மதுரையில் தனது பைக் காணமால் போனது குறித்து கண்டுபிடித்துத் தருமாறு ஒட்டப்பட்ட போஸ்டர் ஒன்று சமூக வலைதளங்களில் வைரலாகி வருகிறது. பொதுவாக நமக்கு மிகவும் பிடித்த அல்லது யாராவது பரிசளித்த பொருட்கள் உடைந்து போனாலோ அல்லது தொலைந்து போனாலோ அந்தப் பொருள் நம்மிடம் இல்லை என்றால் மிகுந்த மன வலியை ஏற்படுத்தும். அப்படி ஒரு வலியைத் தான் மதுரையைச் சேர்ந்த கார்த்திகேயன் என்பவருக்கு ஏற்பட்டிருக்கிறது.
மதுரை மாவட்டத்தைச் சேர்ந்த கார்த்திகேயன், தனது தாயின் நினைவாக ஹீரோ ஹோண்டா ஸ்பிளெண்டர் வாகனத்தை வைத்திருக்கிறார். இந்நிலையில் அவரது இருசக்கர வாகனத்தை திருடர்கள் யாரோ திருடிச் சென்று விட்டனர். அந்த பைக்கின் விலை ரூ. 5000 தான் பெறுமாம்.
இருப்பினும் தனது அந்த வாகனத்தை தனது தாயின் நினைவாக வைத்திருந்ததாகவும், அதனை யாரேனும் திருடி இருந்தால் தயவு செய்து திருப்பிக் கொடுக்குமாறும், அதற்குச் சன்மானமாக ரூ. 10,000 பணம் மற்றும் குடும்பத்தினருக்கு தீபாவளிக்கு புதுத்துணி எடுத்துக் கொடுப்பதாகவும் போஸ்டர் அடித்து மதுரை நகர வீதிகளில் ஒட்டியிருக்கிறார்.
தொலைந்து போன இந்த பைக் 2002 மாடல் ஆகும். வண்டியின் காலம் முடிந்த நிலையில் தனது தாயின் நினைவாக இந்த பைக்கை வைத்திருந்ததால் தனக்கு மீண்டும் அந்த பைக் எப்படியாவது வேண்டும் என்ற நிலையைல் கண்ணீர் மல்க இதுபோன்ற போஸ்டரை ஒட்டியிருக்கிறார். சில பொருட்கள் நம்முடன் இருக்கும் போது நமது அன்புக்குரியவர்கள் நம்முடனே இருப்பது போன்ற உணர்வு இருக்கும். அப்படித்தான் கார்த்திகேயனுக்கும் அவரது தாய் அருகில் இருப்பது போன்ற உணர்வினை இந்த பைக் கொடுத்திருக்கிறது.