தமிழ்நாட்டில் தாமரை மலரவே மலராது.. மோடி, அமித்ஷா அனுப்பிய குழுவின் அறிக்கையில் அதிர்ச்சி தகவல்.. அண்ணாமலைக்கு பிறகு கட்சி அதளபாதாளத்திற்கு போய்விட்டது.. மாநில தலைவர்கள் முழுக்க முழுக்க விளம்பரத்திற்காகவே செயல்படுகிறார்கள்.. இதுக்கு தமிழ்நாட்டில் பாஜக என்ற கட்சியே இல்லாமல் இருக்கலாம்.. கொஞ்சமாவது பாஜக ஆதரவாளர்கள் தமிழ்நாட்டில் இருக்கிறார்கள் என்றால் அது மோடி, அமித்ஷாவுக்காக மட்டுமே.. தமிழக பாஜக கூண்டோடு கலைக்க வாய்ப்பா?
தமிழகத்தில் பாரதிய ஜனதா கட்சியின் தற்போதைய செயல்பாடுகள் குறித்தும், அதன் பலவீனங்கள் குறித்தும் அக்கட்சியின் தமிழக பொறுப்பாளரான ராம் மாதவ் தலைமையிலான குழு தயாரித்து டெல்லி மேலிடத்திற்குச் சமர்ப்பித்துள்ள ரகசிய அறிக்கை தற்போது தேசிய அரசியலில் பெரும் புயலைக் கிளப்பியுள்ளது. பிரதமர் நரேந்திர மோடி மற்றும் உள்துறை அமைச்சர் அமித்ஷா ஆகியோரின் நேரடி உத்தரவின் பேரில் தமிழகம் முழுவதும் தீவிர ஆய்வு மேற்கொள்ளப்பட்டது. கட்சிக்குள் நிலவும் உள்கட்சிப் பூசல்கள், நிர்வாகிகளின் செயலற்ற தன்மை மற்றும் மக்கள் மத்தியில் கட்சியின் தாக்கம் எந்த அளவுக்குக் குறைந்துள்ளது என்பது குறித்த உண்மையான நிலவரங்களை இந்தக் குழு நேரடியாகக் களமிறங்கி ஆராய்ந்துள்ளது. இந்த அதிரடி ஆய்வின் முடிவில் தயாரிக்கப்பட்ட அறிக்கை, டெல்லி தலைமைக்கு கடும் அதிர்ச்சியை ஏற்படுத்தியுள்ளதோடு, தமிழக பாஜகவில் மிக விரைவில் பெரும் மாற்றங்கள் நிகழப் போவதை உறுதிப்படுத்தியுள்ளது.
முன்னாள் மாநிலத் தலைவர் அண்ணாமலையின் விலகலுக்கு பிறகு, தமிழக பாஜக முற்றிலுமாகச் செயலற்றுப் போய்விட்டதாக ராம் மாதவ் தனது அறிக்கையில் மிகக் கடுமையாகச் சாடியுள்ளார். தற்போதைய நிலையில் தமிழகத்தில் பாஜகவின் செல்வாக்கு என்பது தேசிய அளவில் பிரதமர் மோடி மீதான நற்பெயரையும், கட்சி அனுதாபிகள் மீதான பாரம்பரிய வாக்குகளையும் மட்டுமே நம்பி உள்ளதே தவிர, மாநில நிர்வாகிகளின் சொந்தப் பங்களிப்பு ஏதுமில்லை என்பதை அந்த அறிக்கை வெளிச்சம் போட்டுக் காட்டியுள்ளது. அடிமட்ட அளவில் மக்களுடன் தொடர்பில்லாத தலைவர்கள், டெல்லி பார்வையில் தங்களைக் பெரிய தலைவர்களாகக் காட்டிக் கொள்ள மீடியா விளம்பரங்களை மட்டுமே நம்பியிருப்பதாகவும், உண்மையான மக்கள் பிரச்சினைகளுக்காக எந்தவொரு போராட்டத்தையும் முன்னெடுக்கவில்லை என்றும் குற்றச்சாட்டுகள் முன்வைக்கப்பட்டுள்ளன.
குறிப்பாக, களத்தில் இறங்கி மக்கள் பணியாற்றாமல் அலுவலகங்களுக்குள்ளும், தொலைக்காட்சி விவாதங்களிலும் மட்டுமே அரசியல் செய்யும் போக்கைக் கட்சியின் முன்னணி நிர்வாகிகள் வழக்கமாகக் கொண்டுள்ளனர். கட்சி வளர்ச்சி நிதியை முறையாகப் பயன்படுத்துவதில் வெளிப்படைத்தன்மை இல்லை என்றும், முக்கியத் தலைவர்கள் தமிழகத்திற்கு வருகை தரும்போது அவர்களை வரவேற்கும் பட்டியலில் பெயரிடவும், புகைப்படம் எடுக்க வாய்ப்பு வழங்கவும் பணம் வசூலிக்கப்பட்டதாககக் கூறப்படும் புகார்கள் தேசியத் தலைமையை அதிர வைத்துள்ளன. மேலும், மத்திய அரசின் அதிகாரத்தையும் பொறுப்புகளையும் தங்களுக்குச் சாதகமாகப் பயன்படுத்திச் சில நிர்வாகிகள் வசூல் வேட்டையில் ஈடுபட்டதாகவும், சென்னை துறைமுகம் போன்ற முக்கிய இடங்களில் முறைகேடுகள் நடந்ததாகவும் அறிக்கையில் சுட்டிக்காட்டப்பட்டுள்ளது.
இந்தச் சூழலில், தமிழகத்தில் தாமரை மலர வேண்டும் என்ற தேசியத் தலைவர்களின் கனவுக்குத் தற்போதைய மாநிலத் தலைமை பெரும் தடையாக இருப்பதாகவும், உடனடியாகத் தமிழக பாஜக அமைப்பைக் கூண்டோடு கலைக்க வேண்டும் என்றும் ராம் மாதவ் குழு பரிந்துரைத்துள்ளதாகத் தகவல்கள் கசிந்துள்ளன. தற்போதைய தலைவர்களை முழுமையாக மாற்றிவிட்டு, அடிமட்டத் தொண்டர்களுடன் தொடர்பில் இருக்கும் மாற்றுத் தலைமையை நியமித்தால் மட்டுமே தமிழகத்தில் கட்சியை மீட்டெடுக்க முடியும் என்று அந்த அறிக்கையில் திட்டவட்டமாக வலியுறுத்தப்பட்டுள்ளது. இதனால், மாநிலத் தலைவர் நயினார் நாகேந்திரன் உள்ளிட்ட தற்போதைய முக்கிய நிர்வாகிகள் தங்கள் பதவிகளை இழக்க நேரிடும் அபாயம் ஏற்பட்டுள்ளதுடன், டெல்லி தலைமையின் அடுத்தகட்ட அதிரடி நடவடிக்கையை நோக்கி தமிழக அரசியல் களம் உன்னிப்பாக உற்றுநோக்கிக் கொண்டிருக்கிறது.
