சுண்டைக்காய் மருத்துவ குணங்கள் நிறைந்த ஒரு காய். இந்த சுண்டைக்காய் செடியின் இலை, காய், மலர், தண்டு, வேர் அத்தனையும் ஆயுர்வேதத்தில் மருந்தாகப் பயன்படுத்தப்படுகிறது. இதைச் சாப்பிடுவதால் என்ன பலன்கள்னு பார்க்கலாமா…
சுண்டைக்காயில் கால்சியம், புரதச்சத்து, இரும்புச்சத்து ஆகியவை அதிகமாக இருக்கின்றன. இது ரத்தத்தில் உள்ள நச்சுக்களை வெளியேற்றி அஜீரணம், மலச்சிக்கல் உள்ளிட்ட பிரச்சினைகளைத் தீர்க்க உதவி செய்யும். சுண்டைக்காயில் பினைல்கள், குளோரோஜெனின்கள் போன்ற ஆக்சிஜனேற்ற பண்புகள் அதிகமாக இருக்கின்றன.
இவை இரைப்பையில் ஏற்படும் அழற்சி அல்லது கணையத்தில் ஏற்படும் புண்கள் ஆகியவற்றைக் குறைத்து வயிற்றில் அதிகப்படியான அமிலச் சுரப்பு ஏற்படாமல் தடுக்கிறது. அதோடு இவற்றில் உள்ள அதிகப்படியான நார்ச்சத்துக்கள் செரிமானத்தை எளிதாக்கி எடையையையும் கட்டுக்குள் வைத்திருக்க உதவி செய்கிறது.
சுண்டைக்காயில் அதிக அளவில் இருக்கும் இரும்புச்சத்து ரத்த சிவப்பணுக்களின் எண்ணிக்கையை அதிகரிக்கச் செய்து அனீமியா என்னும் ரத்த சோகை ஏற்படாமல் தடுக்கிறது. ரத்தத்தில் ஹீமோகுளோபினை அதிகரிக்க உதவி செய்யும். கிளைக்கோஸைடு என்னும் ஆன்டி ஆக்சிடண்ட் சுண்டைக்காயில் அதிக அளவில் நிறைந்திருக்கிறது.
சுண்டைக்காயில் உள்ள ஆன்டி ஆக்சிடண்ட்டுகள் இன்சுலின் உற்பத்தி மற்றும் குளுக்கோஸ் உறிஞ்சுதலை கட்டுப்படுத்துகிறது. அதனால் ரத்த சர்க்கரை அளவு திடீரென உயராமல் பார்த்துக் கொள்ளும். உயர் ரத்த குளுக்கோஸ் அளவைக் கட்டுப்படுத்த வாரத்தில் குறைந்தது 3 நாட்களாவது சுண்டைக்காயை உணவில் சேர்த்துக் கொள்ளப் பாருங்கள்.
சுண்டைக்காயில் உள்ள சபோஜெனின் என்னும் ஸ்டீராய்டு ஹார்மோன் உற்பத்தியை சீராக்கி உடலின் மெட்டபாலிசத்தை சீராக்கும். சீரற்ற மாதவிடாய் பிரச்சினையை சரிசெய்கிறது சுண்டைக்காயில் அதிக அளவில் புரதச்சத்துக்கள் நிறைந்திருக்கின்றன. அதோடு இதய ஆரோக்கியத்தை மேம்படுத்துவதற்கான அமினோ அமிலங்களும் இதில் அதிகம். இதயத் தசைகளைத் தளர்வாக்கி இதயத் துடிப்பை சீராக வைக்கிறது.
இதயத்திசுக்களுக்கு சீராக ஆக்சிஜனையும் ரத்தத்தையும் பம்ப் செய்து எடுத்துச் செல்லும் வேலையை சுண்டைக்காயில் உள்ள அமினோ அமிலங்கள் செய்கின்றன. இதனால் ரத்த அழுத்தமும் கட்டுக்குள் இருக்கிறது. உடலின் வெப்பநிலையைக் குறைத்து உடல் சூட்டைத் தணிக்கும்.
காய்ச்சல் இருக்கும் சமயத்தில் சுண்டைக்காய் வற்றலை சீரகம், மிளகு, உப்பு சேர்த்து வறுத்துப் பொடி செய்து அதை சூடான சாதத்தில் நெய் சேர்த்து பிசைந்து சாப்பிட காய்ச்சல் விரைவில் குணமடையும் அல்லது சுண்டைக்காயை சூப் வடிவிலும் எடுத்துக் கொள்ளலாம். சுண்டைக்காயில் அதிக அளவில் ஆன்டி ஆக்சிடண்ட்டுகள் இருக்கின்றன.
சிறுநீரகக் கற்கள் போன்ற சிறுநீரகக் கோளாறுகளைக் குணப்படுத்தவும் சிறுநீரகத்தின் குளோமருலர் கட்டமைப்புகளின் அடைப்பை நீக்கவும் உதவும். உங்களுடைய வழக்கமான டயட்டில் வாரத்தில் 2 நாட்கள் சுண்டைக்காயை உணவில் சேர்த்துக் கொள்வதன் மூலம் சிறுநீரகத்தின் இயக்கத்தை மேம்படுத்தும். இதனால் சிறுநீரக செயலிழப்பு உள்ளிட்ட பிரச்சினைகளைத் தவிர்க்க முடியும்.
