தமிழக வெற்றிக் கழகத்தின் தலைவர் விஜய் வெளியிட்டுள்ள தேர்தல் அறிக்கை, தமிழக அரசியல் களத்தில் ஒரு புதிய விவாதத்தை கிளப்பியுள்ளது. குறிப்பாக, திராவிடக் கட்சிகளான திமுக மற்றும் அதிமுகவின் கடந்த கால தேர்தல் அறிக்கைகளுக்கும், விஜய்யின் தற்போதைய அறிவிப்புகளுக்கும் இடையே உள்ள ஒற்றுமைகள் மற்றும் வேற்றுமைகள் குறித்து பல்வேறு அரசியல் விமர்சகர்கள் தங்கள் கருத்துக்களை முன்வைத்து வருகின்றனர்.
விஜய் முன்னதாக பேசிய மேடைகளில் இலவசங்களை விமர்சித்துவிட்டு, இப்போது அதே பாணியில் மகளிர் உரிமைத் தொகை ரூ.2500 மற்றும் மீனவர்களுக்கான இழப்பீடு ரூ.18000 போன்ற அறிவிப்புகளை வெளியிடுவது, அவர் ஒரு ‘மாற்று’ அரசியலை தருகிறாரா அல்லது திராவிட கட்சிகளின் நீட்சியாகவே இருக்கிறாரா என்ற கேள்வியை எழுப்பியுள்ளது.
திமுக மற்றும் அதிமுக ஏற்கனவே நடைமுறைப்படுத்தி கொண்டிருக்கும் அல்லது வாக்குறுதி அளித்துள்ள திட்டங்களை விட, தவெகவின் தேர்தல் அறிக்கை ஒரு படி மேலே போய் கூடுதல் தொகையை அறிவித்திருப்பதாக தவெக ஆதரவாளர்கள் வாதிடுகின்றனர். குறிப்பாக, திமுக அறிவித்த மகளிர் உரிமைத் தொகையை விட அதிகத் தொகையையும், அதிமுக அறிவித்த மீனவர் இழப்பீட்டுத் தொகையை விட உயர்த்தி வழங்கப் போவதாகவும் விஜய் அறிவித்துள்ளார்.
இது ‘சூப்பர் ஸ்டாருக்கே சூப்பர் ஸ்டார்’ போன்றதொரு தேர்தல் அறிக்கை என்று வர்ணிக்கப்படுகிறது. இருப்பினும், ஆட்சியில் இருந்த அனுபவம் கொண்ட கட்சிகள் தங்கள் நிதி ஆதாரங்களின் அடிப்படையில் திட்டங்களை சொல்வதற்கும், முதன்முறையாக களமிறங்கும் ஒரு கட்சி வெறும் எண்களை உயர்த்தி சொல்வதற்கும் நிறைய வித்தியாசம் இருப்பதாக நடுநிலையாளர்கள் கருதுகின்றனர்.
இந்த திட்டங்களுக்கான நிதி ஆதாரத்தை எங்கிருந்து திரட்டுவீர்கள் என்ற கேள்விக்கு, தவெக தரப்பில் இருந்து நிர்வாக சீர்திருத்தம் தொடர்பான பதில்கள் முன்வைக்கப்படுகின்றன. அரசு டெண்டர்களில் நிலவும் முறைகேடுகள் மற்றும் 40% கமிஷன் போன்ற ஊழல்களை ஒழித்தாலே, மாநிலத்தின் கஜானாவை பலப்படுத்த முடியும் என்றும், கனிமவள கொள்ளையைத் தடுத்து அரசே முறையாக நடத்தினால் நிதி பற்றாக்குறை ஏற்படாது என்றும் அவர்கள் வாதிடுகின்றனர்.
முடிவாக, தமிழக வெற்றி கழகத்தின் இந்த தேர்தல் அறிக்கை, வெறும் வாக்குறுதிகளின் தொகுப்பு மட்டுமல்லாமல், விஜய்யின் அரசியல் ஆளுமையை நிரூபிக்க வேண்டிய ஒரு முக்கிய ஆவணமாக பார்க்கப்படுகிறது. சுமார் 17 பொருளாதார நிபுணர்கள் மற்றும் பல்வேறு துறை சார்ந்த வல்லுநர்களை கொண்டு இந்த அறிக்கை தயாரிக்கப்பட்டுள்ளதாக கூறப்படும் நிலையில், இது மக்கள் மத்தியில் எந்த அளவிற்கு எடுபடும் என்பது 2026 தேர்தல் முடிவுகளில்தான் தெரியவரும்.
அதிமுக மற்றும் திமுக போன்ற பாரம்பரியமிக்க கட்சிகளுக்கு ஒரு கடுமையான நெருக்கடியை தரும் வகையிலேயே இந்த அறிவிப்புகள் அமைந்துள்ளன என்பதில் எவ்வித சந்தேகமும் இல்லை. விஜய்யின் அரசியல் வருகை, தமிழக அரசியலில் ஒரு புதிய துருவத்தை உருவாக்குமா அல்லது ஏற்கனவே உள்ள நீரோட்டத்தில் இணையுமா என்பதுதான் தற்போதைய எதிர்பார்ப்பாக உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
