தமிழக அரசியல் களத்தில் தற்பொழுது ஏற்பட்டுள்ள புதிய திருப்பங்கள், இளைய தலைமுறையினரின் அரசியல் பார்வையை நோக்கிய விவாதங்களை மீண்டும் தீவிரப்படுத்தியுள்ளது. குறிப்பாக, பாஜகவை துறந்துவிட்டு அண்ணாமலை ‘இது நம்ம இயக்கம்’ என்ற புதிய அமைப்பை தொடங்கியுள்ள சூழலில், அதற்கு பின்னணியில் பல்வேறு அரசியல் விமர்சனங்கள் முன்வைக்கப்பட்டு வருகின்றன. அவர் எதிர்பார்த்த அளவிற்கான உண்மையான, தன்னெழுச்சியான வரவேற்பு ஜென் ஸி மற்றும் இளைய தலைமுறையினரிடமிருந்து கிடைக்கவில்லை என்ற பேச்சுகள் அரசியல் வட்டாரங்களில் தற்பொழுது பலமாக ஒலிக்க தொடங்கியுள்ளன.
இந்த தொய்வுக்கு மிக முக்கியமான காரணமாக பார்க்கப்படுவது, அண்ணாமலையின் அரசியல் பின்னணியும் அவர் மீது விழுந்துள்ள ‘டெல்லி ஆள்’ என்ற பிம்பமும்தான். அவர் பாஜகவிலிருந்து அதிகாரப்பூர்வமாக விலகிவிட்டதாக அறிவித்தாலும், இன்னும் அவர் மோடியின் தீவிர விசுவாசி என்பதும், வலதுசாரி சித்தாந்தத்தின் நீட்சியாகவே இந்த புதிய இயக்கத்தை ஆரம்பித்துள்ளார் என்பதும் இளைஞர்களுக்கு நன்றாகவே தெரிந்துவிட்டது. வெளியில் சுயேச்சையான இயக்கம் என்று சொன்னாலும், உள்ளே டெல்லியின் மறைமுக ஆதரவு இருக்கிறது என்ற சந்தேகம் இன்னும் முழுமையாக விலகாததால், புதிய மற்றும் சுதந்திரமான அரசியலை விரும்பும் ஜென் ஸி இளைஞர்கள் இந்த அமைப்பில் இணைய தயக்கம் காட்டி வருகிறார்கள்.
மற்றொரு சுவாரசியமான ஒப்பீடு என்னவென்றால், கடந்த சில மாதங்களாக தமிழக வெற்றி கழகத்தின் தலைவர் விஜய்யை கொண்டாடித் தீர்த்த இதே இளைஞர்கள், அடுத்த சில நாட்களிலேயே அண்ணாமலையின் புதிய இயக்கத்தை எப்படிக் கொண்டாடுவார்கள் என்ற கேள்வியும் எழுகிறது. அரசியல் என்பது சீசனுக்கு ஒருமுறை மாறும் சினிமா படம் அல்ல. போன மாதம் வரை விஜய்யின் மாற்று அரசியல் முழக்கத்தையும், அவரது கொள்கைகளையும் ஆதரித்த ஒரு தலைமுறை, இந்த மாதம் அண்ணாமலை புதிய கொடி பிடிக்கிறார் என்பதற்காக உடனடியாக அவர்பின்னால் அணிவகுத்து நிற்காது. இளைஞர்களின் அரசியல் புரிதலை மிக சாதாரணமாக எடைபோட முடியாது என்பதற்கு இதுவே சான்று.
இங்கு நாம் ஆழமாக புரிந்து கொள்ள வேண்டியது, இன்றைய ஜென் ஸி இளைஞர்கள் ஒன்றும் பதவிக்கோ, அதிகாரத்திற்கோ ஆசைப்படும் சராசரி அரசியல்வாதிகள் அல்ல. அவர்கள் தங்களின் எதிர்காலத்தையும், சமூகத்தின் தேவையையும் உற்றுநோக்கி முடிவெடுக்கும் ஒரு சுதந்திரமான சிந்தனை தலைமுறை. ஏதோ ஒரு புதிய இயக்கம் ஆரம்பிக்கப்படுகிறது, அதில் சேர்ந்தால் நமக்கு ஏதேனும் முக்கிய பொறுப்புகள் கிடைக்கும் என்று ஆசைப்பட்டு ஓடிப்போய் இணைய அவர்கள் ஒன்றும் பழைய காலத்து தொண்டர்கள் கிடையாது. அவர்களுக்குத் தேவை கொள்கை ரீதியான நேர்மையும், சுயேச்சையான செயல்பாடுகளும்தான்.
அரசியலில் ஒரு தலைவனுக்கான ஆதரவு என்பது மேலிருந்து திணிக்கப்படுவதோ அல்லது டிஜிட்டல் விளம்பரங்கள் மூலம் உருவாக்கப்படுவதோ அல்ல; அது மக்களின் மனங்களிலிருந்து தன்னெழுச்சியாக வர வேண்டும். அப்படிப்பட்ட ஒரு மாபெரும் தன்னெழுச்சியான மக்கள் ஆதரவும், இளைஞர்களின் பேராதரவும் தற்பொழுது முதலமைச்சர் விஜய் அவர்களுக்கு மட்டும்தான் சாத்தியமாகியுள்ளது. சினிமாவை தாண்டி அவர் மக்களின் தேவைகளை உணர்ந்து, திராவிட மற்றும் வலதுசாரி சித்தாந்தங்களுக்கு மாற்றாக தன் அரசியல் பாதையை வகுத்ததால், இளைஞர்கள் அவர்பின்னால் தானாக வந்து நின்றார்கள். அந்த மாபெரும் அரசியல் அதிர்ஷ்டமும் மக்கள் அங்கீகாரமும் விஜய்க்கு மட்டுமே தற்பொழுது கைகூடியுள்ளது.
சுருக்கமாக சொன்னால், டெல்லியின் பிம்பத்தை மறைத்துக்கொண்டு தமிழ்நாட்டில் புதிய மாற்று அரசியல் செய்ய நினைப்பது அவ்வளவு எளிதான காரியம் அல்ல என்பதை அண்ணாமலையின் தற்போதைய நிலை உணர்த்துகிறது. தமிழக இளைஞர்கள் தங்களின் தலைவன் யார், யாருக்குத் தங்களின் ஆதரவை வழங்க வேண்டும் என்பதில் மிக தெளிவான பார்வையோடு இருக்கிறார்கள். யாரோ ஒருவரின் நிழலாக இருக்கும் தலைவர்களை காட்டிலும், தனக்கான தனித்துவமான பாதையை உருவாக்கி, மக்களின் கஜானாவை காக்கும் நேர்மையான தலைவனுக்கே தங்களின் எதிர்காலத்தை ஒப்படைக்க அவர்கள் தயாராக இருக்கிறார்கள் என்பதுதான் தற்போதைய நிஜம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
