கரூர் பொதுக்கூட்டத்தில் நிகழ்ந்த சோகமான நெரிசல் சம்பவத்தில், பாஜகவின் மத்திய தலைமை ஒரு உண்மை கண்டறியும் குழுவை அமைத்தது. இந்த செயல், சம்பவத்தின் உண்மைகளை கண்டறிவதை விட, முழுக்க முழுக்க அரசியல் நோக்கத்திற்காகவே செய்யப்பட்டுள்ளதா என்ற கேள்வியை எழுப்பியுள்ளது.
சட்டம் மற்றும் நிர்வாக நடைமுறைகளின்படி, ஒரு துயர சம்பவம் நடந்தால், அதன் உண்மை நிலையை ஆராயவும், பொறுப்பானவர்கள் மீது நடவடிக்கை எடுக்கவும் தெளிவான சட்டபூர்வமான வழிமுறைகள் உள்ளன. அப்படியிருக்க, அதிகாரமற்ற ஒரு அரசியல் குழுவால் உண்மையில் என்ன நன்மை விளைய முடியும்?
ஒரு சம்பவம் நடந்த உடனேயே, அதை விசாரித்து நடவடிக்கை எடுக்க தமிழ்நாட்டின் சட்ட மற்றும் நிர்வாக அமைப்புகள் உள்ளன: உடனடியாக முதல் தகவல் அறிக்கை பதிவு செய்யப்பட்டு, குற்றவியல் விசாரணை தொடங்கியுள்ளது. இதில் கைது, சாட்சியங்களை சேகரித்தல், நீதிமன்றத்தில் குற்றப்பத்திரிகை தாக்கல் செய்தல் ஆகியவை அடங்கும்.
பாதிக்கப்பட்டவர்கள் அல்லது எதிர்க்கட்சிகள் நேரடியாக நீதிமன்றத்தை அணுகி, வழக்குப்பதிவு செய்யவும், நீதித்துறை விசாரணையை கோரவும் வழி உண்டு.
சம்பவம் ஒரு குறிப்பிட்ட சமூக குழுவை பாதித்தால், தேசிய/மாநில மனித உரிமைகள் ஆணையம், தேசிய/மாநில பட்டியல் சாதிகள்/பழங்குடியினர் ஆணையம் போன்ற சட்டபூர்வமான அமைப்புகள் தாமாக முன்வந்து (Suo Moto) விசாரணையைத் தொடங்க முடியும். இப்படியாக வலிமையான கட்டமைப்புகள் இருக்கும்போது, ஒரு அரசியல் கட்சி அமைக்கும் குழுவால் என்ன பயன்?
பாஜகவின் உண்மை கண்டறியும் குழு, தனது விசாரணையின் முடிவில், “கரூர் சம்பவத்துக்கு விஜய் அல்லது தமிழ்நாடு அரசுதான் காரணம்” என்று கண்டுபிடித்தால் கூட, அந்த குழுவால் சட்ட ரீதியான நடவடிக்கை எதையும் எடுக்க முடியாது.
இந்த குழுவுக்கு காவல்துறையை போல ஒருவரை கைது செய்யும் அதிகாரம் இல்லை. அவர்கள் அதிகபட்சம் ஓர் அறிக்கையை தயாரித்து, அதை தங்கள் கட்சியின் தலைமைக்கு மட்டுமே சமர்ப்பிக்க முடியும்
ஒருவேளை ஆளுங்கட்சி மீது தவறு இருப்பதாக இந்த குழு கண்டுபிடித்தால், ஆளுங்கட்சி மீது நடவடிக்கை எடுக்க, மத்திய அரசுக்கு நெருக்கடி கொடுக்க இந்த அறிக்கை பயன்படலாம். ஆனால், ஆளுங்கட்சி அமைச்சர்கள், அதிகாரிகள் மீது நடவடிக்கை எடுக்க வேண்டுமானால், அது மீண்டும் காவல்துறை விசாரணை, நீதிமன்றம், அல்லது ஆளுநரின் ஒப்புதல் மூலமாக மட்டுமே சாத்தியமாகும்.
எனவே, இதுபோன்ற குழுக்களின் ஒரே நோக்கம், ஆளுங்கட்சிக்கு அரசியல் நெருக்கடி கொடுப்பது, தங்கள் கட்சிக்கு சாதகமான ஒரு சூழலை உருவாக்குவது, மற்றும் சம்பவத்தை தேசிய அளவில் கவனத்திற்கு கொண்டு செல்வது மட்டுமேயாகும்.
இது, “நாங்கள் பாதிக்கப்பட்டவர்களுக்கு ஆதரவாக இருக்கிறோம்” என்று மக்கள் மத்தியில் தோற்றத்தை ஏற்படுத்த, ஒரு கண் துடைப்பு நடவடிக்கையாகவே கருதப்படுகிறது.
பாஜக அமைக்கும் குழுவில், மாநிலத்துக்கு வெளியே இருந்து, தமிழே தெரியாத உறுப்பினர்கள் உள்ளனர். தமிழகத்தில் நடந்த ஒரு சம்பவத்தை அவர்கள் எப்படி சரியாக விசாரிப்பார்கள் என்ற அடிப்படைக் கேள்வி எழுகிறது.
சம்பவத்தின் சாட்சிகள், பாதிக்கப்பட்டவர்கள், மற்றும் உள்ளூர் பொதுமக்கள் பெரும்பாலும் தமிழில் மட்டுமே பேசுவார்கள். தமிழ் மொழி தெரியாத ஒரு குழு, துயரத்தில் இருக்கும் மக்களிடம் இருந்து துல்லியமான தகவல்களை புரிந்துகொள்ளவோ அல்லது பெறவோ முடியாது.
உள்ளூர் அரசியல் சூழல், நிர்வாக நடைமுறைகள் மற்றும் பண்பாட்டு அம்சங்களை தமிழின் துணை இல்லாமல் புரிந்துகொள்வது கடினம். இதனால், விசாரணை ஆழமின்றி கடமைக்கு செய்யப்படும் ஒன்றாகவே அமையும்.
உள்ளூர் மக்கள், தங்களின் மொழியை பேசாத ஒரு குழுவிடம் தங்கள் துயரத்தை பகிர்ந்துகொள்ளவோ அல்லது உண்மையை வெளிப்படுத்தவோ தயங்குவார்கள். இது, குழுவின் விசாரணை நம்பகத்தன்மையை குறைக்கும்.
அரசியல் கட்சிகளால் அமைக்கப்படும் உண்மை கண்டறியும் குழுக்களின் அறிக்கைகள், நீதிமன்றத்தில் சட்டப்பூர்வமான சாட்சியமாக எடுபடாது.
மொத்தத்தில் கரூர் சம்பவத்தில் பாஜகவின் உண்மை கண்டறியும் குழு அமைக்கப்பட்டதன் முழு நோக்கமும் அரசியல் ஆதாயமே என்பதில் சந்தேகம் இல்லை. துயரத்தில் இருக்கும் மக்களின் நியாயமான கேள்விகளுக்கு பதிலளிப்பதை விட, ஆளும் திமுக அரசுக்கும், புதிய அரசியல் சக்தியான விஜய்க்கும் எதிராக ஒரு அரசியல் ஆயுதத்தை கையிலெடுக்கவே இந்த குழு பயன்படுகிறது. உண்மையான நீதி கிடைக்க, சட்ட அமைப்புகளும் நீதிமன்றங்களுமே நம்பகமான வழிகளாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
