பிக் பாஸ் தமிழ் நிகழ்ச்சியின் ஒன்பதாவது சீசன் கோலாகலமாக தொடங்கியுள்ளது. இந்த சீசனின் ஆரம்பமே ரசிகர்களுக்கு ஆச்சரியத்தை அளித்துள்ளது. போட்டியாளர்கள் அறிமுகம் செய்யப்பட்ட முதல் நாளில் சிரித்த முகத்துடன் காணப்பட்ட போட்டியாளர்கள், நேற்று ஒளிபரப்பான முதல் நாளிலேயே சண்டையை தொடங்கிவிட்டது இந்த சீசனுக்கு பரபரப்பான தொடக்கத்தை கொடுத்துள்ளது.
இந்த ஆரம்பகட்ட சண்டைகள் கிட்டத்தட்ட அனைத்தும் திவாகர் என்ற ஒரே ஒரு போட்டியாளரை மையப்படுத்தியே வருகின்றன என்பதுதான் இங்கு கவனிக்கத்தக்க முக்கியமான விஷயம்.
பிக் பாஸ் வீட்டில் நேற்று முதல், திவாகரின் தொடர்ச்சியான நடவடிக்கைகள் சக போட்டியாளர்கள் மட்டுமின்றி, நிகழ்ச்சியை பார்க்கும் பார்வையாளர்கள் மத்தியிலும் பெரும் எரிச்சலை ஏற்படுத்தி வருகின்றன. அவரது நடவடிக்கைகள் சில:
தன்னைத் தானே உயர்வாகப் பேசிக்கொள்வது, தான் மருத்துவம் படித்திருப்பதாக கூறி அதனை மீண்டும் மீண்டும் வலியுறுத்துவது. இந்த வீட்டிலேயே நான் தான் அதிகம் படித்தவன் என்று வெளிப்படையாக கூறி மற்றவர்களை தரக்குறைவாக நடத்துவது. தன்னைத் தானே ‘நடிப்பு அரக்கன்’ என்று அழைத்துக்கொள்வது. யார் பேசினாலும், அந்த கருத்தை முழுமையாக மறுத்து, தனது கருத்தையே அவர்கள் மீது வலுக்கட்டாயமாகத் திணிப்பது. பிக் பாஸ் போட்டியாளர்களிலேயே தான் மட்டுமே ‘மரத்தமிழன்’ என்றும், மற்றவர்கள் அதனைபோல் இல்லை என்றும் பேசி, மற்ற போட்டியாளர்கள் மத்தியில் வெறுப்பை ஏற்படுத்துவது.
திவாகரின் இந்த தொடர் ஆதிக்க பேச்சுகளும், மற்றவர்களை குறைத்து மதிப்பிடும் பாவனைகளும் முதல் நாளே கடுமையான விவாதங்களையும் சண்டைகளையும் தூண்டியுள்ளன. பிக் பாஸ் வீட்டில் திவாகர் எரிச்சலை உண்டாக்கினாலும், அவர் தான் இந்த சீசனின் ‘கன்டென்ட் கிங்’ என்பதை விஜய் டிவியின் சமீபத்திய நடவடிக்கைகள் உறுதிப்படுத்துகின்றன.
தினமும் ஒளிபரப்பாகும் மூன்று ப்ரோமோ வீடியோக்களில் மூன்றுமே திவாகரின் சண்டை மற்றும் சர்ச்சைகளை மையப்படுத்தியே உள்ளன. இதன் மூலம், இந்த சீசனுக்கு அதிக டி.ஆர்.பி ஏற்றித் தருவது திவாகர்தான் என்பது தெளிவாகிறது. ஒரு மணி நேரம் ஒளிபரப்பாகும் எபிசோடுகளில் அவரது காட்சிகள் அதிகளவில் இடம்பெறுகின்றன. 24 மணி நேர லைவ் நிகழ்ச்சிகளிலும் திவாகரை நோக்கியே பெரும்பாலான கேமராக்கள் இயக்கப்படுகின்றன.
திவாகரின் இந்தத் தொடர் சண்டைகள் மற்றும் ஆக்ரோஷமான விவாதங்கள் தான் தற்போது நிகழ்ச்சியின் மையமாக இருப்பதால், எப்படியும் 90 நாட்கள் வரை அவரை நிகழ்ச்சியில் தக்கவைத்துக் கொள்ள விஜய் டிவி முனைப்பு காட்டும் என்று எதிர்பார்க்கின்றது. ஏனெனில், அவர் வெளியேற்றப்பட்டால், இந்த சீசன் சுவாரஸ்யம் இழந்துவிடக்கூடும் என்ற அச்சம் நிகழ்ச்சி நிர்வாகத்திடம் இருக்கலாம்.
இந்த நிலையில் இன்று வெளியான ஒரு ப்ரோமோ வீடியோவில், திவாகருடன் கிட்டத்தட்ட ஒட்டுமொத்த போட்டியாளர்களும் ஒரே நேரத்தில் சண்டை போடும் காட்சி இடம் பெற்றுள்ளது.
ஒரு கட்டத்தில், சக போட்டியாளரான கம்ருதீன் கிட்டத்தட்ட திவாகரை அடிக்கக் கை ஓங்கும் நிலைக்கு செல்கிறார். இதற்கு திவாகரும் சற்றும் அஞ்சாமல் எதிர்த்து நிற்கிறார். அதேபோல் திவாகரை அடிக்க கை ஓங்குகிறார்.
இந்த ஆக்ரோஷமான காட்சிகள், முதல் வாரத்திற்குள்ளேயே பிக் பாஸ் வீட்டில் வன்முறை சம்பவம் ஏதேனும் நிகழுமோ என்ற பரபரப்பை ரசிகர்கள் மத்தியில் ஏற்படுத்தியுள்ளது.
இந்த பரபரப்பான நிகழ்வுகள் அனைத்தையும் பார்த்து கொண்டிருக்கும் நிகழ்ச்சி தொகுப்பாளர் விஜய் சேதுபதி, வரும் சனிக்கிழமை எபிசோடில் போட்டியாளர்களை எப்படி சமாளிக்கப் போகிறார் என்பதே அனைவரின் எதிர்பார்ப்பாக உள்ளது. திவாகருக்கு மட்டுமே அவர் ஸ்பெஷல் ட்ரீட்மென்ட் கொடுத்து, அவரது ஆக்ரோஷமான நடவடிக்கைகளுக்கு கண்டனம் தெரிவிப்பாரா? அல்லது, அனைத்து போட்டியாளர்களையும் ஒருசேர “வறுத்து எடுத்து” தனது பாணியில் அறிவுரை வழங்குவாரா? இந்தக் கேள்விகளுக்கான பதில் இந்த வார இறுதியில் தெரியவரும். மொத்தத்தில், திவாகர் தான் தற்போது பிக் பாஸ் 9 சீசனின் அச்சாணியாக மாறியுள்ளார் என்பதில் எந்த சந்தேகமும் இல்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
