சமீபகாலமாக தமிழக அரசியலில் மிகவும் பரபரப்பாகப் பேசப்பட்டு வரும் ஒரு விஷயம், தமிழக பாஜக தலைவர் அண்ணாமலைக்கும், சூப்பர்ஸ்டார் ரஜினிகாந்துக்கும் இடையே நடந்ததாக கூறப்படும் ரகசிய சந்திப்பு. இந்த சந்திப்பு குறித்த தகவல்கள் சமூக வலைத்தளங்களில் வேகமாகப் பரவி, பல்வேறு யூகங்களுக்கு வழிவகுத்துள்ளது. இந்த சந்திப்பின் நோக்கம் என்ன? இருவரும் இணைந்து புதிய கட்சி தொடங்க போகிறார்களா? அண்ணாமலை பாஜக தலைமையையே எதிர்க்கத் துணிந்துவிட்டாரா? போன்ற பல கேள்விகள் அரசியல் வட்டாரத்தில் எழுந்துள்ளன.
அண்ணாமலை, தமிழக பாஜகவில் தனக்கு எதிரான நடவடிக்கைகள் அதிகரித்து வருவதாக உணர்ந்திருக்கிறார். இது குறித்து பல்வேறு நிகழ்வுகள் அவரது சமீபகால செயல்பாடுகளில் வெளிப்பட்டன. மத்திய அமைச்சர் நிர்மலா சீதாராமன் சென்னையில் நடத்திய ஆலோசனைக் கூட்டத்தில் அண்ணாமலை கலந்துகொள்ளவில்லை. மேலும், டெல்லியில் நடைபெற்ற ஒரு முக்கிய கூட்டத்திற்கும் அமைச்சர் அழைப்பு விடுத்தபோதும் அவர் செல்லவில்லை.
இருப்பினும், பாஜகவின் முக்கிய நிர்வாகியான பி.எல். சந்தோஷ் நடத்திய கூட்டத்தில் மட்டும் அண்ணாமலை கலந்துகொண்டார். இந்த நிகழ்வுகள், அண்ணாமலை கட்சிக்குள் எதிர்கொள்ளும் நெருக்கடிகளை வெளிப்படையாகக் காட்டுகின்றன. இந்த உட்கட்சிப் பூசல்களின் உச்சகட்டமாக, அவர் ரஜினிகாந்தை அவரது இல்லத்தில் சந்தித்து, தனது அரசியல் எதிர்காலம் குறித்து ஆலோசனை நடத்தியதாகக் கூறப்படுகிறது.
இந்த சந்திப்பின்போது, அண்ணாமலை தனது அரசியல் வாழ்க்கையில் எதிர்கொள்ளும் சவால்களை ரஜினியிடம் விவரித்துள்ளார். கட்சி தொடங்குவதற்கு முன் ரஜினி சந்தித்த அதேபோன்ற நெருக்கடிகள் தற்போது தனக்கும் இருப்பதாகவும், தமிழக பாஜகவில் தனக்கு எதிரானவர்கள் தொடர்ந்து செயல்படுவதாகவும் அவர் குறிப்பிட்டதாக தகவல்கள் தெரிவிக்கின்றன. மேலும், அனைத்து மட்டங்களிலும் தனக்கான முக்கியத்துவம் குறைந்துவிட்டதாகவும், இனிமேலும் கட்சியில் நீடிப்பதா அல்லது அரசியலை விட்டே விலகிவிடலாமா என்ற மனநிலையில் இருப்பதாகவும் அண்ணாமலை கூறியுள்ளதாக கூறப்படுகிறது.
மேலும், தனது இந்த முடிவை டெல்லி தலைமைக்கு எடுத்துரைக்குமாறு அண்ணாமலை ரஜினியிடம் கோரிக்கை விடுத்ததாகவும் சொல்லப்படுகிறது. இதை கேட்ட ரஜினிகாந்த், ஒரு ஆக்ஷன் படத்தின் திருப்பத்தை கேட்டது போல அதிர்ந்துபோனாராம். ‘அரசியலில் இப்படியும் நடக்குமா?’ என்பதை தனது உடல்மொழியால் வெளிப்படுத்திய ரஜினி, வேறு எதுவும் பேசவில்லை. இருப்பினும், அண்ணாமலை தன் நிலையை ரஜினியிடம் வெளிப்படுத்தியதன் பின்னணியில், பாஜகவின் டெல்லி தலைமைக்கு ரஜினியுடன் இன்னும் தொடர்பு இருப்பது தெரிந்தே இதைச் செய்திருக்கலாம் என அரசியல் பார்வையாளர்கள் கருதுகின்றனர்.
இந்த சூழலில், அண்ணாமலை பாஜகவிலிருந்து வெளியேறினால், அவருக்கு வேறு சில வாய்ப்புகளும் இருக்கலாம். ரஜினி புதிய கட்சி தொடங்குவதற்கு வாய்ப்பு குறைவு என்பதால், அண்ணாமலைக்கு மாற்று வழி தேவைப்படலாம். சமீபத்தில் கட்சி தொடங்கிய நடிகர் விஜய், திராவிட கட்சிகளுக்கு பெரும் நெருக்கடியை ஏற்படுத்தி வருகிறார். விஜய்யின் அரசியல் நகர்வுகள் இளைஞர்கள் மத்தியில் பெரும் வரவேற்பை பெற்றுள்ளன. அண்ணாமலை, விஜய்யின் தமிழக வெற்றிக் கழகத்தில் இணைந்தால் அது அவருக்கு புதிய அரசியல் களத்தை ஏற்படுத்தித் தரலாம் என்ற யூகங்களும் பரவி வருகின்றன. ஒருவேளை அது நடந்தால், இரு தலைவர்களின் ஆதரவு தளமும் ஒன்றிணைந்து, தமிழக அரசியலில் ஒரு புதிய மாற்றத்தை உருவாக்கலாம் என்றும் கூறப்படுகிறது.
இந்தச் செய்தி வெறும் வதந்தியா அல்லது உண்மையில் அண்ணாமலை தனது அரசியல் பயணத்தில் ஒரு பெரிய முடிவெடுக்கும் கட்டத்தில் இருக்கிறாரா என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
