அ.தி.மு.க.வின் முக்கியத் தலைவர்களான சசிகலா, ஓ.பன்னீர்செல்வம், டிடிவி தினகரன் மற்றும் செங்கோட்டையன் ஆகியோர் இல்லாமல் அ.தி.மு.க.வின் எதிர்காலம் கேள்விக்குறியாகியுள்ளது என்று அரசியல் விமர்சகர்கள் கருத்து தெரிவித்துள்ளனர். அ.தி.மு.க. பொதுச் செயலாளர் எடப்பாடி பழனிசாமியின் ஈகோ காரணமாகவே இந்த நிலை ஏற்பட்டுள்ளது என்றும், அ.தி.மு.க. அழியும் நிலையில் உள்ளது என்றும் கூறப்படுகிறது.
தேசிய ஜனநாயக கூட்டணியில் இருந்து அடுத்தடுத்து வெளியேற்றம்
அ.தி.மு.க.-பா.ஜ.க. கூட்டணிக்கு ஒரு கட்சி கூட புதிதாக இணையாத நிலையில், ஏற்கனவே கூட்டணியில் இருந்த ஓ.பன்னீர்செல்வம், இப்போது டிடிவி தினகரன் ஆகியோரும் அடுத்தடுத்து விலகியுள்ளனர். இது பா.ஜ.க. தலைமையிலான தேசிய ஜனநாயக கூட்டணிக்கு ஒரு பெரும் பின்னடைவாக கருதப்படுகிறது.
அ.தி.மு.க.வின் முன்னாள் ஒருங்கிணைப்பாளரான ஓ.பன்னீர்செல்வம், ஏற்கனவே தேசிய ஜனநாயக கூட்டணியில் இருந்து விலகுவதாக அறிவித்திருந்தார். தற்போது, அ.ம.மு.க. பொதுச்செயலாளர் டிடிவி தினகரனும் தேசிய ஜனநாயக கூட்டணியில் இருந்து வெளியேறுவதாக அதிகாரபூர்வமாக அறிவித்துள்ளார்.
இந்த விலகல்கள், அ.தி.மு.க.வில் ஏற்பட்ட உட்கட்சிப் பூசல்களையும், ஈ.பி.எஸ்.ஸின் தலைமையின் மீதான அதிருப்தியையும் வெளிப்படுத்துகின்றன.
அ.தி.மு.க.வின் மூத்த தலைவர்களில் ஒருவரான செங்கோட்டையன், கட்சி தலைமையின் மீது அதிருப்தியில் இருப்பதாக கூறப்பட்டு வந்தது. அவர் தனது ஆதரவாளர்களுடன் ஆலோசனை நடத்தியது இந்த அதிருப்தியை உறுதி செய்வதாக அமைந்தது.
மேலும், அ.தி.மு.க.வின் பல முக்கிய பிரமுகர்கள், நடிகரும் அரசியல்வாதியுமான விஜய்யின் ‘தமிழக வெற்றிக் கழகம்’ பக்கம் செல்ல வாய்ப்புள்ளது என்றும் தகவல்கள் தெரிவிக்கின்றன.
இந்த தொடர்ச்சியான விலகல்கள், அ.தி.மு.க.வின் எதிர்காலத்தை கேள்விக்குறியாக்கியுள்ளது. கட்சிக்குள்ளான இந்த விரிசல், வரும் தேர்தல்களில் அ.தி.மு.க.வின் வெற்றி வாய்ப்பை பெரிதும் பாதிக்கும் என்று அரசியல் விமர்சகர்கள் கருதுகின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
