இந்திய கிரிக்கெட்டின் மூத்த வீரர்களான ரோஹித் ஷர்மா மற்றும் விராட் கோலி ஆகியோரின் ஓய்வு குறித்த விவாதங்கள் அதிகரித்து வரும் நிலையில், இந்திய கிரிக்கெட் கட்டுப்பாட்டு வாரியம் அடுத்த தலைமுறை வீரர்களை உருவாக்கும் பணியில் தீவிரமாக இறங்கியுள்ளது. இதன் ஒரு பகுதியாக, இளம் வீரர் வைபவ் சூர்யவன்ஷிக்கு சிறப்புப் பயிற்சி அளிக்கப்பட்டு வருவதாகத் தகவல்கள் தெரிவிக்கின்றன.
வரும் செப்டம்பர் 21-ஆம் தேதி தொடங்கும் இந்தியா ‘A’ அணியின் ஆஸ்திரேலிய சுற்றுப்பயணத்திற்காக, இளம் வீரரான வைபவ் சூர்யவன்ஷிக்கு பெங்களூருவில் உள்ள பிசிசிஐ-யின் சிறப்பு மையத்தில் பயிற்சி அளிக்கப்பட்டு வருகிறது.
இது குறித்து வைபவ்வின் பயிற்சியாளர் கூறுகையில், “பிசிசிஐ எதிர்காலத்தை நோக்கி பார்க்கிறது. மூத்த வீரர்கள் ஓய்வு பெறும்போது, அந்த வெற்றிடத்தை நிரப்ப இளம் வீரர்கள் முழுமையாகத் தயாராக இருக்க வேண்டும். அந்த முயற்சியின் ஒரு பகுதிதான் வைபவ்வுக்கான இந்த பயிற்சி. சர்வதேச கிரிக்கெட்டின் சவால்களுக்கு ஏற்ப வீரர்களை தேர்வு செய்து, அவர்களை தயார்படுத்துகிறோம்” என்று தெரிவித்துள்ளார்.
வைபவ் சூர்யவன்ஷி தனது அதிரடி ஆட்டத்திற்கு பெயர் பெற்றவர். அவரால் முதல் பந்திலிருந்தே தாக்குதல் ஆட்டத்தை வெளிப்படுத்த முடியும். இது டி20 மற்றும் ஒருநாள் போட்டிகளுக்கு ஒரு பெரிய பலமாகும். ஐபிஎல் மற்றும் 19 வயதுக்குட்பட்டோருக்கான போட்டிகளில் அவரது செயல்பாடு பாராட்டை பெற்றது. இந்த சிறப்புப் பயிற்சி, அவரது திறமையை மேலும் மெருகேற்றி, இந்திய அணியில் அவருக்கு ஒரு இடத்தை உறுதிப்படுத்தும் என்று எதிர்பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
