நீட்டை ஒழிக்க வேண்டும் என்று கோரி போராட்டம் நடத்துவதற்குப் பதிலாக, நீட் தேர்வு முறையாகவும் நியாயமாகவும் நடைபெற வேண்டும் என்று குரல் கொடுக்க வேண்டும் என்பதே தற்போதைய தேவையாக உள்ளது. நல்ல மதிப்பெண்கள் பெற்றுத் திகழும் திறமையான மாணவர்களுக்கு அரசாங்கமே இலவச நீட் பயிற்சி வழங்க வேண்டும் என்ற கோரிக்கையை வலுவாக முன்வைக்க வேண்டியது அவசியமாகிறது. மாணவர்களின் எதிர்காலத்தைப் பணயம் வைக்கும் திசையில் போராட்டங்களை நடத்துவதை விட, தகுதியானவர்களுக்கு முறையான பயிற்சி கிடைக்க வழிவகை செய்ய வேண்டும்.
கடந்த காலத்தில் பொறியியல் படிப்புகளுக்கு நுழைவுத் தேர்வு நடைமுறையில் இருந்தது. எப்போது அந்த நுழைவுத் தேர்வு நீக்கப்பட்டு கட்-ஆஃப் மதிப்பெண்கள் மட்டுமே அடிப்படையாக மாற்றப்பட்டதோ, அப்போதிருந்து குறைந்த மதிப்பெண்கள் பெற்றாலும் கையில் பணமிருந்தால் பொறியியல் சீட்டு எளிதில் வாங்கும் நிலை உருவானது. அதன் நேரடி விளைவாக இன்று ஒவ்வொரு தெருவிலும் பத்துப் பதினைந்து இன்ஜினியர்கள் தாராளமாகக் காணப்படுகிறார்கள். ஆனால், அந்த அளவுக்குத் தரமான மற்றும் குவாலிட்டியான இன்ஜினியர்கள் உருவாகியுள்ளார்களா என்றால் அது மிகப்பெரிய கேள்விக்குறியாகவே இருக்கிறது.
இதே போன்றதொரு நிலைதான் மருத்துவப் கல்விக்கும் ஏற்படும் அபாயம் உள்ளது. ஒருவேளை நீட் தேர்வை முற்றிலுமாக ரத்து செய்துவிட்டால், நாளை காசு வைத்திருப்பவன் எவனும் எம்பிபிஎஸ் சீட்டை விலைக்கு வாங்கி மருத்துவராகிவிட முடியும். அதன் பிறகு எதிர்காலத்தில் ஒவ்வொரு தெருவிலும் பத்துப் பேர் மருத்துவர்களாக வலம் வரலாம். ஆனால், அந்த மருத்துவர்கள் போதிய திறமை மற்றும் குவாலிட்டியுடன் இருப்பார்களா என்பதைச் சிந்தித்துப் பார்க்க வேண்டும்.
இந்தச் சூழலில் பணத்திற்கு அதிகப்படியான முக்கியத்துவம் வழங்கப்படத் தொடங்கும். இதனால் திறமையும் தகுதியும் இருந்தும், முறையான வாய்ப்புகள் கிடைக்காமல் நியாயமாக மருத்துவச் சீட்டுப் பெற வேண்டிய ஏழை எளிய மாணவர்களுக்கும் அந்த வாய்ப்பு முற்றிலும் மறுக்கப்பட்டுப் போகும் நிலை உருவாகும். திறமையான மாணவர்கள் பலர் பின்தங்குவதற்குக் காரணம் அவர்களுக்குப் படிக்கத் தெரியவில்லை என்பதல்ல, மாறாக அவர்களுக்கு முறையான மற்றும் தரமான கோச்சிங் கிடைக்காததே முக்கியக் காரணமாகும்.
அதுமட்டுமின்றி, நீட் தேர்வுகள் நடைபெறும் முறைகளிலும் பல வெளிப்படைத்தன்மை அற்ற தன்மைகளும் முறைகேடுகளும் நிலவுவதாகப் புகார்கள் எழுகின்றன. எனவே தேர்வை முழுமையாகத் தடை செய்வதற்குப் பதிலாக, தேர்வுகள் மிகவும் கறைபடியாமல் நியாயமாக நடத்தப்படுவதை அரசு உறுதி செய்ய வேண்டும். தகுதியும் திறமையும் உள்ள பொருளாதாரத்தில் பின்தங்கிய மாணவர்களுக்கு அரசுத் தரப்பிலிருந்து இலவச நீட் பயிற்சி வகுப்புகள் தடையின்றி வழங்கப்பட வேண்டும்.
சுருக்கமாகக் கூறின், நீட்டைத் தடை செய்ய வேண்டும் என்ற கோஷத்தை விடுத்து, நீட் தேர்வு நியாயமாக நடக்க வேண்டும், தகுதியானவர்களுக்கு இலவசப் பயிற்சி அளிக்கப்பட வேண்டும் என்ற கோரிக்கையே மிகச் சரியானதாக இருக்க முடியும். இந்த மாற்றத்தைக் கொண்டு வந்தால் மட்டுமே மருத்துவம் போன்ற உன்னதமான துறையில் தகுதியானவர்கள் மட்டுமே நுழைவார்கள் என்பதோடு, தரமான மருத்துவர்கள் சமூகத்திற்குச் சேவையாற்றக் கிடைக்கப் பெறுவார்கள்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
