அடி மேலை கடல் முழுவதும் கப்பல் இடுவோம்.. தென்னிந்தியாவின் முக்கிய ஏற்றுமதி மையமாக மாறும் தூத்துக்குடி, விழிஞ்சம் துறைமுகங்கள்.. பாரதி கண்ட கனவு..!

தென் தமிழகத்தின் பொருளாதார வளர்ச்சியை மேம்படுத்தும் ஒரு புதிய அத்தியாயமாக, தூத்துக்குடியில் உள்ள வ.உ.சி. துறைமுகம் மற்றும் கேரளாவில் உள்ள விழிஞ்சம் துறைமுகம் ஆகியவை முக்கியமான பங்கு வகிக்க உள்ளன. இந்த இரு துறைமுகங்களும் தென்னிந்தியாவின் முக்கிய ஏற்றுமதி மையமாக உருவெடுப்பதற்கு பெரும் உந்துசக்தியாக அமையும் என எதிர்பார்க்கப்படுகிறது.

தூத்துக்குடி வ.உ.சி. துறைமுகம்: ஆழமான துறைமுகமாக வளர்ச்சி

தூத்துக்குடி துறைமுகம் தற்போது 14.2 மீட்டர் ஆழம் கொண்டதாக உள்ளது. இங்கு, ரூ.7,055 கோடி மதிப்பிலான வெளித்துறைமுகத் திட்டம் செயல்படுத்தப்பட உள்ளது. இந்தத் திட்டத்தின் முக்கிய நோக்கம், தூத்துக்குடி துறைமுகத்தை ஒரு கண்டெய்னர் கையாளும் மையமாக மாற்றுவதாகும். இந்த துறைமுகம் திருநெல்வேலி, தூத்துக்குடி மற்றும் மதுரை ஆகிய தென் தமிழகத்தின் முக்கிய உற்பத்தி மையங்களுக்கு சேவை வழங்குகிறது.

துறைமுகத்தின் உள்நாட்டு இணைப்பை மேம்படுத்த, பன்முகத் தளவாட பூங்கா (Multi-modal logistics park), விமான சரக்கு வளாகம் (air cargo complex) மற்றும் மேம்படுத்தப்பட்ட நெடுஞ்சாலைகள் போன்ற திட்டங்கள் செயல்படுத்தப்பட உள்ளன. இதன் மூலம், தென் தமிழகத்தில் இருந்து உற்பத்தி செய்யப்படும் பொருட்கள் எளிதாகவும் விரைவாகவும் ஏற்றுமதி செய்யப்படுவது உறுதி செய்யப்படும்.

விழிஞ்சம் துறைமுகம்: இயற்கையான ஆழம் ஒரு சாதகமான அம்சம்

கேரளாவில் உள்ள விழிஞ்சம் துறைமுகம், அதன் இயற்கையான ஆழம் காரணமாக தனித்துவம் பெறுகிறது. இங்கு 20 மீட்டருக்கும் அதிகமான இயற்கையான ஆழம் உள்ளது, இதனால் எந்தவொரு தூர்வாரும் பணிக்கும் அவசியமில்லை. இது பெரிய கப்பல்கள் எளிதாக அணுகுவதற்கு உதவுகிறது.

விழிஞ்சம் துறைமுகம் தொடங்கப்பட்ட ஒரு வருடத்திற்குள் 395 கப்பல்களை கையாண்டுள்ளது. இதில் 23 மிகப் ரிய சரக்கு பெட்டி கப்பல்களும் அடங்கும். இதன்மூலம் 840,000 TEU-கள் (Twenty-foot Equivalent Unit) சரக்குகளை கையாண்டு, ஒரு வலுவான செயல்பாட்டு சாதனையை எட்டியுள்ளது.

ரூ.10,000 கோடி மதிப்பிலான விரிவாக்க திட்டங்கள் இங்கு மேற்கொள்ளப்பட உள்ளன. இதன் இரண்டாம் மற்றும் மூன்றாம் கட்டப் பணிகள் அக்டோபர் 25 முதல் தொடங்குகின்றன. இந்த திட்டங்களில், சரக்கு கையாளும் திறனை மும்மடங்காக அதிகரிப்பது முக்கிய நோக்கமாக உள்ளது.

விழிஞ்சம் துறைமுகம், தமிழ்நாட்டின் தென் மாவட்டங்கள் மற்றும் கர்நாடகாவிலிருந்து வரும் சரக்குகளை கையாள்வதை இலக்காக கொண்டுள்ளது. இது தூத்துக்குடி துறைமுகத்துடன் இணைந்து தென் இந்தியாவின் ஏற்றுமதி தேவைகளுக்கு ஒரு முக்கியத் தளமாக செயல்படும்.

தென் தமிழகத்தின் எதிர்காலம்

இந்த இரண்டு துறைமுகங்களின் வளர்ச்சியும் தென் தமிழகத்தில் புதிய வேலைவாய்ப்புகளை உருவாக்குவதோடு, பொருளாதார வளர்ச்சியையும் ஊக்குவிக்கும். மேலும், உலகளாவிய வர்த்தக மையமாக இந்தியாவை நிலைநிறுத்தவும், தென் தமிழகத்தை பிராந்தியத்தின் ஏற்றுமதி மையமாக மாற்றவும் இந்தத் துறைமுகங்கள் வழிவகுக்கும்.