புத்தாண்டு ராசி பலன் 2025 – கன்னி ராசிக்காரர்களுக்கு கவலைகள் நீங்கும்.. வீடு தேடி வரும் ராஜயோகம்!

2025 புத்தாண்டு பிறக்கப்போகிறது. இந்த ஆண்டிலாவது நமக்கு நல்ல வேலை கிடைக்க வேண்டும். திருமணம் நடக்க வேண்டும், குழந்தை பிறக்க வேண்டும், கடன் பிரச்சினை தீர வேண்டும் என்று பலரும் எதிர்பார்ப்பார்கள். 2025ஆம் ஆண்டில் ஆண்டு கோள்களான சனி, குரு, ராகு, கேது பெயர்ச்சி நிகழப்போகிறது. இந்த கிரகங்களின் இடப்பெயர்ச்சியால் கன்னி ராசிகளில் பிறந்தவர்களுக்கு குருவின் அருளாலும் ராகு, கேதுவின் புண்ணியத்தாலும் அற்புத மாற்றங்கள் நிகழப்போகிறது. வீடு தேடி ராஜ யோகம் வரப்போகிறது.

சனி பெயர்ச்சி:

கடந்த இரண்டரை ஆண்டுகாலமாக ஆறாம் வீட்டில் ருண ரோக சத்ரு ஸ்தானத்தில் பயணம் செய்து வந்த சனிபகவான் 2025ஆம் ஆண்டு மார்ச் மாதம் இறுதி முதல் ஏழாம் வீடான களத்திர ஸ்தானத்திற்கு வரப்போகிறார். கண்டச்சனியாக பயணம் செய்யப்போகும் சனி பகவான் உங்களுக்கு பெரிய அளவில் கஷ்டங்களை தரமாட்டார். சின்னச் சின்ன சோதனைகளையும், உடல் ஆரோக்கியத்தில் லேசான பாதிப்புகளையும் ஏற்படுத்துவார். பண விசயத்தில் சிக்கனம் தேவைப்படும். 2025ஆம் ஆண்டில் உங்கள் செலவுகளைக் குறைத்து,சேமிக்கத் தொடங்குங்கள். சகோதரர்களிடம் அதிக உரிமை எடுத்துக்கொள்ள வேண்டாம். பிள்ளைகளின் எதிர்காலத்துக்காகக் கொஞ்சம் சேமிக்கத் தொடங்குவீர்கள்.

குரு பெயர்ச்சி:

2025ஆம் ஆண்டின் முற்பகுதியில் குருபகவான் 9ஆம் வீடான பாக்ய ஸ்தானத்தில் பயணம் செய்கிறார். குரு பகவானின் பார்வை உங்கள் ராசிக்கு கிடைப்பது சிறப்பு. வேலை இல்லாதவர்களுக்கு வேலை கிடைக்கும். புரமோசனும் சம்பள உயர்வும் தேடி வரும். பங்குச்சந்தையில் செய்யும் முதலீடுகளில் இரட்டிப்பு லாபம் கிடைக்கும். கடன்களை அடைக்க வருமானத்தை தரப்போகிறார் குருபகவான். சகோதர சகோதரிகளுக்கு நன்மைகள் நடக்கும். திருமணம் நடைபெறும்.

குரு பார்வையால் நன்மை:

குரு பகவான் உங்கள் ராசிக்கு 10, 11ஆம் வீடுகளில் ஆண்டின் பிற்பகுதியில் பயணம் செய்யும் காலத்தில் சொந்த வீடு கட்டுவீர்கள் சொத்து சுகம் வாங்கும் யோகம் வரும். வேலையில் உயர்பதவியில் உள்ளவர்களுக்கு அதிகார பலம் தேடி வரும். குரு பலன் கிடைக்கப்போவதால் குடும்பத்தில் ஏற்பட்ட குழப்பங்கள் நீங்கும். பணம் பலவழிகளிலும் வந்து சேரும். திருமணமாகி நீண்ட நாட்களாக குழந்தை பாக்கியத்திற்கு காத்திருப்பவர்களுக்கு நல்ல செய்தி தேடி வரும்.

ராகு கேது பெயர்ச்சி:

2025ஆம் ஆண்டு மே மாதம் வரை ராகு பகவான் ஏழாம் வீட்டிலும் கேது பகவான் ஜென்ம ராசியிலும் பயணம் செய்யும் காலத்தில் பொன் பொருள் சேர்க்கை உண்டாகும். சொந்த வீடு, மனை வாங்கும் யோகம் உண்டு. குடும்பத்தில் இதுநாள் வரை தடைபட்டு வந்த சுப காரியங்கள் கைகூடும். பொருளாதார நிலை சிறப்பாக இருக்கும். ஆன்மீக தலங்களுக்கு யாத்திரை செல்வீர்கள். ஜென்ம கேது சில நேரங்களில் மன குழப்பத்தையும் விரக்தியான மனநிலையையும் தருவார் என்றாலும் கவலைப்படாமல் செய்யும் வேலையில் கவனம் செலுத்துங்கள்.

ஆண்டின் பிற்பகுதியில் ராகு 6ஆம் வீட்டிற்கு கேது விரைய ஸ்தானத்திற்கும் இடப்பெயர்ச்சி அடையப்போவதால் உடல் ஆரோக்கியத்தில் கவனம் தேவை. ராகு நோய்களையும் கடனையும் அதிகரிப்பார். கடன் வாங்க வேண்டாம் யாருக்கும் கடன் கொடுக்கவும் வேண்டாம் ஜாமீன் கையெழுத்தும் போட வேண்டாம். அவ்வப்போது மருத்துவமனைக்கு சென்று பரிசோதனை செய்து கொள்வது நல்லது.

பரிகாரம்:

கன்னி ராசிக்காரர்களுக்கு 2025ஆம் ஆண்டு சாதக பாதகங்கள் நிறைந்த ஆண்டாக அமைந்துள்ளது. குரு பகவானின் பயணமும் பார்வையும் சில நேரங்களில் கை கொடுக்கும். நோய் பாதிப்புகள் நீங்க, மன நிம்மதி அதிகரிக்க செவ்வாய்கிழமை விநாயகரை அருகம்புல் சாற்றி வழிபடுவது அவசியம். வெள்ளிக்கிழமைகளில் புற்றுள்ள அம்மன் கோவில்களுக்கு சென்று பால் அபிஷேகம் செய்வது நன்மையை தரும்.