இந்திய வெளியுறவுத் துறை அமைச்சர் எஸ்.ஜெய்சங்கர், நேற்று சீன வெளியுறவு துறை அமைச்சருடன் பேச்சுவார்த்தை நடத்தியதை தொடர்ந்து, இன்று ரஷ்யாவுக்கு பயணம் மேற்கொண்டுள்ளார். உலகளாவிய வர்த்தக போர்கள் மற்றும் ரஷ்யா-உக்ரைன் மோதல் போன்ற பதற்றமான சூழலில், இந்தியா தனது முக்கிய பங்காளிகளுடன் உறவுகளை வலுப்படுத்தும் முயற்சியாக இந்த பயணம் பார்க்கப்படுகிறது. இந்தியா மற்றும் ரஷ்யா தங்கள் வர்த்தக உறவுகளை மேம்படுத்துவதில் ஆர்வம் காட்டுவதால், இந்த பயணம் ஒரு முக்கியமானதாக கருதப்படுகிறது.
வர்த்தகம், பொருளாதாரம் மற்றும் அறிவியல் ஒத்துழைப்பு
ஜெய்சங்கரின் ரஷ்ய பயணத்தின் முக்கிய நோக்கம், இரு நாடுகளுக்கும் இடையிலான வர்த்தகம், பொருளாதாரம் மற்றும் அறிவியல் ஒத்துழைப்பை மேம்படுத்துவதாகும். அவர் ரஷ்ய வெளியுறவுத் துறை அமைச்சரை சந்திக்க உள்ளார். இந்த சந்திப்பின்போது, இரு நாடுகளின் அரசுகளுக்கும் இடையிலான ஆலோசனைகள் நடைபெறும். இதில், பரஸ்பர நலன் சார்ந்த திட்டங்கள் மற்றும் ஒப்பந்தங்கள் குறித்து விவாதிக்கப்படும். இது, இருதரப்பு உறவுகளுக்கு ஒரு புதிய திசையை வகுக்கும் என்று எதிர்பார்க்கப்படுகிறது.
இந்த ஆண்டின் பிற்பகுதியில் ரஷ்ய அதிபர் புதின் இந்தியாவுக்கு வருகை தரவுள்ளார். அவருக்கு முன்னோட்டமாக அமைந்திருக்கும் ஜெய்சங்கரின் இந்தப் பயணம், இருதரப்பு உறவுகளை வலுப்படுத்தும் ஒரு முக்கியமான படியாக கருதப்படுகிறது. அதிலும் சமீபத்தில் புதின், அமெரிக்க அதிபர் டிரம்பை சந்தித்த பின்னர் இந்த சந்திப்பு நடைபெறுவது பல்வேறு ஊகங்களுக்கு வழிவகுத்துள்ளது.
இந்த பயணம், வர்த்தக மற்றும் அறிவியல் ஒத்துழைப்பை மேம்படுத்துவதோடு, இரு நாடுகளுக்கும் இடையிலான அரசியல் மற்றும் இராஜதந்திர உறவுகளையும் மேலும் நெருக்கமாக்கும் என எதிர்பார்க்கப்படுகிறது. இது, உலக அரங்கில் இந்தியாவின் நிலைப்பாட்டை வலுப்படுத்தும் என்றும் கருதப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
