இனி ஒயிட்போர்ட் பஸ்ஸை எதிர்பார்க்க வேண்டியது இல்லை.. டீலக்ஸ் பேருந்திலும் பெண்களுக்கு இலவசம்.. அதுமட்டுமா… மாவட்டங்களுக்கு இடையே பயணம் மேற்கொள்ளும் புறநகர் பேருந்துகளிலும் இலவசம்.. இன்னும் இருக்குது.. வருடத்திற்கு 3 சிலிண்டர்கள் இலவசம்.. முதல்வர் விஜய் அறிவித்த அதிரடி அறிவிப்புகள்..
மகளிர் கட்டணமில்லா பயணத் திட்டத்தை விரிவுபடுத்தும் அறிவிப்பு, அதேபோல் பொருளாதாரத்தில் பின்தங்கிய குடும்பங்களுக்கு ஆண்டுக்கு மூன்று சமையல் எரிவாயு சிலிண்டர்களுக்கான தொகையை வங்கி கணக்கில் செலுத்தும் திட்டம் குறித்த அறிவிப்பும் பொதுமக்கள் மத்தியில் கவனம் பெற்றுள்ளது. பெண்களின் அன்றாட பயணச் செலவைக் குறைப்பதுடன், குடும்பங்களின் அத்தியாவசிய செலவுச் சுமையையும் குறைக்கும் வகையில் இந்தத் திட்டங்கள் அமையும் என தெரிவிக்கப்பட்டுள்ளது.
மகளிர் கட்டணமில்லாப் பயணத் திட்டத்தின் விரிவாக்கத்தின் முதற்கட்டமாக மாநகர மற்றும் நகரப் பகுதிகளில் இயக்கப்படும் Express, LSS, டீலக்ஸ் (Deluxe) உள்ளிட்ட அரசுப் பேருந்துகளிலும் பெண்கள் கட்டணமின்றி பயணம் செய்யும் வகையில் நடவடிக்கை எடுக்கப்படுவதாக கூறப்பட்டுள்ளது. இதுவரை குறிப்பிட்ட வகை பேருந்துகளில் மட்டுமே கிடைத்து வந்த சலுகை விரிவுபடுத்தப்படுவதன் மூலம், வேலைக்குச் செல்லும் பெண்கள், மாணவிகள், சிறு வணிகங்களில் ஈடுபடும் பெண்கள் உள்ளிட்ட பல்வேறு தரப்பினரும் கூடுதல் பயன் பெற வாய்ப்புள்ளது.
மேலும், மாவட்டங்களுக்கு இடையே பயணம் மேற்கொள்ளும் பெண்களுக்கும் இந்தச் சலுகையை விரிவுபடுத்தும் வகையில் புறநகர் (Mofussil) பேருந்துகள் மற்றும் மலைப்பகுதிகளில் இயக்கப்படும் சாதாரணக் கட்டணப் பேருந்துகளிலும் மகளிர் கட்டணமில்லா பயணத்தை அனுமதிக்கும் நடவடிக்கை குறித்து அறிவிக்கப்பட்டுள்ளது. இதன் மூலம் நகர்ப்புறங்களைத் தாண்டி கிராமப்புறங்கள் மற்றும் தொலைதூரப் பகுதிகளில் வசிக்கும் பெண்களுக்கும் அரசுப் பேருந்து சேவையை அதிகம் பயன்படுத்தும் வாய்ப்பு உருவாகும் என எதிர்பார்க்கப்படுகிறது.
இதனிடையே, ‘அன்னபூரணி சூப்பர் சிக்ஸ்’ திட்டத்தின் கீழ் பொருளாதாரத்தில் பின்தங்கிய குடும்பங்களுக்கு ஆண்டுக்கு மூன்று சமையல் எரிவாயு சிலிண்டர்களுக்கான தொகையை அவர்களது வங்கி கணக்கில் செலுத்தும் திட்டம் குறித்தும் தகவல் வெளியாகியுள்ளது. ஆண்டுக்கு ரூ.2.5 லட்சத்துக்கு மிகாமல் வருமானம் கொண்ட குடும்பங்கள், சிறு மற்றும் குறு விவசாயக் குடும்பங்கள், மாற்றுத்திறனாளிகள் உள்ளிட்ட சமூகத்தில் நலிந்த நிலையில் உள்ள குடும்பங்கள் பயன்பெறும் வகையில் இந்தத் திட்டம் உருவாக்கப்பட்டுள்ளதாக கூறப்படுகிறது.
வரும் ஜனவரி மாதம் பொங்கல் பண்டிகை முதல் இத்திட்டம் செயல்படுத்தப்படும் என்றும், இதன் மூலம் சுமார் ஒரு கோடியே 30 லட்சம் குடும்பங்கள் பயனடையும் என்றும் தெரிவிக்கப்பட்டுள்ளது. சமையல் எரிவாயு சிலிண்டர் விலை உயர்வு உள்ளிட்ட காரணங்களால் குடும்பங்களின் மாதாந்திர செலவுகள் அதிகரித்து வரும் நிலையில், ஆண்டுக்கு மூன்று சிலிண்டர்களுக்கான தொகை நேரடியாக வங்கி கணக்கில் வரவு வைக்கப்படுவது ஏழை மற்றும் நடுத்தரக் குடும்பங்களுக்கு நிதிச் சுமையை குறைக்க உதவும் என்ற எதிர்பார்ப்பு உள்ளது.
மகளிர் கட்டணமில்லாப் பயணத் திட்டத்தின் விரிவாக்கமும், பொருளாதாரத்தில் பின்தங்கிய குடும்பங்களுக்கு எரிவாயு சிலிண்டர் உதவித் தொகை வழங்கும் திட்டமும் குடும்ப நலனை மையமாகக் கொண்ட நடவடிக்கைகளாக பார்க்கப்படுகின்றன. குறிப்பாக பெண்களின் போக்குவரத்துச் செலவைக் குறைப்பதும், சமையல் எரிவாயுவுக்கான செலவில் நிவாரணம் வழங்குவதும் அன்றாட வாழ்க்கையில் நேரடி தாக்கத்தை ஏற்படுத்தக்கூடியவை. இத்திட்டங்கள் அறிவிக்கப்பட்டபடி முறையாக செயல்படுத்தப்பட்டு, தகுதியான அனைத்து குடும்பங்களுக்கும் எந்தவித இடையூறும் இல்லாமல் பயன்கள் சென்றடைவதை அரசு உறுதி செய்ய வேண்டும் என்பதே பொதுமக்களின் எதிர்பார்ப்பாக உள்ளது.
