகிறார்கள் என்று விமர்சிக்கிறார்.
பார்வதி மற்றும் கெமி சண்டையிட்ட விதம் ஒரு செயற்கை தன்மையுடன் இருப்பதாக அவர் கூறுகிறார். ‘உன்னை தள்ளிவிட்டது’ என்று பார்வதி சொல்வது கூட, உண்மையற்றது போலவும், கவனத்தை ஈர்க்கும் செயல் போலவும் தெரிவதாக அவர் குறிப்பிட்டார்.
உண்மையில் ஒரு மோதல் ஏற்பட்டால், போட்டியாளர்கள் அவ்வளவு எளிதில் விட்டுக்கொடுக்கவோ அல்லது மறக்கவோ மாட்டார்கள். ஆனால், அடுத்த காட்சியில் அவர்கள் சாதாரணமாக செல்வது, இவை அனைத்தும் ஒரு நாடகத்தின் பகுதியே என்பதை உறுதிப்படுத்துவதாக உமாபதி வாதிடுகிறார்.
போட்டியாளர்களின் உண்மைத்தன்மை மற்றும் அவர்களுக்கு வழங்கப்படுவதாக கூறப்படும் சம்பளம் குறித்தும் உமாபதி சில கேள்விகளை எழுப்பினார். பிரபலங்கள் பிக் பாஸ் வீட்டிற்கு வருவது அவர்களுக்கு கிடைக்கும் சம்பளத்திற்காக மட்டுமே என்றும், மக்கள் மத்தியில் தங்கள் பிரபலத்தை புதுப்பித்துக் கொள்வது தான் அவர்களின் முதன்மை நோக்கம் என்றும் அவர் தெரிவித்தார்.
நிகழ்ச்சியில் சிலரால் ‘பலூன் அக்கா’ என்று கேலி செய்யப்படும் போட்டியாளர் ஒருவருக்கு 40 லட்சம் ரூபாய் சம்பளமாக வழங்கப்படுவதாக கூறப்படும் தகவலை அவர் குறிப்பிட்டு, அது எந்த அளவுக்கு உண்மை என்று கேள்வி எழுப்பினார். ஒரு போட்டியாளருக்கு இவ்வளவு பெரிய தொகை கொடுக்கப்படுவது உண்மையென்றால், அது அவர் நிகழ்ச்சிக்காக கொண்டு வரும் பிரபலம் அல்லது ‘கன்டென்ட்’ மதிப்பின் அடிப்படையில்தான் இருக்கும் என்று அவர் குறிப்பிட்டார்.
திவாகர் போன்ற போட்டியாளர்கள் தற்போதுள்ள ஆவேசமான நிலையில் இருந்து, சில நாட்களில் சாமியார் போன்று மிகவும் சாந்தமாக நடிக்க ஆரம்பிப்பார்கள் என்றும், இது பிக் பாஸ் வீட்டில் வழக்கமாக நடக்கும் மாற்றம் என்றும் உமாபதி கிண்டலாக கூறுகிறார்.
பிக் பாஸ் நிகழ்ச்சி ஒரு காலத்தில் ஒரு சமூகப் பரிசோதனையாக பார்க்கப்பட்டது என்றும், ஆனால் தற்போது அது முற்றிலும் டி.ஆர்.பி-ஐ மட்டுமே மையமாக கொண்ட ஒரு வணிக நாடகமாக மாறிவிட்டது என்றும் உமாபதி வருத்தம் தெரிவித்தார்.
சாதாரண மக்களின் உணர்ச்சிகள் மற்றும் மனநிலை ஆகியவற்றை காசாக்கும் விதமாக இந்த நிகழ்ச்சி வடிவமைக்கப்பட்டுள்ளதாக அவர் குற்றம் சாட்டினார். வீட்டின் உள்ளே நடக்கும் சண்டைகள் மற்றும் பிரச்னைகள், ரசிகர்களை பிணைத்து வைக்கவே உருவாக்கப்படுகின்றன என்று கூறி, இந்த நிகழ்ச்சி தமிழ் தொலைக்காட்சி வரலாற்றில் அதன் தரத்தை இழந்து விட்டதாக அழுத்தமாக பதிவு செய்கிறார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
