தற்போது கோலிவுட் மட்டுமில்லாமல் ஒட்டு மொத்த இந்திய சினிமாவும் நடிகர் விஜய் நடிப்பில் அடுத்ததாக உருவாகியுள்ள கோட் திரைப்படத்தை பற்றி தான் பேசி வருகின்றனர். இந்த திரைப்படம் வெளியாக சரியாக ஒரு வாரம் உள்ள சூழலில் ட்ரெய்லர் வெளியான பின்னர் படத்தின் மீதான எதிர்பார்ப்பு பல மடங்கு அதிகரித்தது.
வெங்கட் பிரபு மிக ஜாலியான திரைப்படங்கள் எடுப்பதில் கில்லாடியாக இருக்கும் சூழலில், விஜய் அவரது இயக்கத்தில் நடிப்பது பற்றி அறிவிப்பு வந்ததுமே ரசிகர்கள் உற்சாகம் அடைய தொடங்கி விட்டனர். மேலும் கோட் படத்தின் படப்பிடிப்பும் விறுவிறுப்பாக பல்வேறு நாடுகளில் நடைபெற்று வந்தது. தொடர்ந்து படம் குறித்த அப்டேட்டுகளையும் ரசிகர்கள் எதிர்பார்த்து வந்த நிலையில் யுவன் ஷங்கர் ராஜா இசையில் வெளியான பாடல்கள் கலவையான விமர்சனங்களை தான் பெற்றிருந்தது.
பாடல்கள் சுமாராக இருந்ததாக ரசிகர்கள் விமர்சனம் செய்ய திரைப்படமும் அப்படித்தான் இருக்குமோ என்றும் விஜய் ரசிகர்களே எதிர்பார்ப்பை குறைக்கத் தொடங்கி விட்டனர். இது பற்றி ட்ரெய்லர் வெளியீட்டு நிகழ்ச்சியில் பேசி இருந்த வெங்கட் பிரபு, பாடல்கள் கேட்க கேட்க பிடிக்கும் என்று திரைப்படத்தில் வரும் காட்சியமைப்புக்கு ஏற்ப பாடலும் நிச்சயம் ரசிகர்களை உற்சாகப்படுத்தும் என்றும் நம்பிக்கையுடன் குறிப்பிட்டு இருந்தார்.
அது மட்டுமில்லாமல் கோட் படத்தின் டிரைலர் மிக மிக கமர்சியலாக, அதே நேரத்தில் வேகமாக செல்வது போன்ற காட்சி அமைப்பும் இருப்பதால் திரைப்படமும் அதே போன்று இருக்கும் என்றும் ரசிகர்கள் நம்பிக்கையில் உள்ளனர். மேலும் கோட் படத்தின் ப்ரமோஷன் நிகழ்ச்சிகளும் விறுவிறுப்பாக படக்குழுவினர் சார்பாக நடைபெற்று வரும் நிலையில், சமீபத்தில் நேர்காணல் ஒன்றில் அதே படத்தில் நடித்த நடிகர் வைபவ், விஜய் குறித்து தெரிவித்த கருத்து ஒன்று தற்போது அதிக கவனம் பெற்று வருகிறது.
நேர்காணல் ஒன்றில் கலந்து கொண்ட வெங்கட் பிரபு கோட் திரைப்படத்தில் அடுத்தடுத்து வரும் காட்சிகளை உங்களால் கணிக்கவே முடியாது என தான் சவால் விடுவதாகவும் கூறியிருந்தார். இதே நிகழ்ச்சியில் பேசி இருந்த நடிகர் வைபவ், “கோட் சூட்டிங் ஸ்பாட்டில் நடிகர் விஜய் என்னை அழைத்து, ‘நீங்கள் அனைவரும் எத்தனை வருடமாக நண்பர்களாக இருக்கிறீர்கள்?’ என்று கேட்டார். நானும் சிறு வயதிலிருந்தே நண்பர்களாக இருக்கிறோம் என்று கூறினேன்.
அப்போது விஜய் சார் என்னிடம், ‘வெங்கட் பிரபு பயங்கரமா படம் எடுக்கிறான். இந்த படம் பிளாக்பஸ்டர் ஆகும்னு எனக்கு மட்டும் தான் தெரியும். ஆனா ஒண்ணுமே தெரியாத மாதிரி அங்க ஓரமா நிக்கிறான் பாரு’ என விஜய் கூறியதும் இதுதான் அண்ணா புது ஸ்ட்ரேட்டஜி என்று நானும் கூறினேன்.
அதே போல விஜய் சார் அதன் பின்னர் வெங்கட் பிரபு டென்ஷனாக யாரையும் திட்டுவரா என்று பார்த்தால் அது எதையும் செய்யாமல் மிகக் கூலாக படம் எடுக்கிறார். ஆனால் அவுட்புட் பயங்கரமாக உள்ளது என்றும் விஜய் சார் என்னிடம் கூறினார்” என வைபவ் கூறியுள்ளார்.