ரஷ்யா போலந்தில் ட்ரோன் தாக்கியதாக சொல்லப்படும் விவகாரம் ஒரு யதார்த்தமான கேள்விக்கு இட்டுச் செல்கிறது: நேட்டோ ஏன் ரஷ்யாவுடன் நேரடிப் போரை விரும்புகிறது?
ரஷ்யா – உக்ரைன் போர் கடந்த சில ஆண்டுகளாக நடைபெற்று கொண்டிருக்கும் நிலையில், இந்த போருக்கு மூல காரணம், உக்ரைன் நேட்டோவில் சேர விரும்பியதே எனலாம். உக்ரைன் ஒரு நடுநிலை நாடாக இருந்திருந்தால், இந்த சிக்கல் எழுந்திருக்காது. ஆனால், 2014-ல் மேற்குலக நாடுகள், குறிப்பாக அமெரிக்கா, உக்ரைனில் ஆட்சி மாற்றத்தை ஏற்படுத்தி, ஒரு கைப்பாவையை அதிகாரத்தில் அமர்த்தின.
ரஷ்யாவுக்கும் உக்ரைனுக்கும் இடையே சில மோதல்கள் இருந்தாலும், 2014-க்கு முன்பு பெரிய போர் எதுவும் இல்லை. ஆனால், ரஷ்ய மொழி பேசும் சிறுபான்மையினர் மீது உக்ரைன் தொடர்ந்து தாக்குதல்களை நடத்தியதால், ரஷ்யா ராணுவ நடவடிக்கையை தொடங்கியது. இந்த சூழ்நிலையில், “போர்தான் முடிவு என்றால், முதல் அடியை நாம் அடிக்க வேண்டும்” என்ற புதினின் வார்த்தைகள் முக்கியத்துவம் பெறுகின்றன. உக்ரைன் நேட்டோவில் சேர்ந்த பிறகு ரஷ்யா தாக்குதல் நடத்தியிருந்தால், அது ரஷ்யா Vs நேட்டோ போர் என்ற பெரும் யுத்தமாக மாறியிருக்கும்.
உக்ரைன் அதிபர் ஜெலன்ஸ்கி ஒரு கைப்பாவைபோல செயல்படுகிறார் என்றும், அவர் அதிகாரத்தில் இருந்தால், தேர்தல் நடத்தவோ அல்லது ரஷ்யாவுடன் அமைதி பேச்சுவார்த்தை நடத்தவோ முடியாது என்றும் புதின் வாதிடுகிறார்.
ரஷ்யா-உக்ரைன் மோதல் ஒருபுறம் இருக்க, மத்திய கிழக்கில் பதட்டம் அதிகரித்துள்ளது. இஸ்ரேல், கத்தார் மீது தாக்குதல் நடத்தியது. கத்தார், அமெரிக்காவின் கூட்டாளி நாடு என்பது குறிப்பிடத்தக்கது.
பாகிஸ்தானில் அமெரிக்க ராணுவத்தின் ராணுவத்தளம் அருகில் பின்லேடன் மறைந்திருந்தும், பாகிஸ்தான் எந்த நடவடிக்கையும் அமெரிக்கா எடுக்கவில்லை. ஆனால் அதன்பின், பாகிஸ்தானுக்குள் நுழைந்து அமெரிக்கா பின்லேடனை கொன்றபோது யாரும் கேள்வி கேட்கவில்லை. தீவிரவாதிகளை ஒடுக்குவது என்பது நியாயமானது என்று அமெரிக்கா வாதிட்டது.
இதே கொள்கையைத்தான் இஸ்ரேல் தற்போது கடைப்பிடிக்கிறது. கத்தார், தீவிரவாதிகளை மறைத்துவைத்திருக்கிறது என்று குற்றம் சாட்டி, இஸ்ரேல் தாக்குதல் நடத்தியுள்ளது. இது அமெரிக்காவின் முந்தைய செயலை முன்மாதிரியாகக் கொண்டு நடத்தப்பட்ட தாக்குதல் என்று இஸ்ரேல் வாதிடுகிறது. இதனால் அமெரிக்காவோ, மேற்குலக நாடுகளோ இஸ்ரேலை கேள்வி கேட்க முடியாத ஒரு நிலை ஏற்பட்டுள்ளது. பாகிஸ்தான் மீதும் இந்தியா தாக்குதல் நடத்தியபோதும் அமெரிக்கா உள்பட உலக நாடுகள் கண்டுகொள்ளாததற்கு இதுதான் காரணம்.
