உலக அரசியல் மற்றும் பொருளாதார அரங்கில் இந்தியாவிற்கு புதிய இடம் கிடைத்து வருவதை சமீபத்திய நிகழ்வுகள் காட்டுகின்றன. அமெரிக்காவுடனான வர்த்தக பிரச்சினைகள் தீவிரமடைந்த நிலையில், சீனா மற்றும் ஜப்பான் போன்ற நாடுகளுடன் இந்தியா தனது உறவுகளை வலுப்படுத்தியுள்ளது.
இந்த நிலையில் அமெரிக்க வர்த்தக ஆலோசகர் பீட்டர் நவரோ, டொனால்ட் ட்ரம்ப்-இன் வர்த்தக கொள்கைகளை பாதுகாக்கும் வகையில், இந்தியா ரஷ்யாவிடமிருந்து கச்சா எண்ணெய் வாங்கி, அதனை பணமாக்குவதாகவும், இதன் மூலம் போருக்கு ஆதரவளிப்பதாகவும் குற்றம் சாட்டியுள்ளார். மேலும், இந்திய பொருளாதார அமைப்பிலுள்ள ‘பிராமணர்கள்’ இந்த சூழ்நிலையை தங்களுக்கு சாதகமாக பயன்படுத்திக் கொள்வதாகவும் அவர் கூறியது பெரும் சர்ச்சையை ஏற்படுத்தியது. முதல்முறையாக ஒரு அமெரிக்க அதிகாரி ஒரு குறிப்பிட்ட ஜாதி மீது குற்றச்சாட்டை முன்வைத்துள்ளது பரபரப்பை ஏற்படுத்தியுள்ளது.
இந்தியாவின் எரிசக்தித் தேர்வுகள் தேசியப் பாதுகாப்புத் தேவைகளின் அடிப்படையில் எடுக்கப்படுகின்றன என்று கூறி, இந்தியா இந்த குற்றச்சாட்டுகளை நிராகரித்துள்ளது.
ஷாங்காய் ஒத்துழைப்பு கவுன்சில் மாநாட்டின் போது, பிரதமர் நரேந்திர மோடி மற்றும் சீன அதிபர் ஜி ஜின்பிங் இடையே ஒரு அரிய தனிப்பட்ட சந்திப்பு நடைபெற்றது. பல ஆண்டுகளாக நிலவி வரும் எல்லை பதற்றங்களுக்கு பிறகு, இரு தலைவர்களும் இணக்கமான தொனியில் பேசினர். “கருத்து வேறுபாடுகள் சர்ச்சைகளாக மாறக்கூடாது” என்றும், “இரு நாடுகளும் போட்டியாளர்கள் அல்ல, வளர்ச்சிப் பங்காளிகள்” என்றும் அவர்கள் ஒருமித்த கருத்தை முன்வைத்தனர். இது, இரு நாடுகளின் சிக்கலான உறவில் ஒரு புதிய, யதார்த்தமான அணுகுமுறையைக் குறிக்கிறது.
அதேபோல் இந்தியா மற்றும் ஜப்பான் இணைந்து அடுத்த 10 ஆண்டுகளுக்கான கூட்டு திட்டத்தை அறிவித்துள்ளன. இதன் கீழ், ஜப்பானிய தனியார் துறை அடுத்த பத்தாண்டுகளில் இந்தியாவில் $68 பில்லியன் முதலீடு செய்ய உறுதியளித்துள்ளது. இந்த ஒப்பந்தம் பாதுகாப்பு, தூய்மையான எரிசக்தி மற்றும் பொருளாதார வளர்ச்சி ஆகிய துறைகளில் கவனம் செலுத்துகிறது. இந்தோ-பசிபிக் பிராந்தியத்தில் சீனாவின் செல்வாக்கை சமநிலைப்படுத்தும் வகையில், இரு நாடுகளும் தங்களது ஒத்துழைப்பை மேம்படுத்தவுள்ளன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
