தமிழ்நாட்டின் அரசியல் வரலாற்றை உற்று நோக்கினால், சினிமாவுக்கும் அரசியலுக்கும் உள்ள பந்தம் என்பது காலங்காலமாகத் தொடரும் ஒரு அலாதியான விஷயமாக இருந்து வருகிறது. திரையுலகில் கொடிகட்டிப் பறந்த பல ஜாம்பவான்கள் முதலமைச்சர் நாற்காலியைக் குறிவைத்து அரசியலில் குதித்த போதிலும், எம்.ஜி.ஆருக்குப் பிறகு அந்த உச்சத்தைத் தொட்டவர்கள் என்று யாரையுமே சொல்ல முடியாத ஒரு வெற்றிடமே பல ஆண்டுகளாகத் தொடர்ந்தது.
எம்.ஜி.ஆர் தன் தனித்துவமான மக்கள் செல்வாக்காலும், ஏழை எளிய மக்களுக்கான நலத்திட்டங்கள் சார்ந்த பிம்பத்தாலும் தமிழ்நாட்டில் ஆட்சியைப் பிடித்தார். அவரது இந்த அசுர வெற்றியைக் கண்டு பொறாமைப்பட்டும், ஈர்க்கப்பட்டும் தமிழ் திரையுலகின் எத்தனையோ முன்னணி நடிகர்கள் தங்களது அதிர்ஷ்டத்தை அரசியலில் பரிசோதித்துப் பார்க்கத் துணிந்தனர். ஆனால், கள யதார்த்தம் அவர்களுக்குக் கசப்பான உண்மைகளையே பரிசளித்தது.
அந்த நீண்ட நெடிய தோல்விப் பட்டியலில் தமிழ் சினிமாவின் மூத்த தூண்களான நடிகர் திலகம் சிவாஜி கணேசன் தொடங்கி, இயக்குநர் மற்றும் நடிகரான கே.பாக்யராஜ், பன்முகத் திறமையாளர் டி.ராஜேந்தர், சமத்துவ மக்கள் கட்சி கண்ட சரத்குமார், நவரச நாயகன் கார்த்திக் மற்றும் தேமுதிகவைத் தொடங்கி எதிர்கட்சித் தலைவராக வரை உயர்ந்த புரட்சித் கலைஞர் விஜயகாந்த் வரை இந்த நீண்ட பட்டியலைச் சொல்லிக்கொண்டே போகலாம். இவர்களில் சிலர் சட்டமன்றத்திற்குள் நுழைந்தாலும், யாராலும் எம்.ஜி.ஆரைப் போல ஒட்டுமொத்தத் தமிழ்நாட்டின் ஆட்சியைக் கைப்பற்றும் அந்த மகத்தான வெற்றியை மட்டும் எட்டவே முடியவில்லை.
ஆனால், இத்தனை ஆண்டு கால வரலாற்றையும், பல ஜாம்பவான்கள் சந்தித்த தொடர் தோல்விகளையும் பொய்யாக்கிவிட்டு, இன்று நடிகர் விஜய் செய்து காட்டியுள்ள அரசியல் பிரவேசம் என்பது சாதாரணமான சாதனை அல்ல. ஏறக்குறைய 50 ஆண்டுகளுக்குப் பிறகு, சினிமா பின்புலத்தில் இருந்து வந்து ஒரு வலுவான அரசியல் கட்சியைத் தொடங்கி, ஆளுங்கட்சிகளுக்கு சிம்மசொப்பனமாகத் தன் சொந்தக் காலில் நிமிர்ந்து நின்றுள்ளார் விஜய் என்பது மறுக்க முடியாத வரலாற்று உண்மை.
மற்ற நடிகர்களைப் போல வெறும் சினிமா புகழை மட்டுமே நம்பி நின்றுவிடாமல், முறையான அமைப்பு ரீதியான கட்டமைப்புகளையும், புஸ்ஸி ஆனந்த் போன்ற நிர்வாகிகளின் பலத்தையும் கொண்டு விஜய் கட்டமைத்துள்ள இந்த அரசியல் எழுச்சி என்பது தமிழ்நாட்டில் அடுத்த கட்ட அரசியல் மாற்றத்திற்கான அச்சாரம். பல தசாப்தங்களாகத் தொடர்ந்த அந்த சினிமா அரசியல் சாப விமோசனத்தை அவர் அடியோடு தகர்த்தெறிந்துள்ளார்.
இந்தச் சாதனையை இப்போது விஜய் நிகழ்த்திக் காட்டியுள்ள நிலையில், இனிவரும் காலங்களில் தமிழ்நாட்டில் வேறு எந்த நடிகராவது அரசியலுக்கு வந்து ஆட்சியைப் பிடிக்க வேண்டும் என்றால், அவர்கள் குறைந்தது இன்னொரு 50 ஆண்டுகள் காத்திருக்க வேண்டியிருக்கும் அல்லது விஜய்யை விடப் பல மடங்கு தீவிரமான வியூகங்களையும் மக்கள் சேவையையும் செய்ய வேண்டியிருக்கும். அந்த அளவுக்குத் தமிழ்நாட்டு அரசியலில் ஒரு அசைக்க முடியாத சகாப்தத்தைத் தற்போது விஜய் தொடங்கி வைத்துள்ளார் என்பதே நிதர்சனம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
