தமிழக அரசியல் களம் 2026 சட்டமன்ற தேர்தலை நோக்கி ஒரு மாபெரும் போர்க்களமாக உருவெடுத்துள்ள நிலையில், டெல்லி அதிகார மையமான பாஜக மேலிடம் அதிமுக பொதுச்செயலாளர் எடப்பாடி பழனிசாமிக்கு வழங்கியுள்ளதாக கூறப்படும் ஒரு ரகசிய உத்தரவு தற்போதைய ஹாட் டாபிக்காக மாறியுள்ளது. திமுகவை தோற்கடித்தால் மட்டும் போதாது, அந்த கட்சி தமிழக அரசியலிலிருந்தே காணாமல் போக வேண்டும்” என்ற ஒற்றை இலக்கை டெல்லி முன்னிறுத்தியுள்ளது. இதற்காக, விஜய்யின் தமிழக வெற்றிக் கழகத்தை எப்படியாவது தேசிய ஜனநாயக கூட்டணிக்குள் கொண்டு வர வேண்டும் என்றும், அதற்கு விஜய் என்ன நிபந்தனைகள் விதித்தாலும், எத்தனை தொகுதிகள் கேட்டாலும் கொடுத்து சரிக்கட்டுமாறு எடப்பாடியாருக்கு அழுத்தம் கொடுக்கப்பட்டுள்ளதாக தெரிகிறது.
இந்தியாவில் எப்படி காங்கிரஸை இல்லாமல் செய்துவிட் வேண்டும் என்ற கொள்கையுடன் பாஜக செயல்படுகிறதோ, அதேபோல் தமிழகத்தில் திமுகவை அதிகாரத்திலிருந்து அகற்றுவது, காணாமல் போக செய்வது என்பது பாஜகவின் நீண்டகால திட்டம் என்றாலும், இம்முறை அவர்கள் கையில் எடுத்திருக்கும் வியூகம் மிகவும் ஆக்ரோஷமானது. “திமுகவை ஒருமுறை வீட்டுக்கு அனுப்பியாச்சுன்னா, அதற்கு அப்புறம் அதிகாரம் இல்லாத அவர்களை எப்படி சட்ட ரீதியாகவும், அரசியல் ரீதியாகவும் கையாள வேண்டும் என்பது எங்களுக்குத் தெரியும்” என்று டெல்லி தரப்பு அதிமுகவிடம் திட்டவட்டமாக தெரிவித்திருப்பதாக கூறப்படுகிறது. இந்த தேர்தலில் திமுகவை வீழ்த்துவதற்கு விஜய்யின் வாக்கு வங்கி ஒரு மிகப்பெரிய துருப்புச் சீட்டாக இருக்கும் என்பதால், எடப்பாடியார் தனது பிடிவாதங்களை தளர்த்தி விஜய்யுடன் கைகோர்க்க வேண்டும் என்பதே டெல்லியின் கட்டளையாக உள்ளது.
எடப்பாடி பழனிசாமியை பொறுத்தவரை, அவரே தற்போதைய மெகா கூட்டணியின் முதல்வர் வேட்பாளர் என்பதில் அமித்ஷா ஏற்கனவே உறுதியாக இருக்கிறார். ஆனால், விஜய்யை உள்ளே கொண்டு வரும்போது முதல்வர் நாற்காலி அல்லது அதிகார பகிர்வு குறித்த சிக்கல்கள் எழலாம். இருப்பினும், “விஜய் கூட்டணிக்கு வந்தே ஆக வேண்டும்; நீங்கள் என்ன செய்வீர்களோ தெரியாது, பேச்சுவார்த்தையை வெற்றிகரமாக முடியுங்கள்” என்று டெல்லி கொடுத்திருக்கும் நெருக்கடி, எடப்பாடியாரை சற்று தர்மசங்கடத்தில் ஆழ்த்தியுள்ளது. விஜய்யை ஒரு தம்பியாகவோ அல்லது சமமான கூட்டாளியாகவோ ஏற்றுக்கொண்டு, அவருக்கு துணை முதல்வர் பதவி அல்லது கணிசமான இடங்களை ஒதுக்க அதிமுக தலைமை இணங்குமா என்பதே இப்போதைய கேள்வி.
நடிகர் விஜய்யைப் பொறுத்தவரை, அவர் தனித்து போட்டியிட்டால் வாக்குகள் பிரிந்து மீண்டும் திமுகவுக்கே சாதகமாக அமைந்துவிடுமோ என்ற அச்சம் பாஜக மற்றும் அதிமுக தரப்பில் நிலவுகிறது. திமுக ஆட்சிக்கு எதிரான வாக்குகள் சிதறாமல் ஒரு குடையின் கீழ் வர வேண்டும் என்பதே இப்போதைய கணக்கு. விஜய்யின் அரசியல் வருகை இளைஞர்கள் மற்றும் சினிமா ரசிகர்களிடையே ஒரு தாக்கத்தை ஏற்படுத்தியுள்ளதால், அந்த எழுச்சியை தங்கள் கூட்டணிக்கு சாதகமாக மாற்ற டெல்லி முனைகிறது. இதற்காக பவன் கல்யாண் போன்ற பிற மாநில தலைவர்கள் மூலமாகவும் விஜய்யிடம் தூது அனுப்பப்பட்டு வருவதாகத் தகவல்கள் கசிகின்றன.
அரசியல் அரங்கில் திமுகவை ஒரு ‘ஊழல் கட்சி’யாகவும், ‘குடும்ப அரசியல்’ செய்யும் கட்சியாகவும் சித்தரித்து, அவர்களை முற்றிலுமாக முடக்க வேண்டும் என்ற டெல்லியின் திட்டத்திற்கு அதிமுக ஒரு கருவியாக செயல்பட வேண்டும் என எதிர்பார்க்கப்படுகிறது. “அதிகாரம் கையை விட்டு போன பிறகு திமுகவை சிதறடிக்க முடியும்” என்ற டெல்லியின் நம்பிக்கை, மறைமுகமாக சில விசாரணை அமைப்புகளின் அடுத்தகட்ட நகர்வுகளையும் சுட்டிக்காட்டுகிறது. எனவே, இந்த தேர்தல் வெறும் ஆட்சி மாற்றத்திற்கான தேர்தல் மட்டுமல்ல, ஒரு நீண்டகால அரசியல் ஆதிக்கத்தை அழிப்பதற்கான தேர்தலாகவும் பாஜகவினால் வடிவமைக்கப்பட்டு வருகிறது.
இறுதியாக, எடப்பாடி பழனிசாமி இந்த டெல்லி நெருக்கடியை சமாளித்து விஜய்யை எப்படி தனது கூட்டணிக்குள் இழுக்க போகிறார் என்பதுதான் தமிழக அரசியலின் அடுத்தகட்ட நகர்வை தீர்மானிக்கும். விஜய்யின் நிபந்தனைகளை ஏற்று அதிமுக இறங்கி வந்தால், அது தமிழக அரசியலில் ஒரு மிகப்பெரிய சுனாமியை ஏற்படுத்தும் என்பதில் சந்தேகமில்லை. திமுக எதிர்ப்பு என்ற ஒற்றை புள்ளியில் இணையப்போகும் இந்த ‘மெகா கூட்டணி’ நிஜமாகுமா அல்லது விஜய்யின் ‘தனித்துவமான அரசியல்’ குறுக்கே நிற்குமா என்பது இன்னும் சில மாதங்களில் தெளிவாகிவிடும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
