பிரபல சாமியார் பிரேமானந்த் மகாராஜ் சமீபத்தில் ஆற்றிய ஒரு சொற்பொழிவு வைரலாகி பெரும் சர்ச்சையை ஏற்படுத்தியுள்ளது. சமூக வலைத்தளங்களிலும், சமூக அமைப்புகளிடம் இருந்தும் அவரது கருத்துக்குக் கடுமையான கண்டனங்கள் எழுந்துள்ளன. அந்த சொற்பொழிவில் அவர் ‘இளைஞர்கள் மற்றும் இளம்பெண்களின் கடந்த கால உறவுகள் அவர்களை திருமணத்திற்கு தகுதியற்றவர்களாக ஆக்குகின்றன என்று மகாராஜ் பொதுப்படையாக கருத்து தெரிவித்துள்ளார்.
சர்ச்சைக்குரிய கருத்துகள்:
இன்றைய இளைஞர்களின் நடத்தை குறித்து பேசிய மகாராஜ், “நான்கு பெண்களுடன் பழகிய ஒரு பையன் ஒருபோதும் தனது மனைவியுடன் திருப்தி அடைய மாட்டான். ஏனெனில், அவன் விபச்சாரத்திற்கு பழகிவிட்டான். அதேபோல, நான்கு ஆண்களுடன் பழகிய ஒரு பெண்ணுக்கு ஒரு கணவனை ஏற்றுக்கொள்ளும் துணிச்சல் இருக்காது” என்று கூறியுள்ளார். மேலும், “நூற்றுக்கு இரண்டோ நான்கோ பெண்கள் மட்டுமே புனிதமான வாழ்க்கை வாழ்ந்து, ஒரே ஒரு ஆணுக்கு அர்ப்பணிப்புடன் வாழ்கிறார்கள்” என்றும் அவர் குறிப்பிட்டுள்ளார்.
கண்டனங்களும் ஒப்பிடுதல்களும்:
மகாராஜின் இந்த கருத்துகள் “பழமைவாதமானவை”, “பாலின பாகுபாடு கொண்டவை”, மற்றும் “பெண்களுக்கு மிகவும் தீங்கு விளைவிப்பவை” என்று விமர்சகர்கள் கடும் கண்டனம் தெரிவித்துள்ளனர்.
சமூக வலைத்தளங்களில் இந்த கருத்துகள் குறித்து பல்வேறு எதிர்வினைகள் எழுந்தன. ஒருசிலர் மகாராஜின் இந்த கருத்துக்களை “இந்திய கலாச்சாரத்தை காப்பாற்றுவதற்கான மிகச்சிறந்த வழி என்று கூறினாலும், பெரும்பாலானோர் இதை மத அதிகாரத்தின் போர்வையில் உள்ள ஒரு ஆபத்தான செயல்பாடு என்று விமர்சனம் செய்கின்றனர்.
பெண்கள் உரிமை அமைப்புகளும் தங்கள் கண்டனங்களை தெரிவிக்க தயங்கவில்லை. மதுரையை சேர்ந்த ஒரு பெண்கள் கூட்டமைப்பின் தலைவர், இதுபோன்ற மனநிலை பெண்களை அவர்களின் கடந்த காலத்தால் மதிப்பிடுகிறது என்றும், சமூகம் அவர்களை அவர்களின் நிகழ்காலத்தாலும், மனித நேயத்தாலும் அங்கீகரிக்க வேண்டும் என்றும் கூறினார். இதுபோன்ற அறிக்கைகள் ஆணாதிக்க கதைகளை வலுப்படுத்தலாம் என்றும், பாரம்பரியத்தை பாதுகாக்கும் போர்வையில் பாகுபாட்டை நியாயப்படுத்தலாம் என்றும் சமூக ஆர்வலர்கள் எச்சரித்துள்ளனர்.
சர்ச்சை வலுத்து வரும் நிலையில், பிரேமானந்த் மகாராஜ் இதுவரை எந்த விளக்கமும் வெளியிடவில்லை. ஆனால், சமூகத்திடமிருந்தும், ஆன்மீக வட்டாரங்களுக்குள்ளிருந்தும் அழுத்தம் அதிகரித்து வருவதால், அவரது மௌனம் நீண்ட காலம் நீடிக்க வாய்ப்பில்லை என்றே கூறப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
