கொரோனா பரவல் காரணமாக கடந்த இரண்டு ஆண்டுகளாக 10 மற்றும் 12-ம் வகுப்பு மாணவர்களுக்கு பொதுத்தேர்வு நடைபெறாமல் இருந்தது. இதனால் இந்த ஆண்டும் பொதுத்தேர்வு நடைபெறுமா என்ற கேள்வி மாணவர்கள் மத்தியில் எழுந்தது.
இந்நிலையில் அடுத்த மாதம் 10 மற்றும் 12-ம் வகுப்பு மாணவர்களுக்கு பொதுத்தேர்வுகள் நடைபெறும் என பள்ளிக்கல்வித்துறை சமீபத்தில் அறிவித்திருந்தது. இதனால் அனைத்து பள்ளிகளிலும் மாலை நேரங்களிலும் சிறப்பு வகுப்பு நடத்தப்பட்டு வருகிறது.
இதனிடையே தமிழ்புத்தாண்டு, புனித வெள்ளி மற்றும் சனி, ஞாயிறு என தொடர்ந்து 4 நாட்கள் பள்ளிகளுக்கு விடுமுறை அளிக்கப்படும் என தமிழக அரசு அறிவித்திருந்தது.
இந்த சூழலில் 10 மற்றும் 12-ம் வகுப்பு மாணவர்களுக்கு விடுமுறை நாட்களில் சிறப்பு வகுப்புகள் எடுக்க பள்ளிக் கல்வித்துறை தடைவிதித்துள்ளது.
மேலும், விடுமுறை நாட்களில் பல்வேறு தனியார் பள்ளிகளில் சிறப்பு வகுப்புகள் நடைபெறுவதாக பள்ளிக் கல்வித்துறைக்கு தொடர்ந்து புகார்கள் எழுந்த நிலையில் தற்போது இந்த உத்தரவை அமலுக்கு கொண்டுவந்துள்ளது.