2026 தமிழக சட்டமன்றத் தேர்தல் முடிவுகள், தமிழ் தேசிய அரசியலை முன்வைத்து நீண்டகாலமாக பேசி வந்த சீமானின் நாம் தமிழர் கட்சிக்கு மிகப்பெரிய பின்னடைவாகவும், நடிகர் விஜய்யின் தமிழக வெற்றிக் கழகத்திற்கு அசுரத்தனமான வெற்றியாகவும் அமைந்துள்ளது. தமிழக அரசியலில் நிலவி வந்த “மாற்று அரசியல்” பிம்பத்தை ஒட்டுமொத்தமாக மாற்றியமைத்துள்ளன. விஜய்க்கும் சீமானுக்கும் இடையிலான வாக்கு வங்கி வித்தியாசம், “ஏணி வைத்தாலும் எட்டாது” என்ற கூற்றை நிஜமாக்கும் வகையில், தவெக ஒரு பிரம்மாண்ட அரசியல் சக்தியாக விஸ்வரூபம் எடுத்துள்ளது.
கடந்த பல ஆண்டுகளாக தனித்துப்போட்டி, தமிழ் தேசியம் என முழங்கி வந்த சீமான், இம்முறை தனது வாக்கு வங்கியை தக்கவைக்கக்கூட தவறியது அரசியல் வட்டாரத்தில் பெரும் விவாதத்தை கிளப்பியுள்ளது. குறிப்பாக, தேர்தல் பிரச்சாரங்களின்போது நடிகர் விஜய்யை மிக கடுமையாகவும், தனிப்பட்ட ரீதியிலும் சீமான் விமர்சித்தது, நடுநிலை வாக்காளர்கள் மற்றும் இளைஞர்களிடையே மிகப்பெரிய அதிருப்தியை ஏற்படுத்தியது.
“டெபாசிட் கூட வாங்க வக்கில்லாத சீமான், விஜய்யை மோசமாக விமர்சித்ததே தோல்விக்கு முக்கிய காரணம்” என அரசியல் விமர்சகர்கள் சுட்டிக்காட்டுகின்றனர். ஆக்கப்பூர்வமான அரசியலை விடுத்து, சகப் போட்டியாளரை தரம் தாழ்ந்து விமர்சித்தது சீமானுக்கு பெரும் பாதிப்பாக முடிந்துள்ளது.
மறுபுறம், நடிகர் விஜய் தனது முதல் தேர்தலிலேயே 38 சதவீத வாக்குகளை பெற்று தமிழகத்தின் அசைக்க முடியாத தலைவராக உருவெடுத்துள்ளார். “முதல் தேர்தலிலேயே சிக்ஸர் அடித்த விஜய்” என அவரது ரசிகர்கள் கொண்டாடுவது போல, திராவிட கட்சிகளின் கோட்டைகளை தகர்த்து எறிந்துவிட்டு, மக்களின் நம்பிக்கையை ஒட்டுமொத்தமாகத் தவெக அறுவடை செய்துள்ளது. சீமானின் விமர்சனங்களுக்கு பதில் சொல்லாமல், மக்கள் நலன் மற்றும் செயல்திட்டங்களில் மட்டுமே கவனம் செலுத்திய விஜய்யின் நிதானமான அணுகுமுறை, அவருக்கு இந்த இமாலய வெற்றியைப் பெற்றுத் தந்துள்ளது.
நாம் தமிழர் கட்சி கடந்த தேர்தல்களில் பெற்று வந்த 6 முதல் 7 சதவீத வாக்குகள், இம்முறை 3 சதவீதமாக குறைந்துள்ளதற்கு தவெக-வின் வருகையே முக்கியக் காரணம். சீமானை ஒரு மாற்றாகப் பார்த்த இளைஞர்கள், இப்போது விஜய்யிடம் ஒரு தெளிவான தலைமையையும், வெற்றியடையக்கூடிய வாய்ப்பையும் கண்டுள்ளனர். “விஜய் ஒரு சினிமாக்காரர், அவருக்கு பின்னால் ஆள் இல்லை” என்று எள்ளி நகையாடியவர்களுக்கு, 38 சதவீத வாக்குகள் மூலம் விஜய் தனது பலத்தை நிரூபித்துக் காட்டியுள்ளார். இது சீமானின் அரசியலுக்கு ஒரு மிகப்பெரிய எச்சரிக்கை மணியாக அமைந்துள்ளது.
முடிவாக, 2026 தேர்தல் களம் “யார் உண்மையான மக்கள் செல்வாக்கு உள்ள தலைவர்?” என்ற கேள்விக்கு தெளிவான விடையைத் தந்துவிட்டது. மக்களின் தீர்ப்பு என்பது வெறும் உணர்ச்சிகளின் அடிப்படையில் அல்லாமல், தகுதியான தலைமையை தேர்ந்தெடுப்பதில் இருந்தது என்பதை இந்த முடிவுகள் உணர்த்துகின்றன. விஜய்யின் எழுச்சி தமிழகத்தின் அதிகாரப் பாதையை மாற்றியமைத்துள்ள நிலையில், சீமானின் அரசியல் எதிர்காலம் மிகப்பெரிய கேள்விக்குறியாகியுள்ளது. நாகரீகமான அரசியலும், மக்கள் மீதான நம்பிக்கையும் மட்டுமே ஒரு தலைவனை நிலைநிறுத்தும் என்பதற்கு இந்தத் தேர்தல் ஒரு சிறந்த பாடமாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
