ஆங்கிலப்புத்தாண்டு இன்னும் சில வாரங்களில் பிறக்கப்போகிறது. 2025ஆம் ஆண்டிலாவது நம்முடைய வாழ்க்கையில் நல்லது நடக்குமா? திருமணம் நடைபெறுமா? வேலை கிடைக்குமா என்ற எதிர்பார்ப்பு பலருக்கும் ஆண்டு கோள்களான சனி, குரு, ராகு, கேது பெயர்ச்சி நிகழப்போகிறது. இந்த கிரகங்களின் இடப்பெயர்ச்சியால் கடக ராசிகளில் பிறந்தவர்களுக்கு கோடீஸ்வர யோகம் தேடி வருமா? வேலை கிடைக்குமா? என்ன மாதிரியான பலன்களை தரப்போகிறது என்று பார்க்கலாம்.
கடக ராசி
சந்திரனை ராசி அதிபதியாகக் கொண்ட கடக ராசிக்காரர்களுக்கு ஆண்டு முழுவதும் அற்புதங்கள் நிகழப்போகிறது. காரணம் பாடாய் படுத்தி எடுத்த சனிபகவான் உங்களை விட்டு விலகப்போகிறார். அஷ்டம சனி விலகினாலே மன அமைதி அதிகரிக்கும். பண மழை பொழியும் காலம் வரப்போகிறது. காரணம் புத்தாண்டில் நவ கிரகங்களும் உங்களுக்கு சாதகமாக இருக்கப்போகிறது.
சனி பெயர்ச்சி:
2025ஆம் ஆண்டில் சனி பகவானின் பயணம் உங்களுக்கு சாதகமாகவே இருக்கப்போகிறது. 9ஆம் வீடான பாக்ய ஸ்தானத்திற்கு வரப்போகும் சனிபகவான் நன்மைகளை தரப்போகிறார். கடந்த 5ஆண்டு காலமாக உங்களை பாடாய் படுத்தி சோதித்து புடம் போட்ட தங்கமாக மாற்றியிருக்கிறார் சனிபகவான். இனி உங்களுக்கு நல்ல காலம் ஆரம்பமாகி விட்டது. விட்டு விலகிப்போனவர்கள் வீடு தேடி வருவார்கள். பட்ட அவமானங்கள் எல்லாம் முடிவுக்கு வரப்போகிறது. வேலையை இழந்து வருமானம் இன்றி தவித்தவர்களுக்கு நல்ல வேலை கிடைக்கப்போகிறது. தர்ம சனி காலத்தில் வேலையில் இருப்பவர்களுக்கு சம்பள உயர்வு புரமோசன் கிடைக்கும். செய்யும் வியாபாரம் தொழிலில் லாபம் அதிகரிக்கும்.
குரு பெயர்ச்சி:
குரு பகவான் 2025ஆம் ஆண்டு மே மாதம் வரைக்கும் 11ஆம் வீடான லாப ஸ்தானத்தில் பயணம் செய்வார். தொட்டதெல்லாம் பொன்னாகும். தொழில் வியாபாரத்தில் செய்யும் முதலீடுகளில் இரட்டிப்பு லாபம் கிடைக்கும். மே மாதத்தின் மத்தியில் குரு பகவான் விரைய ஸ்தானத்திற்கு வந்து அமரப்போகிறார். சுப விரைய செலவுகள் அதிகரிக்கும். குரு பகவான் அக்டோபர் மாதத்தில் அதிசாரமாக உங்கள் ராசிக்குள் வந்து அமர்ந்து ஜென்ம குருவாக பயணம் செய்யும் காலத்தில் பண வருமானம் அதிகரிக்கும். குடும்பத்தில் இருந்த பிரச்சினைகள் முடிவுக்கு வரும். குருபகவானின் பார்வை உங்கள் ராசிக்கு 5,7,9ஆம் இடங்களின் மீது விழுவதால் திருமணம், சுபகாரிய முயற்சிகளில் வெற்றி கிடைக்கும். குரு பலன் கிடைக்கப்போவதால் திடீர் அதிர்ஷ்டம் தேடி வரும்.
ராகு கேது பெயர்ச்சி:
2025ஆம் ஆண்டின் முற்பகுதியில் ராகு பகவான் ஒன்பதாம் இடமான பாக்கிய ஸ்தானத்திலும் கேது பகவான் 3ஆம் வீடான தைரிய ஸ்தானத்திலும் அமர்ந்து உள்ளனர். குடும்பத்தில் சுப காரியங்களில் ஏற்பட்ட தடைகள் விலகும். மறைமுக எதிரிகள் மாயமாவார்கள். பூர்வீக சொத்துகளில் இருந்து வந்த பிரச்னைகள் விலகும். புதிய சொத்து வாங்க முயற்சிப்போருக்கு கால நேரம் கூடிவரும். மே மாதத்திற்குப் பிறகு ராகு பகவான் அஷ்டம ஆயுள் ஸ்தானத்திலும் கேது பகவான் தன வாக்கு குடும்ப ஸ்தானத்திலும் பயணம் செய்யப்போகின்றனர். எந்த ஒரு காரியத்தை செய்யும் முன்பும் முன்யோசனையுடன் செயல்படுவது நல்லது. கணவன் மனைவி இடையே வீண் வாக்குவாதங்கள் செய்வதை கண்டிப்பாகத் தவிர்க்க வேண்டும். குடும்ப பிரச்சினைகளை யாருக்கும் சொல்ல வேண்டாம். பண விசயங்களில் வாக்குக்கொடுத்து மாட்டிக்கொள்ளாதீர்கள்.
2025ஆம் ஆண்டில் நவ கிரகங்களும் சாதகமாக இருந்தாலும் ஆண்டின் பிற்பகுதியில் ராகு கேதுவின் பயணம் சாதகமாக இல்லாத காரணத்தால் கடக ராசிகளில் பிறந்தவர்கள் செவ்வாய், வெள்ளிக்கிழமைகளில் துர்க்கை அம்மனுக்கு விளக்கேற்றி வழிபடுங்கள் பாதிப்புகள் குறைந்து நல்லதே நடக்கும்.
மேலும் உங்கள் ஜோதிட பலன்கள் பற்றி தெரிந்துக் கொள்ள தமிழ் மினிட்ஸ் இணையதளத்தை பின்தொடருங்கள்.