Food டெலிவரி நிறுவனங்களுக்கு வேலைக்கு செல்லாதீர்கள்.. அதிர்ச்சி புள்ளி விவரம் கூறிய மத்திய அமைச்சர்..!

இந்தியாவில் உள்ள படித்த வேலையில்லாத இளைஞர்கள், வேலை கிடைக்கும் வரை ஃபுட் டெலிவரி நிறுவனங்களில் வேலை செய்கிறார்கள் என்றும், அவர்கள் தங்களது திறமை மற்றும் இளமையை வீணாக்குகிறார்கள் என்றும், அந்த நிறுவனங்களும் வேலை இல்லாத இளைஞர்களை குறைந்த சம்பளத்தில் பயன்படுத்திக் கொள்கிறதாகவும் மத்திய அமைச்சர் பியூஷ் கோயல் தெரிவித்திருப்பது பரபரப்பை ஏற்படுத்தியுள்ளது.இந்திய இளைஞர்கள் குறைந்த ஊதியம் கொண்ட வேலைகளில் சிக்கிவிட்டதாகவும், ஆனால் சீனா அதிக அளவில் ஸ்டார்ட் அப்புகள் தொடங்கி டெக் கண்டுபிடிப்புகளில் முன்னேறிக் கொண்டிருக்கிறது என்றும் அவர் கூறினார். இன்றைய இந்திய இளைஞர்கள் ஸ்டார்ட் அப்புகள் ஆரம்பித்தாலும், உணவு டெலிவரி மற்றும் சில குறிப்பிட்ட வேலைகளில் மட்டுமே அதிக கவனம் செலுத்தி வருகின்றனர் என்றும், நாம் உணவுப் பொருட்களை வீட்டிலிருந்து நகராமல் பெறும் பணக்காரர்களுக்காக வேலை செய்கிறோம் என்றும், வேலையில்லாத இளைஞர்களை மலிவான தொழிலாளர்களாக மாற்றி உணவு டெலிவரி செய்யும் செயல்களுக்கு மட்டும் அதிக முக்கியத்துவம் தருகிறோம் என்றும் சமீபத்தில் நடந்த கூட்டத்தில் அவர் புள்ளிவிவரத்துடன் பேசினார்.

இந்திய இளைஞர்கள் தற்போதைய வருமானத்திற்காக உணவு டெலிவரி நிறுவனங்களிடம் சிக்கிக் கொண்டிருக்கும் நிலையில், சீனாவில் மின்சார போக்குவரத்து, பேட்டரி தொழில் மேம்பாடு உள்ளிட்ட துறைகளில் கவனம் செலுத்தி வருகின்றனர் என்றும், சீனாவைப் போலவே இந்திய இளைஞர்களும் ஆக்கபூர்வமான ஸ்டார்ட் அப் துறையை நோக்கி முன்னேற வேண்டும் என்றும் அவர் தெரிவித்தார்.

உலகிலேயே மூன்றாவது பெரிய ஸ்டார்ட் அப் சூழல் கொண்ட நாடாக இந்தியா இருந்தாலும், அதை நாம் பெருமையாக கூறிக்கொள்ள முடியாது என்றும், “உலகின் மிகச்சிறந்த ஸ்டார்ட் அப் நாடாக மாறிவிட்டோமா?” என்று கேட்டால் “இல்லை” என்பதே பதிலாகும் என்றும் அவர் கூறினார்.

இந்தியாவில் டிப் டெக் ஸ்டார்ட்  அப்   தொழில்நுட்பங்கள் மிகவும் குறைவாக உள்ளதாகவும் கவலை தெரிவித்துள்ளார்.  இ-காமெர்ஸ் மற்றும் ஃபுட் டெலிவரி செய்யும் வேலையை இந்திய இளைஞர்கள் விட்டு விட்டு தொழில்நுட்பத் துறையை நோக்கி முயற்சிக்க வேண்டும் என்றும், புதிய கண்டுபிடிப்புகள் மற்றும் ஸ்டார்ட் அப்புகள் மூலம் டெக்னாலஜியில் புதிய புரட்சி ஏற்படுத்த, இந்திய இளைஞர்கள் முன்வர வேண்டும் என்றும் அவர் தெரிவித்துள்ளார்.

எனவே, தற்காலிகமாக முப்பதாயிரம் அல்லது நாற்பதாயிரம் வருமானம் கிடைப்பதால் எந்தவொரு டெலிவரி நிறுவனத்திலும் சிக்கிக் கொள்ளாமல், எதிர்கால கனவை நோக்கி இந்திய இளைஞர்கள் செல்ல வேண்டும் என்பதே அனைவரது கருத்தாக உள்ளது.