அரசியல் களத்தில் கரூரில் நடந்த துயர சம்பவம், பல்வேறு கேள்விகளையும் சந்தேகங்களையும் எழுப்பியுள்ளது. இது ஒரு சாதாரண விபத்தா அல்லது திட்டமிட்ட சதியா என்பது குறித்த விவாதங்கள் சமூக வலைத்தளங்களில் சூடுபிடித்துள்ளன. குறிப்பாக, பல்வேறு முரண்பாடான தகவல்கள் இந்த விபத்தின் பின்னணியில் உள்ள மர்மத்தை அதிகரிக்கின்றன.
விஜய்யை ஹீரோவாகவோ அல்லது தலைவராகவோ பார்க்கும் ஒரு ரசிகரோ, தொண்டரோ செருப்பெடுத்து வீசுவார்களா? ரசிகர் கூட்டத்தில் ஊடுருவிய சமூக விரோதிகளால் திட்டமிட்டு நிகழ்த்தப்பட அதிக வாய்ப்பு இருக்கலாமா?
ஒரு அரசியல் கட்சி நடத்தும் கூட்டத்தில், போதிய பாதுகாப்பு ஏற்பாடுகளை செய்யாதது ஏன்? விஜய்யின் முந்தைய கூட்டங்கள் பெரும் மக்கள் கூட்டத்தை ஈர்த்துள்ளன என்பதை உளவுத்துறை அறிந்திருந்தும், அதற்கேற்ப போதுமான பாதுகாப்பு ஏற்பாடுகளை செய்யாதது ஏன்? 10,000 பேர் வருவார்கள் என அனுமதி கோரப்பட்ட இடத்தில், 25,000 முதல் 27,000 பேர் திரண்டபோது, நிலைமையை கட்டுக்குள் கொண்டுவர ஏன் கூடுதல் காவலர்கள் அழைக்கப்படவில்லை? என்ற கேள்விகளையும் சமூக ஆர்வலர்கள் எழுப்பி வருகின்றனர்.
விசாலமான இடத்தில் அனுமதி கோரப்பட்டபோதும், குறுகலான வேலுசாமிபுரம் இடத்தில் அனுமதி அளித்தது ஏன்? இத்தகைய குறுகலான இடம் ஒரு பெரிய கூட்டத்துக்கு உகந்தது அல்ல என்று தெரிந்தும், ஏன் அந்த இடத்தை காவல்துறை பரிந்துரைத்தது? கூட்டத்தை கட்டுக்குள் கொண்டுவர லத்தி சார்ஜ் போன்ற கடுமையான நடவடிக்கைகளை எடுத்தது ஏன்? இந்த அனைத்து கேள்விகளும், காவல்துறை அலட்சியமாக நடந்துகொண்டதா அல்லது ஆளும் கட்சியின் அழுத்தம் காரணமாக நடந்துகொண்டதா? அல்லது எதிர்பாராமல் நடந்த ஒரு நிகழ்வுக்கு காவல்துறையை தவறான புரிதலால் குற்றம் சாட்டுகின்றார்களா? என்ற கேள்விகளும் எழும்புகின்றன.
இந்த விபத்தின்போது, திடீரென மின்சாரம் துண்டிக்கப்பட்டது, ஒலிபெருக்கிகள் வேலை செய்யவில்லை, மற்றும் ஆம்புலன்ஸ்கள் கூட்ட நெரிசலில் சிக்கிய சம்பவங்கள் நடந்ததாக தகவல்கள் கூறுகின்றன. இந்த நிகழ்வுகள் அனைத்தும் ஒரு சதியின் பகுதியா என்ற கேள்வியை எழுப்புகிறது. செருப்பு வீச்சு, மின் வெட்டு, லத்தி சார்ஜ் என அனைத்தும் ஒரே நேரத்தில் நடந்தது தற்செயலாக இருக்க முடியாது என்று பல அரசியல் பார்வையாளர்கள் கருத்து தெரிவித்துள்ளனர்.
ஆனால் அதே நேரத்தில் அனுபவமிக்க அரசியல் தலைவர்கள் எவ்வாறு கூட்டத்தை திட்டமிட்டு நடத்துகிறார்கள் என்பதை விஜய் ஒரு பாடமாக கற்றுக்கொள்ள வேண்டும். சரியான நேரத்தில் கூட்டத்துக்கு வருவது, தொண்டர்களுக்கு போதுமான வசதிகளை செய்து தருவது, கூட்டத்தை கட்டுப்படுத்த வலுவான தன்னார்வலர் குழுவை உருவாக்குவது போன்றவற்றை அவர் நிச்சயம் செய்திருக்க வேண்டும்.
இந்த சம்பவம், விஜய்க்கு எதிராக ஆளும் கட்சி அரசியல் ரீதியான அழுத்தங்களை ஏற்படுத்த வாய்ப்புள்ளது. வழக்குகள், கைது என பல நடவடிக்கைகளை மேற்கொள்ள வாய்ப்பு உள்ளது. ஆனாலும், இதை அவர் எதிர்கொள்ள வேண்டும். அரசியலில் எதிரியை ஒழிக்க வேண்டும் என்பதுதான் எழுதப்படாத விதி. அதை எப்படி சமாளிப்பது என்பதை புதியதாக அரசியலுக்கு வருபவர்கள் தெரிந்து கொள்ள வேண்டும்.
இந்த சம்பவம் விஜய்க்கும் அவரது கட்சிக்கும் ஒரு பெரும் பின்னடைவு, கருப்பு புள்ளி என்றாலும், எம்ஜிஆர் மற்றும் ஜெயலலிதா போன்ற தலைவர்கள் மீது அரசியல் ரீதியாக தொடுக்கப்பட்ட தாக்குதல்கள், அவர்களை மக்களிடம் இன்னும் நெருக்கமாக்கியதை போல, விஜய்க்கும் அது நிகழ வாய்ப்பு உள்ளது. ஒருவேளை கைது நடவடிக்கை எடுக்கப்பட்டால், அது அவருக்கு அனுதாப அலையை ஏற்படுத்தி, அவரை ஒரு ‘புரட்சித் தலைவர்’ நிலைக்கு உயர்த்தக்கூடும்.
இந்த சம்பவம், விஜய்யின் அரசியல் பாதையில் ஒரு சோதனைக்காலமாக அமைந்தாலும், அவர் இதிலிருந்து மீண்டு வந்து தன்னை ஒரு வலிமையான தலைவராக நிலைநிறுத்திக்கொள்வாரா என்பதை பொறுத்திருந்து பார்ப்போம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
