அமெரிக்க அதிபர் டொனால்ட் ட்ரம்ப், தனது வர்த்தக கொள்கைகள் மூலம் உலக நாடுகளுக்கு அழுத்தம் கொடுப்பது வழக்கம். ஆனால், இந்தியா மற்றும் பிரேசில் போன்ற முக்கிய நாடுகளை பணிய வைக்க முடியாமல் அவர் திணறி வருகிறார். வர்த்தக ரீதியான மிரட்டல்கள் மற்றும் வரி விதிப்புகளை மீறி, இரு நாடுகளும் தங்களின் நிலைப்பாட்டில் உறுதியாக நிற்பது, அமெரிக்காவின் வல்லரசு ஆதிக்கத்திற்கு ஒரு புதிய சவாலை ஏற்படுத்தியுள்ளது. குறிப்பாக, ட்ரம்பின் வர்த்தக அழுத்தம் தோல்வியடைந்த நிலையில், ரஷ்ய அதிபர் புதினுடன் நடைபெற உள்ள பேச்சுவார்த்தையும் தோல்வியடைந்தால், அது ட்ரம்பின் உலகளாவிய இமேஜுக்கு பெரும் பாதிப்பை ஏற்படுத்தும் என்று அரசியல் வல்லுநர்கள் கருத்து தெரிவித்துள்ளனர்.
வர்த்தக அழுத்தம் ஏன் தோல்வி அடைந்தது?
டிரம்பின் வர்த்தகக் கொள்கைகள், இந்தியா மற்றும் பிரேசில் போன்ற நாடுகளின் மீது பெரிய தாக்கத்தை ஏற்படுத்தவில்லை. இதற்கு முக்கியக் காரணம், இந்த நாடுகளின் உள்நாட்ப் பொருளாதார வலிமை மற்றும் உறுதியான அரசியல் நிலைப்பாடுதான்.
இந்தியா: ரஷ்யாவிடம் இருந்து எண்ணெய் வாங்குவது, உள்நாட்டு விவசாய பொருளாதாரத்தைப் பாதுகாப்பது போன்ற இந்தியாவின் முடிவுகள் அதன் தேசிய நலன்களை அடிப்படையாக கொண்டவை. 50% வர்த்தக வரி விதித்த போதிலும், இந்திய பொருளாதாரம் அசைந்து கொடுக்கவில்லை. இந்தியாவின் தற்சார்பு கொள்கை, அமெரிக்காவின் அழுத்தத்திற்குப் பணிய மறுப்பதாக அமைந்துள்ளது.
பிரேசில்: பிரேசில் அதிபர் லூலா டி சில்வா, அமெரிக்காவின் வரி விதிப்புகளை உறுதியாக எதிர்த்தார். வர்த்தகத்தால் பாதிக்கப்பட்ட ஏற்றுமதியாளர்களுக்கு அரசு நேரடியாக நிதியுதவி அளித்து, மாற்று வர்த்தக சந்தைகளை தேடியது. இதன் மூலம், அமெரிக்காவின் மிரட்டலுக்கு பணியாமல், பொருளாதாரத்தையும் பாதுகாத்தது. இந்த பிடிவாதமான நிலைப்பாடு லூலாவின் மக்கள் ஆதரவை மேலும் அதிகரித்துள்ளது.
இந்த இரண்டு நாடுகளின் நடவடிக்கைகளும், ஒரு வல்லரசு நாடு தரும் அழுத்தம், இன்று முழுமையாக எடுபடுவதில்லை என்பதை உணர்த்துகின்றன.
புடின் பேச்சுவார்த்தை: ட்ரம்பின் இமேஜுக்குச் சோதனை
இந்த நிலையில் தான் இன்று ரஷ்யா-உக்ரைன் போருக்கு முற்றுப்புள்ளி வைக்க, ரஷ்ய அதிபர் விளாடிமிர் புதினுடன் பேச்சுவார்த்தை நடத்த டிரம்ப் திட்டமிட்டுள்ளார். இது ட்ரம்பின் உலகத் தலைவராக, “அமைதியை ஏற்படுத்துபவர்” என்ற இமேஜுக்கு ஒரு பெரிய சோதனையாக பார்க்கப்படுகிறது. இந்த பேச்சுவார்த்தை தோல்வியடைந்தால், அது உள்நாட்டு மற்றும் உலக அரசியல் அரங்கில் அவருக்கு பெரும் பின்னடைவை ஏற்படுத்தும். இந்தியா, பிரேசில் போன்ற நாடுகளை பணிய வைக்க முடியாத ஒரு வல்லரசு அதிபர், ரஷ்யா போன்ற ஒரு ராணுவ வல்லரசு நாட்டிடம் எப்படி வெற்றி பெற முடியும் என்ற கேள்விகள் எழலாம்.
மாறிவிட்ட உலக அரசியல் களம்
ஒரு வல்லரசு நாடாக இருந்த அமெரிக்காவால் கூட, இன்று இந்தியா போன்ற வளர்ந்து வரும் நாடுகளை எளிதாக மிரட்ட முடியவில்லை. இதற்கு முக்கிய காரணம், உலக அரசியல் களம் ஒரு முனையில் இயங்குவதை விடுத்து, பல முனைகளில் இயங்க தொடங்கியுள்ளதுதான். பிரிக்ஸ் போன்ற கூட்டணிகள், நாடுகள் தங்களுக்கான மாற்று பொருளாதார வாய்ப்புகளை உருவாக்க உதவுகின்றன.
தற்போதைய இந்தியா பழைய இந்தியா அல்ல, இன்று தனது நலன்களுக்கு குந்தகம் விளைவிக்கும் எந்தவொரு வெளிநாட்டு தலையீட்டையும் ஏற்க மறுக்கிறது. ஒரு வல்லரசு அதிபரின் மிரட்டல்களுக்கு பணியாமல், தன் கொள்கைகளில் உறுதியாக நிற்கும் இந்தியா, உலக அரங்கில் ஒரு சக்திவாய்ந்த, அசைக்க முடியாத சக்தியாக உருவெடுத்துள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
