தற்போது திருமணம் மிகவும் பிரமாண்டமாக நடத்தப்பட்டு வரும் நிலையில், திருமணத்திற்கு இலட்சக்கணக்கில் மொய்ப்பணம் மற்றும் பரிசுப் பொருட்கள் வருவதுண்டு. இந்த மொய்ப்பணம் மற்றும் பரிசு பொருட்களுக்கு வருமான வரி உண்டா என்ற கேள்வி பலருக்கு எழுவது இயல்பே. இப்போது, வருமான வரி சட்டம் இதற்கு என்ன சொல்கிறது என்பதை பார்ப்போம்.வருமான வரி சட்டத்தின்படி, ஒரு நிதியாண்டில் தனி நபர் பெற்ற பரிசுகளின் மதிப்பு 50 ஆயிரம் ரூபாய்க்கு மேல் இருந்தால், கண்டிப்பாக அது வருமானமாக கருதப்பட்டு வரி விதிக்கப்படும். ஆனால், சில விதிவிலக்குகள் உள்ளன. திருமணம் போன்ற விசேஷங்களில் பெறப்படும் பரிசுப் பொருட்களுக்கு, இந்தியாவில் வருமான வரி கிடையாது.
இந்த பரிசுகள் வீடு, சொத்து, பணம், நகைகள், நிறுவன பங்குகள், எலக்ட்ரானிக்ஸ் பொருட்கள் போன்ற அசையும், அசையா சொத்துக்கள் எந்த வடிவில் இருந்தாலும் வருமான வரி விதிக்கப்படாது. இதற்கு முற்றிலும் வருமான வரி விலக்கு அளிக்கப்படுகிறது.
திருமண பரிசுப் பொருட்களுக்கு வரிவிலக்கு அளிக்கப்பட்டாலும், புதுமண தம்பதிகள் தங்களுக்கு பரிசாக கிடைக்கும் வீடுகள் அல்லது கார்கள் போன்ற உயர்ந்த மதிப்புள்ள பரிசுப் பொருட்களுக்கு உரிய ஆவணங்களை பராமரிக்க வேண்டும். வருமான வரித்துறை அதிகாரிகள் சோதனை செய்யும் போது, கார் வாங்குவதற்கோ அல்லது வீடு வாங்குவதற்கோ எப்படி பணம் கிடைத்தது என்று கேட்டால், அதற்கான ஆவணங்களை காண்பிக்க வேண்டும்.
மொத்தத்தில் திருமண விசேஷத்தில் எத்தனை லட்சம் பரிசு வந்தாலும், அதற்கு வருமான வரி இல்லை என்பது தான் உண்மை.
