புதிய கட்சி துவக்கம், ரஜினிகாந்துடனான ரகசிய சந்திப்பு, மற்றும் நடிகர் விஜய்யுடன் கூட்டணி அமைப்பது குறித்த அண்ணாமலை பற்றிய வதந்திகள், தமிழக அரசியல் வட்டாரத்தில் பரபரப்பை ஏற்படுத்தியுள்ளன. இந்த ஊகங்கள் பல்வேறு அரசியல் தலைவர்கள், விமர்சகர்கள் மற்றும் பொதுமக்களிடையே பெரும் விவாதத்தைத்தூண்டியுள்ளன.
அண்ணாமலை புதிய கட்சி தொடங்கவிருப்பதாகவும், ரஜினிகாந்தை ரகசியமாக சந்தித்து ஆலோசனை நடத்தியதாகவும் வெளியான சமூக வலைத்தள செய்திகள், உறுதியான ஆதாரங்கள் இல்லாததால், வெறும் வதந்திகளாகவே பார்க்கப்படுகின்றன.
விஜய்யின் தமிழக வெற்றிக் கழகம் மற்றும் அண்ணாமலை தலைமையிலான புதிய கட்சியும் கூட்டணிக்கு வாய்ப்பு உள்ளதா என்பது பற்றிய விவாதங்கள் தொடர்ந்து நடைபெறுகின்றன.
இருப்பினும், அரசியலில் நிரந்தர நண்பர்கள் அல்லது எதிரிகள் இல்லை என்பதால், வருங்காலத்தில் எதுவும் நடக்கலாம் என்று அரசியல் நோக்கர்கள் கூறுகின்றனர். விஜய்யின் அரசியல் நுழைவு, தமிழக அரசியலில் ஒரு புதிய போட்டி சூழலை உருவாக்கியுள்ளதால், எதிர்காலத்தில் எதிர்பாராத அரசியல் அணி மாற்றங்கள் ஏற்பட வாய்ப்புள்ளது.
அண்ணாமலை தி.மு.க.வை அதிகாரத்திலிருந்து வெளியேற்றுவதற்கு, அதிமுக – பாஜக கூட்டணி ஒரு “தவிர்க்க முடியாத யதார்த்தம்” என்று கூறியுள்ளார். 2026-ம் ஆண்டு சட்டமன்றத் தேர்தலில் தனியாக போட்டியிட்டு வெற்றி பெறுவது சாத்தியமில்லை என்று அவர் வெளிப்படையாகவே ஒப்புக்கொண்டார். எனவே, அ.தி.மு.க.வுடனான கூட்டணியே மிக முக்கியமானது என்று அவர் வலியுறுத்தினார். மேலும், தேசிய ஜனநாயக கூட்டணியின் முதல்வர் வேட்பாளராக எடப்பாடி பழனிசாமி தான் இருப்பார் என்றும் அவர் உறுதிப்படுத்தினார். அண்ணாமலை மற்றும் எடப்பாடி பழனிசாமி ஆகியோரிடையே கடந்த காலத்தில் கருத்து வேறுபாடுகள் இருந்தபோதும், தற்போது அவர்கள் இடையே நல்லிணக்கம் நிலவுவதாக கூறப்படுகிறது. ஆனால் அதே நேரத்தில் பாஜக கூட்டணியை 11% வாக்குகள் கிடைக்க வைத்ததில் அண்ணாமலைக்கு பெரும் பங்கு உண்டு. அப்படிப்பட்ட அண்ணாமலையை பாஜக தலைமை ஒதுக்கியுள்ளதால் அண்ணாமலை அதிருப்தியில் இருப்பதாகவும், எனவே தான் அவர் புதிய கட்சி தொடங்க திட்டமிட்டுள்ளதாகவும் கூறப்படுகிறது.
இந்த நிலையில், ஓ. பன்னீர்செல்வம், டி.டி.வி. தினகரன் போன்றவர்களும் அண்ணாமலை புதிய கட்சி ஆரம்பித்து விஜய் கூட்டணியில் இணைந்தால், அதே கூட்டணியில் சேர்வதற்கு தயாராக உள்ளதாக தெரிகிறது. அண்ணாமலை, தினகரன் மற்றும் ஓபிஎஸ்ஸுடன் சந்திப்புகள் நடத்த உள்ளதாகக் கூறப்படுகிறது. அதேபோல் பாமக மற்றும் தேமுதிக போன்ற கட்சிகளும் இந்த புதிய கூட்டணியில் இணைவதற்கான வாய்ப்புகளை ஆராய்ந்து வருகின்றன.
விஜய், அண்ணாமலை, ஓபிஎஸ், டிடிவி தினகரன் போன்ற புதிய மற்றும் பழைய அரசியல் சக்திகள் ஒன்றிணைந்தால், தமிழக அரசியல் ஒரு பெரிய மாற்றத்தை சந்திக்கும். தி.மு.க. மற்றும் அ.தி.மு.க. போன்ற திராவிட கட்சிகளின் ஆதிக்கத்தை இந்த சக்திவாய்ந்த கூட்டணி சவால் செய்யும். ஆனால், இந்த தலைவர்களுக்கு இடையே உள்ள சித்தாந்த வேறுபாடுகள் மற்றும் கடந்தகால அரசியல் பகைகள் இந்த கூட்டணியை உருவாக்குவதில் பெரும் சவால்களாக அமையும். ஒருவேளை விஜயகாந்த், வைகோ, திருமாவளவன் போன்றவர்கள் உருவாக்கிய மக்கள் நல கூட்டணி போல் மாறுவதற்கும் வாய்ப்பு உள்ளது.
எவ்வாறாயினும், 2026-ம் ஆண்டு சட்டமன்றத் தேர்தல் நெருங்க நெருங்க, தமிழக அரசியல் காட்சிகள் வேகமாக மாறிக்கொண்டிருக்கின்றன. அனைத்து கட்சிகளும் தி.மு.க.வை வீழ்த்த வேண்டும் என்ற ஒற்றை இலக்குடன் வியூகம் வகுக்கின்றன. இந்த சூழ்நிலையில், எந்த கட்சிகள் கூட்டணி அமைக்கும், யாருக்கு வெற்றி கிடைக்கும் என்பதைப் பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