இந்த நிலையில் திடீரென இஸ்லாமிய நாடுகள் நேட்டோ போன்ற ஒரு ராணுவ கூட்டணியை உருவாக்க முயல்கின்றன. ஆனால், இது சாத்தியமா என்ற கேள்வி எழுகிறது. இஸ்லாமிய நாடுகளுக்குள் பல பிரிவினைகள் உள்ளன. உதாரணமாக, ஈரானுக்கும் சவுதி அரேபியாவுக்கும் உள்ள முரண்பாடுகள், கத்தார்-சவுதி அரேபியா மோதல் என பல உள்நாட்டுப் பிரச்னைகள் உள்ளன. இந்த நாடுகள் ஒற்றுமையாக செயல்படுவது என்பது கடினம்.
1945-ல் அமெரிக்காவும் சவுதி அரேபியாவும் ஒரு ஒப்பந்தம் செய்துகொண்டன. அதன்படி, எண்ணெய் வர்த்தகம் டாலரில்தான் நடக்க வேண்டும். இதற்கு ஈடாக சவுதி அரேபியாவின் பாதுகாப்புக்கு அமெரிக்கா உத்தரவாதம் அளித்தது. இதனால், சவுதி அரேபியாவின் ராணுவ மற்றும் ராணுவ தளவாடங்கள் அனைத்தும் மேற்குலகை சார்ந்தே உள்ளன. இது, இஸ்லாமிய நாடுகளின் கூட்டமைப்பை வலுவற்றதாக்கும் என்று கூறப்படுகிறது.
பாகிஸ்தான் போன்ற நாடுகள் தற்போது சீர்குலைந்துவிட்டன. தீவிரவாதம் ஒடுக்கப்பட்டு, ராணுவம் பலவீனமாகிவிட்டது. இதனால், இஸ்ரேல் மற்றும் இந்தியாவின் ராணுவ நடவடிக்கைகளுக்கு இது ஒரு வாய்ப்பாக அமையும் என்றும் கூறப்படுகிறது.
உலகம் இன்று பல சிக்கலான மோதல்களால் சூழப்பட்டுள்ளது. உக்ரைன்-ரஷ்யா போர், மத்திய கிழக்கில் இஸ்ரேல்-கத்தார் மோதல், நீண்டகாலமாக இருந்து வரும் இந்தியா-பாகிஸ்தான் பதற்றம் மற்றும் தாய்லாந்து-கம்போடியா மோதல் ஆகியவை சர்வதேச அமைதிக்கு அச்சுறுத்தலாக உள்ளன. இந்த மோதல்கள், மூன்றாம் உலகப் போருக்கு வழிவகுக்குமா, அல்லது மனித குலத்துக்கே ஆபத்தை விளைவிக்குமா என்ற கேள்வியை எழுப்புகின்றன.
உலகின் பல நாடுகள் ஒன்றுடன் ஒன்று மோதிக்கொண்டிருக்கும் நிலையில், இந்த மோதல்கள் அனைத்தும் உலகப் போருக்கு வழிவகுக்குமா என்பது ஒரு முக்கியக் கேள்வி. முதல் மற்றும் இரண்டாம் உலகப் போர்கள் பெரும்பாலும் பல நாடுகளின் கூட்டணியால் உருவானவை. தற்போதுள்ள மோதல்களும் அவ்வாறே உள்ளன. இதில் முக்கியமாக கவனிக்க வேண்டியது, இதில் பெரும்பாலான மோதல்களில் அமெரிக்கா அல்லது சீனா போன்ற வல்லரசுகள் நேரடியாகவோ அல்லது மறைமுகமாகவோ ஈடுபட்டுள்ளன. இது இந்த போர்களின் தீவிரத்தை மேலும் அதிகரிக்கும்.
அணு ஆயுதங்களின் பயன்பாடு மனித குலத்திற்கே ஆபத்தை விளைவிக்கும். இந்த ஆயுதங்களை வைத்திருக்கும் நாடுகள், தங்களின் எதிரிகளுக்கு எதிராக இதை பயன்படுத்தினால், அதன் விளைவுகள் ஒட்டுமொத்த உலகத்தையும் பாதிக்கும். ஒரு சிறிய அணுசக்தி போர் கூட, உலகளாவிய பேரழிவை ஏற்படுத்தும். அணு ஆயுதங்கள் போர்ச்சூழலில் மட்டுமே பயன்படுத்தப்பட வேண்டும் என்றில்லை, விபத்துகள் அல்லது பயங்கரவாதிகள் கைகளில் கிடைப்பது போன்ற சூழ்நிலைகளும் அச்சுறுத்தலாக உள்ளன.
இந்த சிக்கலான சூழ்நிலையில், அனைத்து நாடுகளும் அமைதி மற்றும் ராஜதந்திரத்தின் மூலம் தீர்வுகளை கண்டறிய வேண்டியது அவசியம். இல்லையெனில், மனித குலத்தின் எதிர்காலமே கேள்விக்குறியாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
