2026 தமிழக சட்டமன்ற தேர்தல் முடிவுகள் நாம் தமிழர் கட்சிக்கும் அதன் ஒருங்கிணைப்பாளர் சீமானுக்கும் இதுவரை கண்டிராத ஒரு மிகப்பெரிய அரசியல் பின்னடைவை ஏற்படுத்தியுள்ளன. தேர்தல் களத்தில் சாட்டை துரைமுருகன் போன்றவர்களுடன் இணைந்து சீமான் போட்ட ஆட்டம் இம்முறை எடுபடவில்லை என்பது வாக்குகளின் மூலம் உறுதியாகியுள்ளது. மாநிலம் தழுவிய அளவில் வெறும் 3 சதவீத வாக்குகளை மட்டுமே நாதக பெற்றுள்ள நிலையில், அக்கட்சியின் மாற்று அரசியல் முழக்கம் மக்கள் மத்தியில் எடுபடாமல் போனது ஒரு கசப்பான உண்மையாக மாறியுள்ளது.
குறிப்பாக, காரைக்குடி தொகுதியின் வாக்கு விபரங்களை ஆராயும்போது, சீமானின் அரசியல் எதிர்காலம் எந்தளவிற்கு கேள்விக்குறியாகியுள்ளது என்பது தெரிகிறது. இத்தொகுதியில் களம் கண்ட சீமான் வெறும் 7,625 வாக்குகளை மட்டுமே பெற்று, யாரும் எதிர்பார்க்காத வகையில் 4-வது இடத்திற்கு தள்ளப்பட்டுள்ளார். தன்னை விட அரசியல் செல்வாக்கில் பின் தங்கியிருப்பார் என்று கருதப்பட்ட அமமுக வேட்பாளர் தேர்போகி பாண்டியை விடவும் (8,920 வாக்குகள்) சீமான் பின் தங்கியிருப்பது அவரது அரசியல் வாழ்வின் மிகப்பெரிய அவமானமாக கருதப்படுகிறது.
தமிழக வெற்றிக் கழகத்தின் எழுச்சி காரைக்குடி தொகுதியில் மற்ற அனைத்து கட்சிகளையும் நிலைகுலைய செய்துள்ளது. தவெக வேட்பாளர் பிரபு 34,782 வாக்குகள் பெற்று முதலிடத்தில் மாஸ் காட்டியுள்ளார். பிரபு வாங்கிய வாக்குகளில் நான்கில் ஒரு பகுதியை கூட சீமானால் பெற முடியவில்லை என்பது அவரது ஆதரவாளர்களிடையே ஒரு பேரிடியாக இறங்கியுள்ளது. காங்கிரஸ் வேட்பாளர் மாங்குடி 19,614 வாக்குகளுடன் இரண்டாம் இடம் பிடித்த சூழலில், சீமானின் 7,625 வாக்குகள் என்பது அவரது வாக்கு வங்கி ஒட்டுமொத்தமாகச் சரிந்துள்ளதையே காட்டுகிறது.
மாற்றத்திற்கான அரசியலை தீவிரமாக பேசி வந்த சீமானின் வாக்கு வங்கியை, நடிகர் விஜய்யின் தமிழக வெற்றி கழகம் அப்படியே அறுவடை செய்துள்ளது இந்த தேர்தல் எண்களின் மூலம் தெளிவாகிறது. சீமானை ஒரு மாற்றாக பார்த்த இளைஞர்களும், தமிழ் தேசிய ஆதரவாளர்களும் இப்போது விஜய்யின் பக்கம் சாய்ந்துள்ளதால், நாதக-வின் அடித்தளம் ஆட்டம் கண்டுள்ளது. ஒரு தொகுதியில் கூட தனித்து செல்வாக்கை நிரூபிக்க முடியாத நிலைக்கு சீமான் தள்ளப்பட்டிருப்பது, அவர் அரசியலில் இனி நீடிக்க வேண்டுமா என்ற விவாதத்தை அவரது எதிர்க்கட்சிகள் மத்தியில் கிளப்பியுள்ளது.
ஒட்டுமொத்தமாக பார்க்கையில், தவெக-வின் இந்த அசுர வேக வளர்ச்சி நாம் தமிழர் கட்சியின் இருப்பையே கேள்விக்குறியாக்கும் ஒரு பரிதாப நிலையை உருவாக்கியுள்ளது. வெறும் மேடை பேச்சுகள் மட்டும் தேர்தல்களில் வெற்றியை தந்துவிடாது என்பதற்கு சீமானின் இந்த தோல்வி ஒரு மிகச்சிறந்த பாடமாகும். நான்காம் இடத்திற்கு தள்ளப்பட்டு, டெபாசிட் கூட வாங்க முடியாத ஒரு நிலைக்கு சென்றிருப்பது, சீமானின் அரசியல் அணுகுமுறையில் ஒரு மாபெரும் தோல்வியையே பிரதிபலிக்கிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
