புகழ்பெற்ற பொருளாதார நிபுணர் ஜெஃப்ரி சாக்ஸ் சமீபத்தில் அளித்த பேட்டியில், ‘2024 ஆம் ஆண்டு அமெரிக்க அதிபர் தேர்தல், அமெரிக்க பொருளாதாரம் மற்றும் வெளியுறவுக் கொள்கை ஆகியவை குறித்து கடுமையான விமர்சனம் தெரிவித்துள்ளார்.
டொனால்ட் டிரம்ப் மற்றும் தற்போதைய ஜனநாயக கட்சி ஆகிய இரு தரப்பினரின் மீதும் தனது கடுமையான அதிருப்தியை வெளிப்படுத்துகிறார். அவர் அமெரிக்காவின் Deep State என்ற அமைப்பை கடுமையாக சாடுகிறார். “Deep State” என்பது ஒரு அரசாங்கத்திற்குள், அதன் அதிகாரப்பூர்வமாக தேர்ந்தெடுக்கப்பட்ட தலைவர்களுக்கு அப்பாற்பட்டு, மறைமுகமாக செயல்படும் அதிகாரம் கொண்ட குழுவை குறிப்பதாகும். இந்த குழுவில், உளவுத்துறை அதிகாரிகள், இராணுவத் தலைவர்கள், அதிகாரிகள் மற்றும் அரசியல்வாதிகள் போன்றவர்கள் இருக்கலாம். இவர்கள் தாங்கள் விரும்புபவரை ஆட்சிக்குக் கொண்டு வருவதற்காக, மறைமுகமாக பல்வேறு செயல்களில் ஈடுபடுவார்கள் என்று நம்பப்படுகிறது. “Deep State” என்ற இந்த கோட்பாடு, அரசாங்கத்தின் வெளியுறவு கொள்கைகள் மற்றும் பொருளாதார முடிவுகளை இந்த மறைமுக குழுக்கள் தான் தீர்மானிக்கின்றன என்றும் கூறப்படுகிறது.
“Deep State” ஒரு சக்திவாய்ந்த இராணுவ-தொழில்துறை வளாகம் என்றும், இது அமெரிக்காவின் வெளியுறவுக் கொள்கையைக் கட்டுப்படுத்துகிறது என்றும், போர்களை பயன்படுத்தி பணம் ஈட்டுகிறது என்றும் ஜெஃப்ரி சாக்ஸ் விவரிக்கிறார்.
இந்த அமைப்பு பல ஆண்டுகளாக நீடிப்பதால், அமெரிக்கா “கட்டுப்பாட்டை மீறி” உலகில் பிற நாடுகளுக்கு ஆபத்தானதாக மாறியுள்ளது என்று அவர் நம்புகிறார். அமெரிக்கா ஒரே நேரத்தில் மூன்று போர்களை நடத்தி வருவதாகவும், இதில் பெரும்பாலான அமெரிக்கர்களுக்கு விருப்பமில்லை என்றும் அவர் சுட்டிக்காட்டுகிறார். மேலும், அரசாங்கம் தனது மக்களின் தேவைகளுக்கு பணம் செலவழிப்பதற்கு பதிலாக, இந்த போர்களுக்கு பல ட்ரில்லியன் டாலர்களை செலவழித்து வருவதாகவும், இது நிலையற்ற தன்மைக்கு வழிவகுக்கும் என்றும் அவர் கூறுகிறார்.
வரவிருக்கும் தேர்தலில் அமெரிக்காவிற்கு ஒரு தெளிவான வழி இல்லை என்று சாக்ஸ் கருதுகிறார். அமெரிக்காவின் இரண்டு முக்கிய கட்சிகளுமே பலவீனமானவையாக இருப்பதால், ஒரு குழப்பமான நிலை உருவாகக்கூடும் என்று அவர் அஞ்சுகிறார். டிரம்ப்பை ஒரு “மனநல கோளாறு கொண்டவர்” என்றும், அவர் தனது சொந்த அதிகாரத்திலும் செல்வத்திலும் மட்டுமே ஆர்வம் கொண்டவர் என்றும், அமெரிக்க மக்களின் நல்வாழ்வு குறித்து அவருக்கு அக்கறை இல்லை என்றும் அவர் விவரிக்கிறார். யார் வெற்றி பெற்றாலும், அமெரிக்கா வீழ்ச்சியை நோக்கிய பாதையில் செல்கிறது என்று அவர் கூறுகிறார்.
அமெரிக்க பொருளாதாரம் சமீபத்திய ஆண்டுகளில் ஓரளவு வளர்ச்சி கண்டிருந்தாலும், அது தேசியக் கடன் அதிகரிப்பிற்கும், பல அமெரிக்கர்களின் வாழ்க்கைத்தரம் குறைவதற்கும் வழிவகுத்துள்ளது என்று சாக்ஸ் குறிப்பிடுகிறார். வெளியுறவு போர்களுக்காக செய்யப்படும் தற்போதைய செலவினங்கள் நிலையற்றவை என்று அவர் வலியுறுத்துகிறார்.
மொத்தத்தில் அமெரிக்காவிற்கு தலைமை மற்றும் கொள்கைகளில் ஒரு அடிப்படை மாற்றம் தேவை என்று அவர் வலியுறுத்துகிறார். ஆனால், தற்போதைய அரசியல் சூழ்நிலையில் அதை அடைய ஒரு தெளிவான வழி இல்லை என்றும் அவர் கூறுகிறார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
