தமிழக அரசியல் வரலாற்றில் ஒரு குறிப்பிட்ட கால இடைவெளியில் அதிகார மையங்கள் மாறுவது என்பது தவிர்க்க முடியாத சுழற்சியாகவே இருந்து வந்துள்ளது. 1950களில் இந்திய தேசிய காங்கிரஸ் கட்சி தமிழகத்தில் அசைக்க முடியாத சக்தியாகவும், தனி ராஜ்ஜியம் நடத்துபவராகவும் இருந்தது. ராஜாஜி, காமராஜர் போன்ற பெருந்தலைவர்களின் தலைமையில் காங்கிரஸ் கோலோச்சிய அந்த பொற்காலம், 1967 சட்டமன்ற தேர்தலோடு ஒரு முடிவுக்கு வந்தது. அண்ணா, கருணாநிதி, எம்ஜிஆரின் எழுச்சியால் உதயமான திமுக, காங்கிரஸை ஆட்சியில் இருந்து அகற்றியது மட்டுமல்லாமல், தேசிய கட்சிகளின் பிடியில் இருந்து தமிழகத்தை மீட்டு மாநில கட்சிகளின் ஆதிக்கத்தை நிலைநாட்டியது. இது தமிழக அரசியலின் முதல் பெரிய அதிகார மாற்றமாகும்.
அறுபதுகளின் இறுதியில் களம் காங்கிரஸ் மற்றும் திமுக என இருதுருவங்களாக மாறிய போது, காங்கிரஸ் கட்சி மெல்ல மெல்ல தனது செல்வாக்கை இழந்து தேய தொடங்கியது. எழுபதுகளின் தொடக்கத்தில் திமுகவிலிருந்து பிரிந்து எம்.ஜி.ஆர் அனைத்திந்திய அண்ணா திராவிட முன்னேற்றக் கழகத்தை தொடங்கியவுடன், களம் திமுக – அதிமுக என அதிரடியாக மாறியது. 1977-ல் எம்.ஜி.ஆர் ஆட்சியை பிடித்த பிறகு, கடந்த ஐம்பது ஆண்டுகளாக தமிழக அரசியல் என்பது “அதிமுக – திமுக” என்ற இரு திராவிட பெருந்தூண்களை சுற்றியே சுழன்று வருகிறது. இந்த நீண்டகால இருமுனை போட்டியில் மற்ற தேசிய மற்றும் மாநில கட்சிகள் அனைத்தும் வெறும் கூட்டணி கட்சிகளாகவோ அல்லது சிறிய சக்திகளாகவோ மட்டுமே ஒடுங்கி போயின.
இந்த சூழலில் தான், 2026 சட்டமன்ற தேர்தலை முன்னிட்டு நடிகர் விஜய் தனது ‘தமிழக வெற்றிக் கழகத்தை’ தொடங்கி புதியதொரு அரசியல் அலைக்கு வித்திட்டுள்ளார். தமிழக அரசியல் களத்தில் தற்போதைய நிலவரப்படி அதிமுகவின் வாக்கு வங்கியில் ஒரு சரிவு ஏற்பட்டுள்ளதாகவும், அந்த வெற்றிடத்தை நிரப்ப விஜய் மிகச்சரியான நேரத்தை தேர்ந்தெடுத்துள்ளதாகவும் அரசியல் நோக்கர்கள் கருதுகின்றனர். விஜய்யின் இந்த வருகை, மீண்டும் ஒருமுறை தமிழக அரசியலை இருதுருவ போட்டியாக மாற்றும் சக்தியைக் கொண்டுள்ளது. ஆனால் இந்த முறை களம் என்பது பழையபடி திராவிட கட்சிகளுக்குள் இருக்கப்போவதில்லை, மாறாக “தவெக – திமுக” என்ற புதிய பரிமாணத்தை நோக்கி நகர போகிறது.
வரலாறு மீண்டும் திரும்புவது போல, அன்று காங்கிரஸ் கட்சி தேய்ந்து காலியான அதே பாதையில் இன்று அதிமுக பயணிக்கிறதோ என்ற அச்சம் அந்த இயக்கத்தின் தொண்டர்களிடையே எழுந்துள்ளது. ஒரு காலத்தில் தமிழகத்தின் முதல் கட்சியாக இருந்த காங்கிரஸ், இன்று திமுகவின் தயவில் சில தொகுதிகளில் மட்டும் போட்டியிடும் நிலைக்கு தள்ளப்பட்டது. அதேபோல், அதிமுகவின் உட்கட்சிப் பூசல்கள் மற்றும் தலைமைத்துவ பலவீனங்களைப் பயன்படுத்திக் கொண்டு, 2026-ல் தவெக ஒரு பலமான அஸ்திவாரத்தை போட்டுவிட்டால், அதிமுகவும் காலப்போக்கில் காங்கிரஸை போலவே தனது இருப்பை இழக்க நேரிடும். விஜய்யின் இளமை துடிப்பு மற்றும் அவரது மாபெரும் ரசிகர் பட்டாளம் ஆகியவை அதிமுகவின் பாரம்பரிய வாக்கு வங்கியை சிதைக்கும் ஆயுதங்களாக பார்க்கப்படுகின்றன.
விஜய்யின் இந்த தொலைநோக்குத் திட்டம் என்பது வெறும் ஒருமுறை ஆட்சியை பிடிப்பது மட்டுமல்ல; தமிழகத்தின் எதிர்கால அரசியல் வரைபடத்தை மாற்றியமைப்பதாகும். 2026 தேர்தலை ஒரு தொடக்கப்புள்ளியாக வைத்து கொண்டு, தவெகவை மாநிலத்தின் பிரதான எதிர்க்கட்சியாகவோ அல்லது மிகப்பெரிய சக்தியாகவோ நிலைநிறுத்துவதே அவரது இலக்கு. இதன் மூலம், தமிழகத்தில் பாஜக அல்லது மற்ற கட்சிகள் காலூன்ற இடமளிக்காமல், அடுத்த சில ஆண்டுகளுக்கு “திமுக vs தவெக” என்ற நேரடி மோதலை உருவாக்குவதே அந்த மாஸ்டர் பிளான். இது நிகழ்ந்தால், தமிழகத்தின் அரசியல் களம் ஒரு புதிய நவீன யுகத்திற்குள் நுழையும்.
மொத்தத்தில் 1950களில் இருந்த காங்கிரஸ் மற்றும் 70களில் உருவான அதிமுக ஆகியவற்றுக்கு மாற்றாக, இப்போது தவெக ஒரு மிகப்பெரிய சக்தியாக உருவெடுத்துள்ளது. 2026 சட்டமன்ற தேர்தல் என்பது விஜய்க்கு ஒரு அக்னி பரீட்சை மட்டுமல்ல, தமிழக அரசியலின் எதிர்காலத்தை தீர்மானிக்கும் ஒரு திருப்புமுனை. இந்த தேர்தலில் தவெக போடும் அஸ்திவாரம் வலுவாக இருக்கும் பட்சத்தில், வரும் ஆண்டுகளில் தமிழக அரசியல் என்பது அறிவாலயத்திற்கும் தவெக தலைமை அலுவலகத்திற்கும் இடையிலான போட்டியாகவே இருக்கும். விஜய்யின் இந்த திட்டமிட்ட நகர்வுகள் பலிக்கும் பட்சத்தில், தமிழக அரசியல் வரலாற்றில் ஒரு புதிய அத்தியாயம் எழுதப்படும் என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
