தமிழக அரசியலில் ஒரு வாரத்தில் நடந்த இரண்டு முக்கிய நிகழ்வுகள், ஊடகங்கள் மற்றும் எதிர்க்கட்சிகளின் பங்கு குறித்து மூத்த பத்திரிகையாளர் திரு. மணி அவர்கள் கார்த்திக்குடன் விவாதிக்கிறார்.
வள்ளியூரில் பொது இடத்தில் கருணாநிதி சிலை வைப்பதற்கு சென்னை உயர் நீதிமன்றம் தடை விதித்தது. இதை எதிர்த்து தமிழக அரசு உச்ச நீதிமன்றத்திற்கு மேல்முறையீடு செய்தது. இந்த வழக்கை விசாரித்த உச்ச நீதிமன்ற நீதிபதிகள், இறந்த தலைவர்களுக்கு அரசு செலவில் சிலை வைப்பது ஏற்புடையதல்ல என்றும், அது பொது பணத்தை வீணடிப்பதாகும் என்றும் தெரிவித்தனர். மேலும், உயர் நீதிமன்றத்தின் தீர்ப்பில் தலையிட முடியாது என கூறி, தமிழக அரசின் மனுவை தள்ளுபடி செய்தனர். தலைவர்களின் சிலைகளை ஒரே பூங்காவில் அமைக்கும் யோசனையையும் நீதிபதிகள் முன்வைத்தனர்.
அதேபோல் தொகுப்பூதியத்தில் பணிபுரியும் செவிலியர்களுக்கு, பணி நிரந்தரம் செய்யப்பட்ட செவிலியர்களுக்கு இணையாக சம்பளம் வழங்க வேண்டும் என சென்னை உயர் நீதிமன்றம் உத்தரவிட்டது. இந்த உத்தரவை எதிர்த்து தமிழக அரசு உச்ச நீதிமன்றத்திற்கு சென்றது. அப்போது, உச்ச நீதிமன்றம் “நீங்கள் சுரண்டல் அரசு” என்றும், “இலவசங்களுக்கு மட்டும் எங்கிருந்து பணம் வருகிறது?” என்றும் கடுமையாக கண்டனம் தெரிவித்தது. இந்த இரண்டு நிகழ்வுகளையும் சுட்டிக்காட்டிய மூத்த பத்திரிகையாளர் மணி இந்த இரண்டு முக்கிய நிகழ்வுகளும் ஊடகங்களில் முறையாக விவாதிக்கப்படவில்லை என்றும் குறைந்தபட்சம் செய்தியாக கூட வரவில்லை என்றும் வருத்தம் தெரிவிக்கிறார். உச்ச நீதிமன்றத்தின் கண்டனங்கள் கூட முக்கியத்துவம் பெறவில்லை என்பது ஊடகங்கள் மீதான நம்பிக்கையை கேள்விக்குள்ளாக்குகிறது என்று அரசியல் விமர்சகர்களும் ஊடகங்கள் மீதான தங்களுடைய கருத்துக்களை தெரிவித்து வருகின்றனர்.
மேலும் கிட்னி திருட்டு தொடர்பாக வழக்கு விசாரணையை கண்காணிக்க ஒரு சிறப்பு புலனாய்வுக் குழுவை அமைக்குமாறு உயர் நீதிமன்றம் உத்தரவிட்டது. ஆனால் இந்த உத்தரவை எதிர்த்து தமிழக அரசு உச்ச நீதிமன்றம் சென்றது. ஒரு மாநில அரசு, ஒரு குற்றத்தை விசாரிக்க கூடாது என்று உச்ச நீதிமன்றம் செல்வது மிகவும் ஆபத்தான போக்கு என்று மணி சுட்டி காட்டுகிறார்.
இந்த விவகாரங்கள் அனைத்தையும் எதிர்க்கட்சிகள் குறிப்பாக அதிமுக மற்றும் பாஜக மக்கள் மத்தியில் கொண்டு செல்ல தவறிவிட்டன என மணி குற்றம்சாட்டுகிறார். ஒரு வலுவான எதிர்க்கட்சி, ஆளுங்கட்சியின் தவறுகளை வெளிச்சத்திற்கு கொண்டு வருவதன் மூலம் ஜனநாயகத்தை பாதுகாக்க வேண்டும். ஆனால் தமிழகத்தில் எதிர்க்கட்சிகள் பலவீனமாக இருப்பது ஜனநாயகத்திற்கு பெரும் அச்சுறுத்தலாக உள்ளது.
ஊடகங்கள் மற்றும் எதிர்க்கட்சிகளின் இந்த மௌனம், ஆளுங்கட்சியின் பலத்தை அதிகரிப்பதாக தெரிகிறது. மக்கள் மத்தியில் விழிப்புணர்வை ஏற்படுத்த வேண்டியவர்கள் தங்கள் கடமையில் இருந்து தவறுவதாக மணி கூறுகிறார். எதிர்காலத்தில், இது ஒரு ஆரோக்கியமான ஜனநாயகம் இல்லாமல்போக வழிவகுக்கும் என்றும் அவர் எச்சரிக்கிறார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
