முக ஸ்டாலினின் 5 வருடத்தில் வெறும் 155 நாட்கள் தான் சட்டமன்றம்.. வருடத்திற்கு வெறும் 32 நாட்கள் தான்.. இதுதான் திராவிட மாடல் ஆட்சியின் லட்சணமா? மக்கள் பிரச்சனையை பேச வேண்டிய சட்டசபையை கூட்டாமல் முடக்கியது ஏன்? எம்ஜிஆர் ஆட்சியில் 326 நாட்கள்.. கருணாநிதி ஆட்சியில் 268 நாட்கள்.. ஜெயலலிதா ஆட்சியில் 264 நாட்கள் … ஸ்டாலின் ஆட்சியில் மட்டும் குறைந்தது ஏன்? மக்கள் பிரச்ச்னையை பேசக்கூட நேரமில்லையா?
தமிழக சட்டமன்ற வரலாற்றில் ஒரு முக்கியமான விவாதத்தை தற்போது திமுக ஆட்சி எதிர்கொண்டு வருகிறது. கடந்த ஐந்து ஆண்டுகளில் சட்டமன்றம் மிகக் குறைவான நாட்களே கூடியதாக வெளியாகியுள்ள புள்ளிவிவரங்கள் அரசியல் வட்டாரத்தில் பரபரப்பை ஏற்படுத்தியுள்ளன. 2021 முதல் 2026 வரையிலான 16-வது சட்டமன்ற காலகட்டத்தில் PRS தரவின்படி வெறும் 155 நாட்கள்தான் அவை கூடியுள்ளது. இதை எதிர்க்கட்சிகள், “மக்கள் பிரச்சினைகளை விவாதிக்க வேண்டிய சட்டமன்றத்துக்கு இவ்வளவு குறைவான நாட்கள் போதுமா?” என்ற கேள்வியாக முன்வைத்து வருகின்றன.
இதற்கு முந்தைய 2016–2021 காலகட்டத்தில் எடப்பாடி பழனிசாமி தலைமையிலான அதிமுக ஆட்சியிலும் சட்டமன்றம் 162 நாட்கள் கூடியதாக தரவுகள் தெரிவிக்கின்றன. அதாவது, இரண்டு முழு ஆட்சிக் காலங்களிலும் சட்டமன்றம் கூடிய நாட்களின் எண்ணிக்கை 200-ஐ எட்டவில்லை. ஆனால் இதற்கு முந்தைய பல சட்டமன்றங்களின் செயல்பாட்டைப் பார்த்தால் நிலைமை வேறுபட்டதாக இருந்துள்ளது. 1971–76 காலகட்டத்தில் 326 நாட்களும், 1996–2001 காலகட்டத்தில் 268 நாட்களும் சட்டமன்றம் நடைபெற்றுள்ளன.
அதேபோல் 1991–96 காலகட்டத்தில் 264 நாட்களும், 2001–06 காலகட்டத்தில் 257 நாட்களும், 1980–84 காலகட்டத்தில் 249 நாட்களும் அவை கூடியுள்ளன. இதனால், சட்டமன்றம் எத்தனை நாட்கள் கூடுகிறது என்பது வெறும் எண்ணிக்கை மட்டுமல்ல; மக்கள் பிரச்சினைகள், அரசின் செயல்பாடுகள், பட்ஜெட், சட்டங்கள் மற்றும் நிர்வாக முடிவுகள் குறித்து எவ்வளவு நேரம் விரிவாக விவாதிக்கப்படுகிறது என்பதற்கான ஒரு முக்கியமான அளவுகோலாகவும் பார்க்கப்படுகிறது.
16-வது சட்டமன்றத்தின் 155 நாட்களை ஐந்து ஆண்டுகளாகப் பிரித்துப் பார்த்தால், ஆண்டுக்கு சராசரியாக சுமார் 31 நாட்கள் மட்டுமே அவை கூடியுள்ளது. இதை சுட்டிக்காட்டும் அரசியல் விமர்சகர்கள், “மக்கள் பிரச்சினைகளுக்கு குரல் கொடுக்க வேண்டிய சட்டமன்றம் ஆண்டுக்கு ஒரு மாதத்துக்கும் சற்று மேலாக மட்டுமே இயங்கினால், ஜனநாயக விவாதத்துக்கான இடம் எங்கே?” என்று கேள்வி எழுப்புகின்றனர்.
இதற்கிடையே, தற்போது சட்டமன்றத்தில் எதிர்க்கட்சிகளை நோக்கி திமுக தரப்பில் கேள்விகள் எழுப்பப்படுவது அரசியல் ரீதியாக விவாதப் பொருளாகியுள்ளது. “முதலில் உங்கள் ஆட்சிக் காலத்தில் சட்டமன்றம் எத்தனை நாட்கள் நடந்தது என்பதை கணக்குப் பாருங்கள்; பிறகு மற்றவர்களிடம் கணக்கு கேளுங்கள்” என்ற விமர்சனமும் எதிரணியினரிடையே முன்வைக்கப்படுகிறது. குறிப்பாக புதிய அரசியல் சக்திகளை நோக்கி திமுக தொடர்ந்து கேள்விகளை எழுப்பும் சூழலில், கடந்த ஐந்து ஆண்டுகளின் சட்டமன்ற செயல்பாடு தொடர்பான இந்த புள்ளிவிவரங்கள் அரசியல் ஆயுதமாக மாறியுள்ளன.
“கேள்வி கேட்பது அரசியலின் ஒரு பகுதி… ஆனால் கேள்வி கேட்பவர்களின் கடந்த கால கணக்கும் மக்கள் முன் இருக்கிறது!” என்பதே தற்போது எதிர்க்கட்சிகளின் பதிலடியாக உள்ளது. சட்டமன்றம் என்பது வெறும் அரசியல் குற்றச்சாட்டுகளுக்கான மேடை அல்ல; மக்களின் அன்றாட பிரச்சினைகளுக்கு தீர்வு தேடும் முக்கியமான ஜனநாயக மன்றம். எனவே, எந்தக் கட்சி ஆட்சியில் இருந்தாலும், சட்டமன்றம் போதுமான நாட்கள் கூடி, மக்கள் பிரச்சினைகள் முழுமையாக விவாதிக்கப்பட வேண்டும் என்பதே ஜனநாயகத்தின் அடிப்படை எதிர்பார்ப்பாக உள்ளது.
