நடிகர் விஜய் மற்றும் அஜித் ஆகிய இருவரும் தமிழ் சினிமாவில் தற்போதைய நிலவரப்படி டாப் ஹீரோக்களாக திகழ்கின்றனர். ரஜினிகாந்த் மற்றும் கமல்ஹாசன் ஆகிய இருவருக்கு அடுத்தபடியாக தமிழ் சினிமாவை தற்போது விஜய் மற்றும் அஜித் ஆகிய இருவரும் ஆண்டு வரும் நிலையில், இவர்களின் படங்கள் வந்தாலே ரசிகர்களுக்கு மிகப்பெரிய திருவிழா தான்.
இந்த இரண்டு பேரும் நெருங்கிய நண்பர்களாக இருந்தாலும் அவர்களது ரசிகர்கள் சமூக வலைத்தளங்களில் மாறி மாறி வசை பாடிக் கொண்டே இருப்பார்கள். விஜய் பற்றி அஜித் ரசிகர்களும், அஜித் பற்றி விஜய் ரசிகர்களும் எதிர்மறை கருத்துக்களை தெரிவிப்பதே தமிழ் சினிமாவில் பரபரப்பை ஏற்படுத்தும்.
இது பற்றி விஜய் மற்றும் அஜித் ஆகிய இருவரும் பலமுறை தெரிவித்தாலும் ரசிகர்கள் கேட்டுக் கொள்வதாக இல்லை. ஆனால், அதே நேரத்தில் இந்த இரண்டு நடிகர்களும் நெருங்கிய நண்பர்களாகவும் இருந்து வருகின்றனர். இவர்கள் இருவரது குடும்பத்தினரும் கூட நெருக்கமாக இருக்கும் சூழலில் அவர்கள் இணைந்து ஒரு படத்தில் நடித்து விட்டாலே ரசிகர்கள் பிரச்சனை முடிவுக்கு வந்து விடும் என்பது பலரின் கருத்தாக உள்ளது.
இதில் நடிகர் விஜய் ஆண்டுக்கு சராசரியாக ஒன்று முதல் இரண்டு திரைப்படங்கள் வரை நடித்து வரும் நிலையில், மறுபுறம் அஜித் குமார் இரண்டு ஆண்டுக்கு ஒரு படத்தில் தான் நடித்து வருகிறார். அதுவும் அரிதாகவே இருக்கும் சூழலில், அஜித் குமார் நடிப்பில் அடுத்ததாக விடாமுயற்சி திரைப்படம் தயாராகி வருகிறது.
அஜித்துடன் திரிஷா, அர்ஜுன், சஞ்சய் தத், ஆரவ் உள்ளிட்ட பலரும் நடித்து வரும் நிலையில், அனிருத் இசையமைக்கும் இந்த படத்தை மகிழ் திருமேனி இயக்கி வருகிறார். நீண்ட நாட்களாக இதன் படப்பிடிப்பு தாமதமாகி வர தற்போது இறுதிக் கட்ட பணிகளும் எட்டி உள்ளது. இன்னும் 10 நாட்கள் வரை படப்பிடிப்பு பாக்கி இருக்கும் சூழலில், விரைவில் அந்த பணிகளும் முடிந்து இந்த ஆண்டு இறுதிக்குள் திரைப்படம் வெளியாகி விடும் என்றும் எதிர்பார்க்கப்படுகிறது.
இதே போல நடிகர் விஜய் அடுத்ததாக வெங்கட் பிரபு இயக்கத்தில் கோட் திரைப்படத்திலும் நடித்து வருகிறார். இதில் பிரபு தேவா, பிரசாந்த், லைலா, ஸ்னேகா என 90ஸ் பலரின் பேவரைட் பிரபலங்கள் நடித்து வர, சயின்ஸ் பிக்ஷன் கதையம்சம் கொண்ட திரைப்படமாக இருக்கும் என்பதும் கிளிம்ப்ஸ் வீடியோ மூலம் தெரிய வந்தது.
செப்டம்பர் 5 ஆம் தேதி கோட் திரைப்படம் வெளியாக உள்ளதாக அதிகாரபூர்வமாக அறிவிக்கப்பட்டுள்ள நிலையில், யுவன் ஷங்கர் ராஜா இந்த படத்திற்கு இசையமைத்து வரும் நிலையில், இரண்டு பாடல்கள் வெளியாகி நல்ல வரவேற்பை பெற்று வருகிறது.
இதனிடையே, கோட் படத்தில் ஒரு பாடல் காட்சியை அஜித் குமார் சமீபத்தில் பார்த்துள்ளார். வெங்கட் பிரபுவும், அஜித் குமாரும் சமீபத்தில் சந்தித்து கொண்டனர். அப்போது கோட் படத்தின் டீசர் மற்றும் பாடல் காட்சி ஒன்றை பார்த்துள்ளதாக கூறப்படுகிறது. இதனை பார்த்ததும் பெரிதாக விரும்பிய அஜித், விஜய்யை அழைத்து பாடல் காட்சிகள் மிகவும் பிடித்திருந்ததாகவும், படம் வெற்றி பெற வாழ்த்துக்களையும் தெரிவித்ததாக தகவல் வெளியாகி உள்ளது.