கடல் பக்கத்துல காற்றாலை அமைச்சு தான பார்த்திருப்பீங்க.. இப்ப கடலுக்குள் காற்றாலை மின்சார திட்டம் இந்தியாவிலேயே முதல்முறையா தமிழ்நாட்டுல வரப்போகுது.. தூத்துகுடியில் அமையவுள்ள இந்த திட்டத்துக்கு மத்திய அரசும் உதவுது.. ஆனால் இதில் வரும் மின்சாரம் முழுக்க முழுக்க தமிழ்நாட்டுக்குத்தான்.. சிறிய அளவில் முதலில் ஒரு சாம்பிள் திட்டம்.. சக்சஸ் ஆச்சுன்னா பெரிய லெவல்ல திட்டம் போட வாய்ப்பு.. இன்னும் 5 வருஷத்துக்கு அப்புறம் மின் தடைன்னா என்னன்னு மக்கள் கேட்பாங்க.
இந்தியாவின் புதுப்பிக்கத்தக்க ஆற்றல் துறை வரலாற்றுச் சிறப்புமிக்க ஒரு புதிய அத்தியாயத்தை நோக்கி அடிஎடுத்து வைக்கிறது. நாட்டின் முதல் கடல்சார் காற்றாலை முன்னோடித் திட்டம் தூத்துக்குடி கடற்பகுதியில் அமைப்பதற்கான திட்டமிடல் பணிகள் முழு வீச்சில் தொடங்கி நடைபெற்று வருகின்றன. தமிழ்நாட்டின் கடலோரப் பகுதிகளில் வீசும் சாதகமான காற்று திறனைப் பயன்படுத்திக் கொள்ளும் நோக்கிலும், நிலப்பரப்புக்கு அப்பால் கடலுக்குள் மின் உற்பத்தி செய்வதற்கான சாத்தியக்கூறுகளை ஆராயவும் இந்த முன்னோடித் திட்டம் வழிவகை செய்கிறது.
இத்திட்டத்தின் கீழ் சுமார் ரூ.77 கோடி மதிப்பீட்டில் 6.25 மெகாவாட் மின்திறன் கொண்ட பிரம்மாண்டமான ஒற்றைக் காற்றாலை உற்பத்தி எந்திரம் கடலுக்குள் நிறுவப்பட உள்ளது. தூத்துக்குடி துறைமுகத்தின் உள் துறைமுகத் தெற்குத் தடுப்புச்சுவரில் இருந்து சுமார் 1.65 கிலோமீட்டர் தொலைவில் கடலுக்குள் இந்த காற்றாலை அமைக்கப்படவுள்ளது. இந்திய துறைமுக ரயில் மற்றும் ரோப்வே கார்ப்பரேஷன் நிறுவனம் இத்திட்டத்திற்கான டெண்டர் நடைமுறைகளையும் ஒப்பந்தப் பணிகளையும் கவனித்து வருகிறது.
இந்த முன்னோடித் திட்டத்தின் மூலம் உற்பத்திய செய்யப்படும் மின்சாரம் முழுமையாகத் தமிழ்நாட்டின் மாநில மின் கட்டமைப்பில் இணைக்கப்பட உள்ளது. தமிழ்நாடு மின் உற்பத்தி மற்றும் பகிர்மானக் கழகத்தின் விதிகளுக்கு உட்பட்டு, கடலிலிருந்து பெறப்படும் மின்சாரத்தை நிலப்பரப்பிற்கு எடுத்து வந்து மின் கட்டமைப்பில் வெற்றிகரமாகச் சேர்ப்பதற்கான நவீன தொழில்நுட்பக் வழிமுறைகள் இதற்காகப் பயன்படுத்தப்படுகின்றன.
இது ஒரு சோதனை ரீதியிலான முன்னோடித் திட்டம் என்பதால், எதிர்காலத்தில் பிரம்மாண்ட அளவில் கடல்சார் காற்றாலைப் பண்ணைகளை அமைப்பதற்குத் தேவையான பல்வேறு நடைமுறை அனுபவங்களை இது வழங்கும். ஆழ்கடலில் காற்றாலைக் கோபுரங்களை நிலைநிறுத்துவது, கொந்தளிப்பான கடல் சூழலில் அவற்றைப் பராமரிப்பது, மின்சாரப் பாதை அமைப்பது மற்றும் கடல்சார் சவால்களை எதிர்கொள்வது குறித்த முக்கியத் தொழில்நுட்பத் தகவல்களைப் பெற இத்திட்டம் மிகச்சிறந்த களமாக இருக்கும்.
தூத்துக்குடி துறைமுகத்தில் ஏற்கெனவே பயன்பாட்டில் இருக்கும் அதிநவீன உள்கட்டமைப்பு மற்றும் தளவாட வசதிகள் இத்திட்டத்திற்கு மிகப்பெரிய பலமாக அமைந்துள்ளன. பிரம்மாண்ட காற்றாலை உபகரணங்களைக் கடலுக்குள் எடுத்துச் செல்வதற்கும், கப்பல்கள் மற்றும் நவீன எந்திரங்கள் மூலம் அவற்றை ஆழ்கடலில் வெற்றிகரமாக நிறுவுவதற்கும் தூத்துக்குடி துறைமுகத்தின் புவியியல் அமைப்பும் சாதனங்களும் மிகவும் உதவியாக இருக்கும்.
தரையில் அமைக்கப்படும் வழக்கமான காற்றாலைகளை விடக் கடலுக்குள் காற்றாலைப் பண்ணைகளை உருவாக்குவது அதிக மூலதனச் செலவு கொண்டதாகும். எனவே, பில்லியன் டாலர் மதிப்பிலான பெரிய திட்டங்களில் முதலீடு செய்வதற்கு முன்பாக, இத்தகைய சிறு முன்னோடித் திட்டம் மூலம் பெறப்படும் நிஜ உலக அனுபவம் இந்தியாவின் பசுமை ஆற்றல் இலக்குகளுக்கு வலுவூட்டும். எவ்வித தாமதமுமின்றி இத்திட்டம் குறித்த காலத்தில் செயல்பாட்டுக்கு வந்து இந்தியாவின் புதிய பசுமைப் புரட்சிக்கு வித்திடும் என எதிர்பார்க்கப்படுகிறது.
